சென்னை, ஆக.27–
சட்டப்பேரவையில் – கழகக் கொறடா எ.வ.வேலு பேசுகையில், “சட்டமன்றம் ஆரோக்கியமாக நடக்க ஆளுங்கட்சியினர் ஒத்துழைப்பு வழங்கிட வேண்டும்” என்று குறிப்பிட்டார்.
சட்டப்பேரவையில் அவர் பேசியதாவது:–
கடந்த முறை தி.மு.க. ஆட்சிப் பொறுப்பில் இருந்த போது திராவிட மாடல் முதல்வர் மு.க.ஸ்டாலின் அவர்கள் 234 சட்டமன்ற தொகுதிகளுக்கும் தேவைப்படும் பணிகளை எழுதித் தாருங்கள் எனக் கூறி அனைத்துத் தொகுதிகளுக்கும் பணிகளைச் செய்து கொடுத்தார்.
இங்கு சட்டமன்றத்தில் ஆளுங்கட்சியினர் செய்யும் குறைகளை சுட்டிக்காட்டவும், பொதுமக்கள் பணிகள் குறித்த கேள்வி கேட்கவும் தான் நாங்கள் சட்டமன்றத்திற்கு வந்திருக்கிறோம் “ அதற்கு பதில் சொல்ல வேண்டியது அமைச்சர்களுடைய கடமை, ஆனால் அமைச்சரே பிரச்சி னையை உருவாக்குகிறார் என்றால் அது தவறான நடைமுறையாகும்.
குறிப்பாக பொதுப்பணித் துறை அமைச்சர் பேசும்போது பொத்தாம் பொதுவாக மதுரையில் உள்ள முன்னாள் அமைச்சர் மீது குறை சொல்கிறார். அவர் சொல்வது உண்மையாக இருந்தால் பெயரைச் சொல்லி குறிப்பிடலாமே.
நாங்களெல்லாம் சட்டமன்றத்திற்கு காலை 9 மணிக்கு வந்து விடுகிறோம். மாலை 6.00 மணி வரை பொறுப்பாக சட்டமன்றத்தில் உட்கார்ந்திருக்கிறோம். அம்மையார் ஜெயலலிதா இருந்த காலத்தில் மாலை 4 மணிக்கு எல்லாம் நாங்கள் புறப்பட்டு சென்று விடுவோம்.
ஆனால் தற்பொழுது இளைஞர்கள் நிறைய பேர் வந்திருக்கிறீர்கள். நீங்கள் என்ன பேசுகிறீர்கள் என்று பார்க்கத்தான் இங்கு அமர்ந்திருக்கிறோம். எதிர்க்கட்சியை விட ஆளும் கட்சிக்கு தான் பொறுப்புகள் அதிகம். எதிர்க்கட்சியாகிய நாங்கள் கேள்வி கேட்க தான் செய்வோம் குறைகளை சுட்டிக்காட்டதான் செய்வோம். அதுதான் எதிர்க்கட்சியின் உடைய பணிகள், ஓடுகிற மாட்டிற்கு மூக்கணாங்கயிறு போலத்தான் எதிர்க்கட்சிகள் என்று பேரறிஞர் அண்ணா சொன்னார்.
அதன் அடிப்படையில் தான்எதிர்க்கட்சிகள் ஆகிய நாங்கள் தவறுகளை சுட்டிக்காட்டி கேள்வி கேட்கத்தான் செய்வோம். ஆனால் அதற்காக புதிதாக சட்டமன்ற உறுப்பினராக வந்துள்ள,சட்டமன்ற மரபு குறித்து தெரியாத உறுப்பினர்கள் எங்களைப் பார்த்து ஓடி வருவது என்பது சரியான நாகரீகமாக இருக்காது.
எனவே ஆளுங்கட்சி சட்டமன்ற உறுப்பினர்களை வழிநடத்த வேண்டிய பொறுப்பு அமைச்சர்களுக்கு இருக்கிறது. இந்த சட்டமன்றம் ஆரோக்கியமான சட்டமன்றமாக இருக்க வேண்டும் என்பது எதிர்க்கட்சிகளாகிய எங்களது விருப்பம்.
இவ்வாறு அவர் பேசினார்.