#Title

கருப்பும் நீலமும்! The Unbroken Bond!

அ ண்ணல் அம்பேத்கருக்கும் திராவிட இயக்கத்திற்குமான உறவு என்பது தந்தை பெரியார் காலத்திலேயே ஆழமாக வேரூன்றித் தொடங்கிய ஒரு வரலாற்றுத் தொடர்ச்சி. புரட்சியாளர் அம்பேத்கர் மீதும் அவரது கொள்கைகள் மீதும் தந்தை பெரியார் எவ்வித மதிப்பு வைத்திருந்தார் என்பதை ஒரு உதாரணத்தின் மூலம் உணர்த்தலாம்.

1936–ஆம் ஆண்டு லாகூரில் நடைபெறவிருந்த ஜாதி ஒழிப்பு மாநாட்டிற்காக அம்பேத்கர் தயாரித்த தலைமை உரையில், மதத்தையும் ஜாதியையும் மிகக் கடுமையாக விமர்சித்திருந்த சில பகுதிகளை நீக்க வேண்டும் என்று மாநாட்டுக் குழுவினர் கோரிக்கை விடுத்தனர். ஆனால், தனது கொள்கையில் உறுதியாக இருந்த அம்பேத்கர், அந்த உரையை மாற்ற மறுத்து மாநாட்டையே ரத்து செய்தார். இந்தச் செய்தியை அறிந்த தந்தை பெரியார், அந்த உரையை உடனடியாகத் தமிழ்நாட்டிற்கு வரவழைத்து, தனது ‘குடி அரசு’ பதிப்பகம் வாயிலாக ‘ஜாதியை ஒழிக்க வழி’ என்ற தலைப்பில் தமிழாக்கம் செய்து வெளியிட்டார். லட்சக்கணக்கான வாசகர்களைச் சென்றடைந்த அந்த நூல், தமிழகத்தில் ஒரு பெரும் விழிப்புணர்வை ஏற்படுத்தியது.

அதேபோல, அம்பேத்கர் நடத்திய ‘மூக்நாயக்’(குரலற்றவர்களின் நாயகன்) இதழில் பெரியாரின் வைக்கம் போராட்டத்தைப் பாராட்டித் தலையங்கம் எழுதப்பட்டதும், 1940–இல் பெரியார், ஜின்னா மற்றும் அம்பேத்கர் ஆகிய மூவரும் சந்தித்துக் கொண்ட வரலாற்றுச் சிறப்புமிக்க நிகழ்வில் பேரறிஞர் அண்ணா மொழிபெயர்ப்பாளராகப் விளங்கியதும் இரு இயக்கங்களுக்குமான நெருக்கமான உறவை மெய்ப்பிக்கின்றன.

தமிழ்நாட்டில் தந்தை பெரியார் முன்னெடுத்த இந்தித் திணிப்பு எதிர்ப்புப் போராட்டத்தை அம்பேத்கரும் ஜின்னாவும் மனதாரப் பாராட்டினார்கள். 1929–இல் பம்பாயில் நடைபெற்ற சுயமரியாதை மாநாட்டில் அம்பேத்கர் பங்கேற்றதும், 1930–இல் தமிழக மாநாட்டிற்குப் பெரியார் அவருக்கு அழைப்பு விடுத்ததும் இவர்களின் பரஸ்பர நன்மதிப்பிற்குச் சான்றாகும். “பெரியாரைப் பின்பற்றி வழிநடங்கள்” என்று அம்பேத்கரும், “அம்பேத்கரைப் பின்பற்றிச் செல்லுங்கள்” என்று பெரியாரும் தத்தமது தொண்டர்களுக்கு மாறி மாறி அறிவுரை கூறும் அளவிற்கு இருவருக்கும் இடையே Ideological Wave இருந்தது என்பதை பல நிகழ்வுகளின் மூலம் சொல்லலாம்.

பெரியாருக்குப் பின் வந்த முத்தமிழறி ஞர் கலைஞர் அவர்கள், அம்பேத்கரின் புகழைத் தமிழ்நாடு எங்கும் நிலைநாட்டும் வகையில் பல்வேறு ஆக்கபூர்வமான பணிகளைச் செய்தார். 1972–லேயே அம்பேத்கர் பெயரில் அரசு கல்லூரியை நிறுவிய கலைஞர், 1989–இல் சென்னை சட்டக்கல்லூரிக்கு அம்பேத்கர் பெயரைச் சூட்டினார். மேலும், வட ஆற்காடு மாவட்டத்திற்கு ‘அம்பேத்கர் மாவட்டம்’ எனப் பெயரிட்டு, இந்தியாவிலேயே ஒரு மாவட்டத்திற்கு அம்பேத்கரின் பெயரைச் சூட்டிய முதல் மாநிலமாகத் தமிழ்நாட்டை மாற்றிக் காட்டினார். அதுமட்டுமல்லாமல் இந்திய ஒன்றியத்தில் உள்ள அனைத்து மாநிலங்களிலும் அம்பேத்கர் மாவட்டம் உருவாக வேண்டும் என்று வலியுறுத்தியவரும் முத்தமிழறிஞர் கலைஞர் அவர்கள்தான்.

மகாராஷ்டிர மாநிலத்தின் மராத்வாடா பல்கலைக்கழகத்திற்கு அம்பேத்கர் பெயரைச் சூட்ட வேண்டும் என்று தி.மு.க. பொதுக்குழுவில் தீர்மானம் நிறைவேற்றி, அதனை அன்றைய மராட்டிய முதல்வர் சரத்பவார் அவர்களுக்கு கலைஞர் அனுப்பி வைத்தார். அங்கு அந்த முயற்சி தாமதமானபோது, தமிழ்நாட்டில் தனியாக ஒரு சட்டப் பல்கலைக்கழகத்தை உருவாக்கி அதற்கு அம்பேத்கர் பெயரைச் சூட்ட வேண்டும் எனக் கருதினார் கலைஞர். கழகம் ஆட்சிக்கு வந்தவுடன் 1997–இல் அம்பேத்கர் சட்டப் பல்கலைக்கழகத்தை உருவாக்கியபோது, அதற்கான இடத்தேடல் ஒரு சவாலாக இருந்தது. புதிய கட்டிடம் கட்ட காலதாமதமாகும் என்பதால், முதலமைச்சராகத் தான் குடிபுகுவதற்காகச் சகல வசதிகளுடன் தயார் செய்யப்பட்டிருந்த ‘பூம்பொழில்’ இல்லத்தையே அம்பேத்கர் பல்கலைக்கழகத்திற்காக ஒதுக்கீடு செய்து கலைஞர் உத்தரவிட்டார். இது அம்பேத்கரின் மீதும் கல்வியின் மீதும் அவர் கொண்டிருந்த அளப்பரிய மரியாதையின் வெளிப்பாடு. 1998–ஆம் ஆண்டு முதல் தமிழ்நாடு அரசின் சார்பில் ‘அண்ணல் அம்பேத்கர் விருது’ வழங்கும் முறையையும் முத்தமிழறிஞர் கலைஞர் அவர்கள் தொடங்கி வைத்தார்.

அம்பேத்கர் தனது ‘ஒரு விசாவுக்காகக் காத்திருத்தல்’ என்ற நூலில், தனது சிறுவயதில் சந்தித்த தீண்டாமைக் கொடுமைகளை விவரித்திருப்பார். மாசூரிலிருந்து கோரேகானுக்குத் தனது உடன்பிறந்த வர்களுடன் மாட்டு வண்டியில் சென்றபோது, அவர்கள் தாழ்த்தப்பட்டவர்கள் என்று தெரிந்ததும் வண்டிக்காரன் அவர்களை இறக்கிவிட்டதும், பின்னர் இரட்டிப்பு வாடகை கொடுத்து அவர்களே வண்டியை ஓட்டிச் சென்ற துயரமான நிகழ்வையும் அந்நூலில் விவரித்திருப்பார் புரட்சியாளர் அம்பேத்கர் அவர்கள். இந்நிகழ்வு முத்தமிழறிஞர் கலைஞர் எனும் மிகப்பெரிய கலைஞன் மனதில் மிகப்பெரிய தாக்கத்தை ஏற்படுத்தியுள்ளது. அதனால்தான் தனது ‘ஒரே இரத்தம்’ திரைப்படத்தில் அக்கொடுமையை ஒரு வலிமையான காட்சியாகச் சித்தரித்திருந்தார். வண்டியில் பயணம் செய்யும் ஆதிதிராவிடர் மாணவராக கழகத் தலைவர் மு.க.ஸ்டாலின் அவர்கள் நடித்திருப்பார். ஆதிக்க சாதியினரால் அவர் கீழே தள்ளிவிடப்படுவார். அப்போது திராவிட இயக்கத்தின் கொள்கை பிடிப்பால் உருவான ‘கருப்புச் சட்டை’ தொண்டர் ஒருவர், தீண்டாமைக் கொடுமையால் பாதிக்கப்பட்ட அந்த மாணவனைக் காப்பாற்றுவது போல அக்காட்சியை எழுதியிருப்பார் முத்தமிழறிஞர் கலைஞர் அவர்கள்.

இவர்களின் வழியில் வந்த திராவிட மாடல் அரசின் மாண்புமிகு முதலமைச்சர் மு.க.ஸ்டாலின் அவர்கள் 2022 ஏப்ரல் மாதம் விதி எண்:110இன் கீழ் திராவிட மாடல் அரசில் அம்பேத்கர் பெயரில் செயல்படுத்தப்படவுள்ள திட்டங்கள் குறித்து அறிவிப்புகளை வெளியிட்டார். ‘அம்பேத்கரின் பிறந்தநாளான ஏப்ரல் 14–ம் தேதி சமத்துவ நாளாகக் கொண்டாடப்படும். அம்பேத்கரின் பிறந்த நாளன்று தமிழ்நாடு முழுவதும் சமத்துவ நாள் உறுதிமொழி ஏற்கப்படும். அம்பேத்கரின் தேர்ந்தெடுக்கப்பட்ட நூல்கள் தமிழில் மொழிபெயர்க்கப்படும். அம்பேத்கரின் முழு உருவ வெண்கல சிலை அம்பேத்கர் மணிமண்டபத்தில் நிறுவப்படும்.’ போன்ற அறிவிப்புகளை வெளியிட்டார். இவை அனைத்தையுமே செய்துகாட்டியவர்தான் கழகத் தலைவர் அவர்கள்.

ஆதிதிராவிடர் மற்றும் பழங்குடி இன இளைஞர்களைத் தொழில் முனைவோராக்கும் நோக்கத்துடன் கழகத் தலைவர் அவர்கள் தொடங்கிய திட்டம்தான் ‘அண்ணல் அம்பேத்கர் தொழில் முன்னோடிகள் திட்டம்’. இத்திட்டத்தின் மூலம் ஆயிரக்கணக்கானோர் தொழில் முதலாளிகளாக உயர்ந்துள்ளார்கள். நமது ஆட்சியில் 2025–26இல் இத்திட்டத்திற்காக ரூ.170 கோடி நிதி ஒதுக்கினோம். ஆனால் இந்த அரசு இந்தாண்டிற்கான நிதியாக ரூ.165 கோடியைத்தான் ஒதுக்கியுள்ளது. ஆனால் அம்பேத்கர் அவர்களை கொள்கை தலைவர் என்பார்கள்.

‘அண்ணல் அம்பேத்கர் அயலக உயர்கல்வித் திட்டத்தின்’ கீழ், இதுவரை மொத்தம் ரூ.160 கோடி ஒதுக்கீடு செய்யப்பட்டு, உலகளவில் புகழ்பெற்ற கல்வி நிறுவனங்களில் சேர்க்கை பெற்று 385 மாணவர்கள் பயனடைந்துள்ளனர். இந்தாண்டு நிதித்துறை அமைச்சர் பேசும் போது ‘முன்னெப்போதும் இல்லாத அளவிற்கு இத்திட்டத்திற்காக நிதி ஒதுக்கீடு செய்யப்பட்டுள்ளது’ என்றார். ஆனால் அயல் நாட்டிற்கு படிக்கச் சென்றுள்ள மாணவர்கள் அரசின் நிதி கிடைக்காமல் தவித்து வருகிறார்கள் என்பதுதான் உண்மை. மாணவர்களின் சார்பாக கழக உறுப்பினர்கள் சட்டப்பேரவையில் எழுப்பிய கேள்விகளுக்கு மாணவர்களை மனதில் நிறுத்தி பதில் தராமல், அரசியல் ரீதியாக பதில் தந்து மாணவர்களை மேலும் சிரமத்திற்கு உள்ளாக்கியுள்ளது ஆளும் Take Diversion அரசு.

அதே போல 110 விதியின் கீழ் அறிவித்த வகையில் இந்தியாவிலேயே முதன்முறையாக அம்பேத்கர் பிறந்தநாளை ‘சமத்துவ நாள்’ என அறிவித்து நடைமுறைபடுத்தியவர் கழகத் தலைவர் அவர்கள். சமத்துவ நாள் உறுதிமொழியை தமிழ்நாடு முழுவதும் ஏற்கவைத்தவர் கழகத் தலைவர் அவர்கள்.

2022 அக்டோபரில் சென்னையில் உள்ள அம்பேத்கர் மணிமண்டபத்தில் அம்பேத்கர் சிலையை திறந்துவைத்தார் கழகத் தலைவர் அவர்கள். அச்சிலையினை வழங்கியவர் வி.சி.க. தலைவர் தொல்.திருமாவளவன் அவர்கள்.

அம்பேத்கர் அவர்களின் எழுத்துக்களையும், பேச்சுகளையும் தொகுத்து நூலாக வெளியிடும் முயற்சியை கழத் தலைவர் அவர்கள் திராவிட மாடல் ஆட்சியில் தொடங்கினார். அதன்படி 3 கட்டங்களாக அம்பேத்கர் அவர்களின் எழுத்து தொகுப்புகளை கழகத் தலைவர் அவர்கள் வெளியிட்டுள்ளார். எளிய மக்களுக்கும் எளிதாகப் புரியும் வகையில் தமிழில் மொழிபெயர்த்து இதுவரை 73 தொகுதிகள் திராவிட மாடல் ஆட்சியில் வெளியிடப்பட்டுள்ளது. எளிய மக்களுக்கும் இந்நூல்கள் சென்றடையும் நோக்கில் மிகக் குறைந்த விலையில் வெளியிடப்பட்டது.

இந்தக் கொள்கை உறவையும் தலைவர்களுக்கிடையேயான மதிப்பையும் உணர்ந்துகொள்ளாத தவிடுபொடிகள் ஏதேதோ உளறிக்கொண்டிருக்கிறார்கள். பாசிச எண்ணத்துடன் நடந்துகொள்ளும் அவர்களுக்கு கருப்பும் நீலமும் நிச்சயமாக பதில் சொல்லும். சமத்துவம் வெல்லும்!

தந்தை பெரியார் வாழ்க! புரட்சியாளர் அம்பேத்கர் வாழ்க!