சென்னை, ஆக. 30–
சட்டப் பேரவையில் பேசிய சோழவந்தான் தொகுதி த.வெ.க. உறுப்பினர் கருப்பையா, 2011–2016ஆம் ஆண்டுகளில் முத்தமிழ் அறிஞர் கலைஞர் அவர்கள், சட்டப் பேரவைக்கு வருகை தந்தது குறித்து –ஒரு உண்மைக்கு மாறான கூற்றைக்கூறினார். அப்போது அதனைக் கழக உறுப்பினர் அர.சக்கரபாணி, கடுமையாக மறுத்தும், உண்மையை விளக்கியும் பேசினார்.
“அவைக்கு உண்மைக்கு மாறான தகவல் தந்த சோழவந்தான்
த.வெ.க. சட்டமன்ற உறுப்பினர் கருப்பையாவின் பேச்சு அவைக் குறிப்பிலிருந்து நீக்கப்பட வேண்டும்” என அர.சக்கரபாணி விடுத்த வேண்டுகோளை பேரவைத் தலைவர் ஜே.சி.டி.பிரபாகரன் அவர்கள் ஏற்று த.வெ.க. உறுப்பினரின் அக்கூற்றினை அவைக் குறிப்பிலிருந்து நீக்கி உத்தரவிட்டார்.
அர.சக்கரபாணி பேசியதாவது :–
உறுப்பினர் சோழவந்தான் கருப்பையா பேசும் போது, 2011 – 2016ஆம் ஆண்டுகளில் தலைவர் கலைஞர் அவர்கள் சட்டமன்ற உறுப்பினராக இருந்தார். ஆனால் சட்டப் பேரவைக்கு அவர் வரவில்லை என்றும் – எனக்கு நல்ல கருத்துக்களைச் சொல்லவில்லை என்றும் சொன்னார்.
அந்த நேரத்தில் நான் தி.மு.க. கொறடாவாக இருந்தேன். அப்போது கலைஞர் அவர்கள் வீல் சேரில்தான் வர முடியும். அவருக்கு பேரவையில் உரிய வகையில் இருக்கை ஒதுக்கித் தருமாறு அப்போதைய பேரவைத் தலைவரிடம் நான் கோரிக்கை விடுத்தேன். ஆனால் அவர் ஒதுக்கித் தரவில்லை. அதனால் கலைஞர் அவர்கள் வந்தாலும் பேரவைக்குள் வர முடியவில்லை. எனவே வருகைப் பதிவேட்டில் கலைஞர் அவர்கள் கையெழுத்திட்டுச் செல்வார்கள்.
தலைவர் கலைஞர் அவர்களுக்கு உரிய முறையில் இருக்கைஒதுக்காததால்தான் அவை நடவடிக்கைகளில் அவரால் பங்கேற்க முடியவில்லை என்பதை இந்த நேரத்தில் தெரிவித்துக் கொள்கிறேன். ஏனென்றால் தவறான கருத்தை உறுப்பினர் சோழவந்தான் கருப்பையா சொல்லக்கூடாது, எனவே அவர் கூறிய அந்த வார்த்தைகளை பேரவைத் தலைவர் அவர்கள், அவைக் குறிப்பிலி ருந்து நீக்க வேண்டும்.
இவ்வாறு அர.சக்கரபாணி குறிப்பிட்டார்.
(உறுப்பினர் அர.சக்கரபாணி யின் கோரிக்கையை ஏற்று, உறுப்பினர் சோழவந்தான் கருப்பையா கூறிய அந்தக் கருத்தை அவைக் குறிப்பிலிருந்து நீக்குவதாக பேரவைத் தலைவர் அறிவித்தார்)