#Title

நீதி கிடைக்க தமிழ்நாடு அரசு எடுத்த நடவடிக்கை என்ன? சட்டப்பேரவையில் எதிர்க்கட்சித் தலைவர் உதயநிதி ஸ்டாலின் கேள்வி!

சென்னை, ஆக. 26 –

சட்டப்பேரவையில், நேற்று கவன ஈர்ப்புத் தீர்மானத்தில் பேசிய எதிர்க் கட்சித் தலைவர் உதயநிதி ஸ்டாலின் அவர்கள், ‘‘கர்நாடகாவில் 3 தமிழர்கள் திட்டமிட்டு சித்திரவதை செய்து படுகொலை செய்யப்பட்டுள்ளார்கள். இச்சம்பவத்தில் நீதி கிடைக்க தமிழ்நாடு அரசு எடுத்த நடவடிக்கை என்ன?’’ என கேள்வி எழுப்பினார்.

கர்நாடக மாநிலத்தில், வனத்துறையினரால் 3 தமிழர்கள் படுகொலை செய்யப்பட்டது தொடர்பாக, சட்டப் பேரவையில் எதிர்க்கட்சித் தலைவர் உதயநிதி ஸ்டாலின் அவர்கள் கவன ஈர்ப்புத் தீர்மானத்தில் பேசியதாவது:–

அதிர்ச்சிதரும்

போஸ்ட்மார்ட்டம் ரிப்போர்ட்!

பேரவைத் தலைவர் அவர்களே, கர்நாடகா மாநிலத்தில், ஹனூர் அருகே அந்தோணிசாமி, ஜான் ரோஸ் பீட்டர், குமார் ஆகிய மூன்று தமிழர்கள் அந்த மாநில வனத்துறையினரால் கடந்த 15-ஆம் தேதி அதிகாலையில் படுகொலை செய்யப்பட்டுள்ளார்கள். சுட்டுக் கொல்லப்பட்டுள்ளார்கள். ஏற்கனவே, இந்த அவையின் கவனத்துக்கு எடுத்து வந்துள்ளோம்.

சுட்டுக்கொல்லப்பட்ட அந்த மூன்று தமிழர்களின் உடற்கூறு ஆய்வறிக்கை (போஸ்ட்மார்ட்டம் ரிப்போர்ட்) இன்று வெளிவந்துள்ளது. அதில் மூன்று பேருமே சித்திரவதை செய்யப்பட்டு, மிக அருகில் நிற்க வைக்கப்பட்டு, சுட்டுக் கொல்லப்பட்டுள்ளார்கள் என்று அந்த போஸ்ட்மார்ட்டம் ரிப்போர்ட் மூலமாக தெரிய வந்துள்ளது.

மூன்று பேருக்கும் உடல் முழுக்க படுகாயம் இருந்திருக்கிறது. விலா எலும்பு முறிக்கப்பட்டுள்ளது என்று போஸ்ட்மார்ட்டம் ரிப்போர்ட் தெளிவாகச் சொல்கிறது. எனவே, இது முழுக்க முழுக்க ஒரு படுகொலை. இந்தப் படுகொலைக்கு எதிராக இந்த ஆட்சி என்ன நடவடிக்கை எடுத்திருக்கிறது என்பதைத் தெரிந்து கொள்ள விரும்புகின்றேன்.

கர்நாடக

அரசுக்குக் கண்டனம்!

குறைப்பட்சம் அந்த மாநில அரசிடம் விளக்கம் கேட்டு கடிதம் எழுதியிருக்கிறதா? கடந்த வாரம், கர்நாடகா முதலமைச்சர் தென் மாநில முதலமைச்சர் மாநாட்டுக்காக இங்கு வந்தார். அப்போது நேரிலாவது தமிழ்நாடு அரசு, தன் கண்டனத்தைத் தெரிவித்திருக்கிறதா? கர்நாடக மாநில காவல்துறைக்குப் பதிலாக, ஒரு மேல்மட்ட நீதி விசாரணை செய்ய தமிழ்நாடு அரசு வலியுறுத்த வேண்டும் என்று, இந்த அவையில் ஏற்கனவே வலியுறுத்தியுள்ளேன். அது சம்பந்தமாக இந்த மாநில முதலமைச்சரால் ஏதாவது அழுத்தம் கொடுக்கப்பட்டதா?

இறந்தவர்களின் குடும்பங்களை

முதல்வர் சந்திக்காதது ஏன்?

இந்தப் பிரச்சினை நடந்தவுடன் முதலமைச்சரோ, அமைச்சரவையில் இருப்பவர்களோ, கர்நாடகா சென்று, இறந்தவர்களின் குடும்பத்துக்கு ஆறுதல் சொல்லியிருக்க வேண்டும். மூன்று தமிழர்களின் மரணத்துக்கு நீதி கிடைக்க தமிழ்நாடு அரசு முழு முயற்சி எடுக்க வேண்டும். அவர்கள் குடும்பத்துக்குத் தேவையான நிதியுதவியையும், சட்ட உதவியையும் அரசு செய்ய வேண்டும் என்று உங்கள் கவனத்துக்குக் கொண்டு வருகிறேன்.

இவ்வாறு சட்டப்பேரவையில், எதிர்க்கட்சித் தலைவர் உதயநிதி ஸ்டாலின் அவர்கள் உரையாற்றினார்.