சென்னை, ஆக. 29 –
68 சமூக மக்கள் – சீர்மரபினர் பிரிவினருக்கு டி.என்.சி., டி.என்.டி. என்று சான்றிதழ் வழங்கப்படுகிறது. இதனை டி.என்.டி. என்று ஒரே சான்றிதழாக வழங்க வேண்டும் என்று பேரவையில் கழக உறுப்பினர் தி.மு.இராஜேந்திரன் கோரிக்கை வைத்தார்.
பேரவையில், பிற்படுத்த ப்பட்டோர், மிகவும் பிற்படுத்தப்பட்டோர் மற்றும் சீர்மரபினர் மானியக் கோரிக்கையின் போது குறுக்கிட்டு கழக உறுப்பினர் இராசேந்திரன் எழுப்பிய கேள்வி வருமாறு:
சீர்மரபினர் மாணவர் விடுதியில் நான்கு ஆண்டுகள் தங்கிப்படித்து பள்ளிக் கல்வியை நிறைவு செய்தவர்கள் 68 சமூக மக்கள் சீர்மரபினர் பிரிவில் உள்ளனர். தற்போது இச் சமுக மக்களுக்கு DNC/DNT என்ற சாதிச் சான்றிதழ் வழங்கப் படுகின்றன.
இதனை மாற்றி 1979–க்கு முன்னர் இருந்தது போல DNT (Denotified Tribes) என்று ஒரே சான்றிதழாக வழங்கிட வேண்டும். தமிழ்நாட்டின் மத்திய மாவட்டங்களிலும், தென் மாவட்டங்களிலும் மிகுதியாக வாழ்கின்ற சீர்மரபி னருக்கு DNT சான்றிதழ் வழங்குவதால் தமிழகத்தில் தற்போது வழங்கப்படும் மிகவும் பிற்படுத்தப்பட் டோர் மற்றும் சீர்மரபினர் இட ஒதுக்கீட்டில் எந்த மாற்றமும் ஏற்படாது. மாறாக, ஒன்றிய அரசு பிற்படுத்தப் பட்ட வகுப்பினரை வகைப்படுத்தும் போது தங்களுக்கு கூடுதல் சலுகைகள் கிடைக்கும் எனது கருதுகின்றனர்.
எனவே சீர்மரபினர் பிரிவில் உள்ள 68 சமூகத்தினரின் கோரிக்கையை ஏற்று அவர்களுக்கு DNT என்ற ஒரே சான்றிதழ் வழங்கிட வேண்டுமென இந்த அவையின் கவனம் ஈர்க்கின்றேன் என்று தெரிவித்தார்.
இதற்கு பிற்படுத்தப்பட்டோர்/ மிகவும் பிற்படுத்தப்பட்ட சீர்மரபினர் நலத்துறை அமைச்சர் சம்பத் குமார் பதிலளிக்கையில்,
எதிர்க்கட்சி உறுப்பினரின் கேள்விக்கு கீழ்க்கண்ட பதிலைத் தெரிவித்துக் கொள்கிறேன். சி.டி. ஆக்ட் என்று சொல்லப்படுகிற குற்றப்பரம்பறை சட்டம் 1920 – இல் சீர்மரபினர் பிரிவில் வைக்கப்பட்டுள்ள 68 சமூகத்தினர் 1979 வரை DNT என அழைக்கப்பட்டு தற்போது DNC/DNT என சான்றிதழ் வழங்கப்படுகின்றன.
உறுப்பினர் ஒரே சான்றிதழாக DNT என வழங்குமாறு கோரிக்கை வைத்தார். தற்போது இக்கோரிக்கை சென்னை உயர்நீதிமன்றத்தின் மதுரை அமர்வில் வழக்கு தாக்கல் செய்யப்பட்டு நிலுவையில் உள்ளது. இவ் வழக்கின் தீர்ப்பு கிடைக்கப் பெற்ற பின்னர் தக்க நடவடிக்கை எடுக்கப்படும் என்று பதிலளித்தார்.