புதுச்சேரி, ஆக. 27–
கவிஞர் வைரமுத்துக்கு உயரிய இலக்கிய விருது வழங்கப்பட்டமைக்கு சட்டப்பேரவையில் பாராட்டும் வாழ்த்தும் தெரிவிக்கக்கோரி பேரவைத் தலை வருக்கு புதுச்சேரி எதிர்க்கட்சித் தலைவர் ஏ.எம்.நாஜிம் கடிதம் எழுதியுள்ளார்.
அக்கடிதத்தில் தமிழ் இலக்கிய உலகிற்குத் தன்னிகரற்ற படைப்புகளை வழங்கி, உலக அரங்கில் தமிழ் மொழியின் பெருமையை உயர்த்தியவர் கவிப்பேரரசு வைரமுத்து அவர்கள். இலக்கியம் மற்றும் திரைத்துறை மூலமாகத் தமிழ் மொழிக்கும் தமிழர்களுக்கும்பெரும் பெருமை சேர்த்துள்ளார்.
தற்போது அவரது வாழ்நாள் இலக்கியப் பங்களிப்பைப் போற்றும் வகையில், அவருக்கு ஒன்றிய அரசால் உயரிய ஞானபீட விருது வழங்கப்பட்டுள்ளது. தமிழரின் கலை மற்றும் இலக்கியப் பணிக்குக் கிடைத்துள்ள இந்த அரிய கவுரவம் உலகெங்கும் வாழும் தமிழ் மக்களுக்குப் பெருமிதம் அளிப்பதாக உள்ளது. எனவே, தமிழ் மொழிக்கும் இலக்கியத்திற்கும் அளப்பரிய தொண்டாற்றிய கவிஞர் வைரமுத்து அவர்களைப் பெருமைப்படுத்தும் விதமாக, நடைபெறவிருக்கும் புதுச்சேரி சட்டப்பேரவைக் கூட்டத்தொடரில் நமது புதுச்சேரி மாநில சட்டமன்றத்தின் சார்பாக அவருக்குப் பாராட்டுக்களையும் வாழ்த்துகளையும் பதிவு செய்து தீர்மானம் நிறைவேற்ற வேண்டும் என்று கேட்டுக்கொள்கிறேன்.
இவ்வாறு அக்கடிதத்தில் கோரியுள்ளார்.