சென்னை, ஆக.28–
சட்டப்பேரவையில் முன்னாள் அமைச்சர் எ.வ.வேலுபேசும்போது, பரந்தூர் விமானநிலைய திட்டம் என்பது தமிழ்நாட்டின் பொருளாதாரத்தை உயர்த்தும் என்பதாலே செயல்படுத்த முடிவு செய்யப்பட்டதாக குறிப்பிட்டார்.
பேரவையில் சட்டமன்ற கொறடா எ.வ.வேலு பேசியதாவது:–
விமான நிலையம் அமைப்பது என்பது ஒன்றிய அரசின் நிர்வாகத்திற்கு உட்பட்டது, மாநில அரசின் பணி நிலம் கையகப்படுத்துவதோடு முடிந்து விட்டது, அதேபோல்தான் பரந்தூரில் விமான நிலையம் அமைக்க ஒப்புதல் அளித்த ஒன்றிய அரசின் ஆணையை ஏற்று பரந்தூர், ஹேமநாதபுரம் ஆகிய பகுதியில் உள்ள 13 கிராமங்களை இத்திட்டத்திற்கு பயன்படுத்த முடிவு செய்து, ஒரு குழு அமைக்கப்பட்டது, குழுவில் நானும் அப்போது அமைச்சர்களாக இருந்த தங்கம் தென்னரசுவும், மாவட்ட அமைச்சரான தாமோ.அன்பரசனும் காஞ்சிபுரம் மாவட்ட ஆட்சியர் அலுவலகத்தில் அந்த 13 கிராம விவசாயிகளை யும், பொது மக்களையும் வரவழைத்து பேசினோம், ஒரு நாள் முழுவதும் பேச்சுவார்த்தை நடைபெற்றது, இந்த பேச்சுவார்த்தையில் 11 கிராம மக்கள் நிலம் எடுக்க ஒப்புதலை தந்தனர்.
ஆனால் பரந்தூர் ஹேமநாதபுரம் இரண்டு கிராமங்களும் ஒப்புதல் தரவில்லை, அதனால் அவர்களோடு மீண்டும் பேச்சு வார்த்தை நடத்தினோம், அதன் பின்னர் இத்திட்டம் தமிழ்நாட்டின் பொருளாதாரத்தை உயர்த்தும் திட்டம் என்பதன் அடிப்படையில் தொடர்ந்து செயல்படுத்த முடிவு செய்தோம்,
தற்பொழுது பார்த்தீர்கள் என்றால் அண்டை மாநிலங்களான கர்நாடகம் மற்றும் ஆந்திராவில் விமான நிலைய விரிவாக்கம் செய்யும் பணி நடைபெற்று பொருளாதாரம்நாளுக்கு நாள் கூடிக் கொண்டே வருகிறது, அதைப்போல தான் தமிழ்நாட்டிலும் பொருளாதார வளர்ச்சி மேம்பட இந்தத் திட்டத்தை நிறைவேற்ற முயற்சி செய்தோம், இதனால் தி.மு.க.விற்கு ஒன்றும் லாபம் இல்லை.
இவ்வாறு எ.வ.வேலு பேசினார்.