#Title

ஜனநாயகத்தின் நான்காவது தூணாகத் திகழும் பத்திரிகைகள் மீது அவதூறு பரப்பக் கூடாது! சட்டமன்றத்தில் முன்னாள் அமைச்சர்கள் எ.வ.வேலு, தங்கம் தென்னரசு – அமைச்சர்களுடன் கடும் விவாதம்!

சென்னை, ஆக.27–

சட்டமன்றத்தில் பத்திரிகைகளை அவதூறாக பேசிய தொழிற்துறை அமைச்சருக்கு எதிர்ப்பு தெரிவித்து முன்னாள் அமைச்சர்கள் எ.வ.வேலு, தங்கம் தென்னரசு ஆகியோர் ஆற்றிய உரை விவரம் வருமாறு:–

பேரவையில் முன்னாள் அமைச்சர்எ.வ.வேலு பேசும்போது, “பத்திரிக்கை செய்தியை வைத்துக்கொண்டு அதனை உறுதிப்படுத்தி அவையில் பேசக்கூடாது என்று அமைச்சர் சொல்கிறார், அதே நேரத்தில் காசு கொடுத்தால் பத்திரிகைகள் எது வேண்டுமானாலும் எழுதுவார்கள் என்று குறிப்பிடுவது தவறு, ஒட்டுமொத்த பத்திரிகைகளையும் குறை சொல்லக்கூடாது, ஏனென்றால் ஜனநாயகத்தின் நான்காவது தூணாக திகழ்வது பத்திரிக்கை.

அந்த பத்திரிகைகள் காசு வாங்கிக் கொண்டு எழுதுகிறார்கள் என்று குறிப்பிடுவது முற்றிலும் தவறு, இங்கு அமைச்சர் சில பத்திரிகைகள் என்று குறிப்பிட்டார், அப்படி சில பத்திரிகைகள் என்று பொத்தம் பொதுவாக குறிப்பிடக் கூடாது, இந்த விவாதமே ஆஸ்டின் அவர்கள் கூறிய தகவல் அதிகாரப்பூர்வமற்ற செய்தியாக தான் எடுத்துக் கொள்ளவேண்டுமே தவிர, அதற்குப் பதிலாக நான் அறிவிக்கிறேன் அதிகாரப்பூர்வமாக நான் இந்த சாதனைஎல்லாம் செய்துள்ளேன் என்று தொழில்துறை அமைச்சர் தெளிவுபடுத்த வேண்டும் என்றார்.

முன்னாள் அமைச்சர் தங்கம் தென்னரசுபேசியதாவது:–

அரசாங்கத்தின் நான்காவதுதூணாக செயல்படுவது பத்திரிகைகள், அதேபோல் மூன்றாவது கண்ணாக இருந்து விமர்சனங் களை எடுத்துரைப்பது பத்திரிகைகளும் ஊடகங்களும் தான், அந்தப் பத்திரிகைகளில் வந்த ஒப்பிட்டைத்தான் இங்கு குறிப்பிட்டு பேசினார்கள்.

ஆளுங்கட்சிக்கு ஆதரவாக காசு வாங்கிக்கொண்டு எழுதுகிறார்கள், எதிர்க்கட்சிக்கு ஆதரவாக காசு வாங்கிக்கொண்டு எழுதுகிறார்கள் என்று பொத்தம் பொதுவாக சொல்லக்கூடாது. ஒரு பத்திரிகை புள்ளிவிவரத்தை ஒப்பீட்டை கூறியுள்ளார்கள் என்பதற்காக, காசு வாங்கிக்கொண்டு எழுதுகிறார்கள் என்று பொதுவாக அனைத்து பத்திரிகைகளையும் அவையில் விமர்சிப்பது அமைச்சருக்கு அழகல்ல.

இவ்வாறு தங்கம் தென்னரசு பேசினார்.