திருவள்ளூர், ஆக. 28;–
“மாற்றம் வரும் என்ற நம்பிக்கையில் த.வெ.க.வை நம்பி வாக்களித்தோம்; ஆனால் இன்று குடும்பச் செலவை சமாளிக்க முடியாமல் தவிக்கிறோம். அத்தியாவசியப் பொருட்களின் விலை உயர்வு எங்கள் வாழ்க்கையையே புரட்டிப் போட்டுவிட்டது” என்று திருவள்ளூர் மாவட்டத்தைச் சேர்ந்த ஏழை, எளிய மற்றும் நடுத்தரக் குடும்பங்களின் குடும்பத் தலைவிகள் வேதனை தெரிவித்துள்ளனர்.
எலுமிச்சை முதல் பருப்பு வரை… விலை உயர்வு!
அத்தியாவசியப் பொருட்களின் விலை உயர்வை சுட்டிக்காட்டும் வகையில் வெளியாகியுள்ள விலைப்பட்டியலில், எலுமிச்சை கிலோ ரூ.150–ல் இருந்து ரூ.250 ஆகவும், இஞ்சி ரூ.100–ல் இருந்து ரூ.200 ஆகவும், காய்ந்த மிளகாய் ரூ.200–ல் இருந்து ரூ.300 ஆகவும் உயர்ந்துள்ளதாக குறிப்பிடப்பட்டுள்ளது.
பூண்டு ரூ.200–ல் இருந்து ரூ.280 ஆகவும், வெங்காயம் ரூ.40–ல் இருந்து ரூ.80 ஆகவும், சர்க்கரை ரூ.40–ல் இருந்து ரூ.60 ஆகவும், அரிசி ரூ.55–ல் இருந்து ரூ.75 ஆகவும் விலை உயர்ந்துள்ளதாகவும் அந்தப் பட்டியலில் தெரிவிக்கப்பட்டுள்ளது. மேலும், பால் ரூ.66–ல் இருந்து ரூ.74 ஆகவும், உளுந்து ரூ.130–ல் இருந்து ரூ.180 ஆகவும், தனியா ரூ.200–ல் இருந்து ரூ.250 ஆகவும், துவரம் பருப்பு ரூ.150–ல் இருந்து ரூ.180 ஆகவும் விலை அதிகரித்துள்ளதாக குறிப்பிடப்பட்டுள்ளது.
“ஒரு பொருளை மட்டும் வாங்கவில்லை; எல்லாப் பொருட்களுமே உயர்கின்றன!”
குடும்பத் தலைவிகள் கூறுகையில், “ஒரு பொருளின் விலை உயர்ந்தால் சமாளித்துக் கொள்ளலாம். ஆனால் சமையலுக்குத் தேவையான பல பொருட்களின் விலை உயர்ந்து கொண்டே இருந்தால் குடும்பத்தை எப்படி நடத்துவது? சம்பளம் வந்தவுடன் வீட்டு வாடகை, மின்சாரக் கட்டணம், குழந்தைகளின் கல்விச் செலவு, மளிகைப் பொருட்கள் என பணம் முழுவதும் செலவாகிவிடுகிறது” என்று வேதனை தெரிவித்துள்ளனர்.
குறிப்பாக குறைந்த வருமானம் பெறும் குடும்பங்களில், அத்தியாவசியப் பொருட்களின் விலை உயர்வு நேரடியாக குடும்ப உணவுத் தேவையையே பாதிக்கும் நிலை ஏற்பட்டுள்ளதாகவும் பெண்கள் கூறுகின்றனர்.
“குழந்தைகளுக்காக செலவைக் குறைக்கிறோம்!”
விலைவாசி உயர்வால் குடும்பச் செலவை கட்டுப்படுத்த வேண்டிய நிலை ஏற்பட்டுள்ளதால், பல குடும்பங்களில் தேவையான பொருட்களின் அளவைக் குறைத்து வாங்க வேண்டிய சூழ்நிலை ஏற்பட்டுள்ளதாக பொதுமக்கள் தெரிவிக்கின்றனர்.
“குழந்தைகளின் தேவையை குறைக்க மனம் வரவில்லை. ஆனால் வீட்டுச் செலவு அதிகரித்துக் கொண்டே இருப்பதால் என்ன செய்வது என்று தெரியவில்லை. முன்பு வாங்கிய அளவு மளிகைப் பொருட்களை இப்போது வாங்க முடியவில்லை” என்று பெண்கள் கூறுகின்றனர்.
“த.வெ.க.வை நம்பி வாக்களித்தோம்… இப்படி ஏமாறுவோம் என்று நினைக்கவில்லை!”
திருவள்ளூர் மாவட்டத்தைச் சேர்ந்த பொதுமக்கள் பலர், தேர்தல் காலத்தில் ஏற்பட்ட நம்பிக்கையுடன் த.வெ.க.வுக்கு வாக்களித்ததாகவும், ஆனால் தற்போது தங்களது அன்றாட வாழ்க்கையில் ஏற்பட்டுள்ள பொருளாதாரச் சுமை மிகுந்த ஏமாற்றத்தை ஏற்படுத்தியுள்ளதாகவும் கூறுகின்றனர்.
“மாற்றம் வரும் என்று நம்பினோம். ஏழை மக்களுக்கு நல்ல காலம் வரும் என்று நினைத்தோம். ஆனால் குடும்பச் செலவு நாளுக்கு நாள் அதிகரித்துக் கொண்டே செல்கிறது. எங்களைப் போன்ற சாதாரண மக்களின்கஷ்டத்தை அரசு புரிந்து கொள்ள வேண்டும்” என்று அவர்கள் தெரிவித்துள்ளனர்.
விலைவாசி உயர்வு புள்ளிவிவரம் அல்ல; குடும்பத் தலைவிகளின் கண்ணீர்!
விலைவாசி உயர்வை வெறும் எண்ணிக்கைகளாகப் பார்க்காமல், அதன் தாக்கம் ஒவ்வொரு குடும்பத்திலும் எப்படி இருக்கிறது என்பதை அரசு கவனத்தில் கொள்ள வேண்டும் என்று பொதுமக்கள் வலியுறுத்தியுள்ளனர்.
“விளம்பரம் வேண்டாம்… விலைவாசி குறைய வேண்டும்!”
“அரசின் செயல்பாடு எங்கள் வீட்டு சமையல் அறையிலும் தெரிய வேண்டும். பேச்சுகளும் விளம்பரங்களும் எங்களுடைய குடும்பச் செலவை குறைக்காது. அரிசி, பருப்பு, எண்ணெய், காய்கறி போன்ற அத்தியாவசியப் பொருட்களின் விலை கட்டுக்குள் வந்தால்தான் எங்களுக்கு நிம்மதி” என்று பெண்கள் கூறுகின்றனர்.
தேர்தலில் வாக்கு கேட்டவர்கள், தற்போது மக்களின் குரலையும் கேட்க வேண்டும் என்றும், ஏழை மற்றும் நடுத்தர மக்களின் பொருளாதாரச் சுமையை குறைப்பதே ஆட்சியின் முக்கிய கடமையாக இருக்க வேண்டும் என்றும் பொதுமக்கள் தெரிவித்துள்ளனர்.
திருவள்ளூர் மக்கள் எழுப்பும் கேள்வி
த.வெ.க.வை நம்பி வாக்களித்தோம்… மாற்றம் வரும்என்று எதிர்பார்த்தோம். ஆனால் அத்தியாவசியப் பொருட்களின் விலை உயர்வால் குடும்பத்தை நடத்தவே திண்டாட்டமாகிவிட்டது. இனியாவது அரசு விழித்துக்கொண்டு விலைவாசியை கட்டுப்படுத்துமா?”
தொகுப்பு
இரா.அண்ணாதுரை
முரசொலி நிருபர்
திருவள்ளூர் மாவட்டம்