சென்னை, ஆக.28–
சட்டமன்றத்தில் கழக கொறடா எ.வ.வேலு பேசுகையில், வன்னியர்களுக்கு 10.5 சதவிகிதம் இட ஒதுக்கீட்டிற்கு சட்ட ரீதியான பாதுகாப்பு பெற்றுத்தர போராடியது தி.மு.க. அரசு என்று குறிப்பிட்டார்.
சட்டமன்றத்தில் நேற்று நடைபெற்ற விவாதத்தின் போது கழக கொறடா எ.வ.வேலு அவர்கள் பேசியதாவது:–
இந்திய புள்ளி விபரச் சட்டம் 2008 ன் படி மாநில அரசு புள்ளி விவரங்களை சேகரிக்க இயலாது என்பதால் ஒன்றிய அரசின் சார்பில் சாதிவாரி கணக்கெடுப்பு நடத்த 20 10 2022 அன்று பாரதப் பிரதமருக்கு எங்கள் ஆட்சியில் கடிதம் எழுதினோம்,
ஒன்றிய அரசு சேகரிக்கும் புள்ளி விவரங்களின் அடிப்படையிலே, தான் சட்ட ரீதியான பாதுகாப்பு இருக்கும் என்றுஅன்றைய திமுக அரசு கருதியது, ஆகையால் 26 6 2022 அன்று சாதிவாரி கணக்கெடுப்பை தேசிய மக்கள் தொகை கணக்கெடுப்புடன் இணைந்து நடத்த வேண்டும் என்று இதே பேரவையில் ஒரு தீர்மானம் போட்டு அதனை ஒன்றிய அரசுக்கு அனுப்பினோம்.
மேலும் தமிழ்நாடு பிற்படுத்தப்பட்டோர் ஆணைய தலைவராக இருந்த முன்னாள் நீதி அரசர் ஜனார்த்தனன் அவர்கள் தனது பரிந்துரையில் சாதிவாரி கணக்கெடுப்பை ஒன்றிய அரசுதான் நடத்த வேண்டும் என்றும் கூறியிருந்தார்,
அதுமட்டுமல்ல நாடாளுமன்றத்தில் பாரதப் பிரதமர் அவர்கள் பேசும்போது பல மாநிலங்களில் சாதிவாரி கணக்கெடுப்பு நடத்துகிறார்கள் , ஆனால் அவர்களுக்கு அந்த அதிகாரமே கிடையாது என்றும், மக்கள் தொகை கணக்கெடுப்பு நடத்தும்போதுதான் சாதி வாரி கணக்கெடுப்பை சேர்த்து நடத்த முடியும் என்றும் கூறியவை இங்கு சுட்டிக் காட்ட விரும்புகிறேன்,
அவசரக் கோலமிட்ட எடப்பாடி!
அதன் அடிப்படையிலும் நாங்கள் சாதிவாரி கணக்கெடுப்பை நடத்த ஒன்றிய அரசை தொடர்ந்து வலியுறுத்தி வருகிறோம்.
கடந்த தி.மு.க. ஆட்சி காலத்திற்கு முன்பு அ.தி.மு.க. ஆட்சிக்காலத்தில் எடப்பாடி பழனிச்சாமி அவர்கள் முதல்வராக இருந்தபோது வன்னியர்களுக்கு 10.5% இட ஒதுக்கீடு வேண்டும் என்று பாமக நிறுவனர் டாக்டர் ராமதாஸ் அவர்கள் கேட்டுக் கொண்டதன் பேரில், தேர்தல் நேரத்தில் அவசர அவசரமாக எடப்பாடி பழனிச்சாமி அறிவித்துவிட்டு போய்விட்டார்.
ஆனால் அதற்குப் பின்பு ஆட்சிக்கு வந்த திராவிட முன்னேற்ற கழகம் 10.5% இட ஒதுக்கீட்டை பெற்றுத் தருவதில் உறுதியாக இருந்தது,
தி.மு.க. உறுதிய துணை இருக்கும்!
அதற்கு உரிய சட்டப் பாதுகாப்பை பெற்று தர வேண்டும் என்று தி.மு.க. எண்ணியிருந்தபோது சட்டமன்றத்திலே பேசிய பாமக சட்டமன்ற தலைவர் ஜி.கே.மணி அவர்களும் அதை வலியுறுத்தினார், மேலும் பாமக நிறுவனர் டாக்டர் ராமதாஸ் அவர்களை முதலமைச்சர் சந்திக்க வேண்டும் என்று கடிதமும் கொடுத்தார்,
அதன் பின்னர் தான் வன்னியர்களுக்கான 10.5% இட ஒதுக்கீட்டை சட்டரீதியாக உறுதி செய்வதற்காக , சென்னை உயர்நீதிமன்றத்தில் வழக்கு தொடர்ந்தது, அங்கு இட ஒதுக்கீட்டை ரத்து செய்ததை தொடர்ந்து, உச்சநீதிமன்றத்திற்கு சென்று மேல்முறையீடு செய்தோம், மேல்முறையீட்டில் உச்சநீதிமன்றம் மக்கள் தொகை குறித்த விவரங்கள் கேட்டதால் உடனடியாக ஓய்வு பெற்ற நீதிபதி பாரத ரத்னா தலைமையிலே ஒரு குழு அமைக்கப்பட்டு அந்தப் பணிகள் நடைபெற்று வருகிறது.
ஆகவே வன்னிய சமுதாயத்திற்கு 10.5 சதவீதம் இட ஒதுக்கீடு பெற்று தருவதில் திமுக எப்போதும் உறுதுணையாகஇருந்து வந்துள்ளது என்பதையும், தொடர்ந்து உறுதுணையாக இருக்கும் என்பதையும் இந்த அவையில் தெரிவித்துக் கொள்கிறேன்.
இவ்வாறு அவர் பேசினார்.