#Title

தமிழ்நாட்டில் தாறுமாறாக எகிறிய அத்தியாவசியப் பொருட்களின் விலை! காய்கறி, அரிசி, சர்க்கரை, பருப்பு, எண்ணெய் விலை கிடுகிடு உயர்வு! இல்லத்தரசிகள் அதிர்ச்சி – கண்டுகொள்ளாத அரசு!

சென்னை, ஆக. 30 –

அத்தியாவசிய பொருட்களின் விலை தாறுமாறாக உயர்ந்து வரும் நிலையில், காய்கறி, அரிசி, சர்க்கரை, பருப்பு, எண்ணெய் விலைகளும் கிடுகிடுவென உயர்ந்து வருது இல்லத்தரசிகளை கடும் அதிர்ச்சிக்குள்ளாகியுள்ளது. இதை கட்டுப்படுத்த தமிழ்நாடு அரசு எந்தவித நடவடிக்கையும் எடுக்காமல் இருப்பது மக்கள் மத்தியில் கடும் அதிருப்தியை ஏற்படுத்தியுள்ளது.

மத்திய கிழக்கு நாடுகளில் ஏற்பட்ட போர் உள்ளிட்ட காரணங்களால் கடந்த சில மாதங்களாக கேஸ் சிலிண்டர் தட்டுப்பாடு ஏற்பட்டுள்ளது. இதனால் தேநீர் கடைகள், ஓட்டல்களில் உணவுகளின் விலை உயர்வு மக்களை வாட்டி வதைத்து வந்தது. இதிலிருந்தே மக்கள் மீள முடியாத நிலையில், தற்போது தமிழ்நாட்டில் தாறுமாறாக விலைவாசி உயர்ந்துள்ளது. வேகமாக உயர்த்தப்பட்டு வரும் காய்கறி, அரிசி, சர்க்கரை, பருப்பு, எண்ணெய் விலை தமிழ்நாட்டு மக்கள் மத்தியில் இடியாய் இறங்கி வருகிறது. முதலில் அரிசி விலை கணிசமாக உயர்ந்த நிலையில், பிறகு சர்க்கரை விலை உயர்ந்தது. அதைத் தொடர்ந்து இப்போது சமையலுக்கு அத்தியாவசியமாக இருக்கும் வெங்காயத்தின் விலையும் தொடர்ந்து உயர்ந்து வரு கிறது.

தற்போது ஒரு கிலோ சர்க்கரை 80 ரூபாய் வரை விற்பனை செய்யப்படுகிறது. இது ஒருபுறம் இருக்க, மறுபுறம் மீண்டும் வெங்காய தட்டுப்பாடு இல்லத்தரசிகளை வாட்டி வதைக்க தொடங்கியுள்ளது. இந்தியாவில் பருவமழை தாமதம், சில முதன்மை உற்பத்திப் பகுதிகளில் குறைந்த மழைப்பொழிவு காரணமாக வெங்காயச் சாகுபடி கடுமையாகப் பாதிக்கப்பட்டுள்ளது. இதன் எதிரொலியாக காய்கறி கடைகளில் வெங்காயத்தின் விலை ஒரு கிலோ 70 ரூபாய் வரை விற்பனை செய்யப்பட்டு வருகிறது. அதேபோல் சின்ன வெங்காயம் விலையும் ஏறுமுகத்திலேயே இருந்து வருகிறது. தினசரி சமையலுக்கு பயன்படுத்தப்படும் பெரிய வெங்காயம் மற்றும் சின்ன வெங்காயம் விலை நாளுக்கு நாள் அதிகரித்து வருவது இல்லத்தரசிகளிடையே கவலையை ஏற்படுத்தி உள்ளது. ஆயிரத்து 400 ரூபாய்க்கு விற்பனையான 25 கிலோ மூட்டை அரிசி இன்று தற்போது ஆயிரத்து 800 ரூபாய் வரை விற்பனையாகிறது.

அரிசி விலை உயர்ந்த நிலையில் தற்போது எண்ணெய் மற்றும் மளிகை பொருட்களின் விலை உயர்ந்துள்ளதால், பொது மக்கள் அதிர்ச்சியில் உறைந்துள்ளனர். அடுத்தடுத்த பண்டிகைகள் நெருங்கி வரும் சூழலில், விலை உயர்வு பொதுமக்களை அதிருப்தி அடையச் செய்துள்ளது. தமிழ்நாடு அரசு அத்தியாவசியப் பொருட்களின் விலை உயர்வைக் கட்டுக்குள் கொண்டு வருவதற்கு எந்தவிதமான நடவடிக்கையும் எடுக்கவில்லைஎன்ற குற்றச்சாட்டு மக்கள் மத்தியில் எழுந்துள்ளது.