#Title

சிந்தனையைத் தூண்டிய திராவிட எழுத்துகள் வெள்ளை மாளிகையில்..! பேரறிஞர் அண்ணா !

த ம்பி! அமெரிக்காவின் ஆட்சி பீடம் உள்ள இடத்துக்கு ‘வெள்ளை‘ மாளிகை என்று பெயர் இருக்கிறது. ஆனால் அந்த ஆட்சியிலே உள்ளவர்கள் அனைவரின் நிறமும் வெள்ளையல்ல. கருநிறம் கொண்டவர்கள், நீக்ரோ (ஆஃப்ரோ-அமெரிக்க) மக்கள். நிறம் கருப்பு, இனம் நீக்ரோ, பூர்வீகம் ஆப்பிரிக்கா கண்டம். ஆனால் அவர்கள் அமெரிக்கர்கள். சட்டம் சொல்லுகிறது. ஆபிரகாம் லிங்கன், அவர்களும் அமெரிக்கர்களே என்று வார்த்தைகளை வீசி மட்டுமல்ல, ஒரு பெரிய பயங்கரமான உள்நாட்டுப் போரே நடத்திடக் கூறிட வேண்டி நேரிட்டது. “சரி” என்றனர். உதடு அசைந்தது தம்பி..உதடு! உள்ளம் இருக்கிறதே! அதிலே புற்றரவு புகுந்துகொண்டுதான் இருக்கிறது. சாகவில்லை. சாகடிக்கவும் முடியவில்லை. அதனைச் சாகடிக்கத் துணிந்து கிளம்பிய கென்னடியைக் கொடியோர் கொன்று விட்டனர் பதறப் பதற! பக்கம் இருந்த அவர் துணைவியார் ஜாக்குலின் துடிக்க..துடிக்க!

அந்த வெள்ளை மாளிகையில் ஒரு கருப்பு மனிதரை (ஆஃப்ரோ-அமெரிக்கர்), நீக்ரோவை அதிபராக அமரச் செய்து பார்க்கிறார், ‘ மனிதன்’ (The Man) எனும் ஏடு எழுதியுள்ள இர்விங் வாலாஸ்(Irving Wallace) என்பவர். அந்தப் புத்தகத்தைப் படித்ததிலிருந்து எனக்கு ஒரே ஆவல், உன்னிடம் கூறவேண்டும் என்று.

அமெரிக்காவில் முன்பு, நீக்ரோக்கள் உயிருள்ள ஜீவன்கள் அல்ல, உரிமைப் பெற்ற மாந்தர் என்றல்ல, வெறும் உடைமைகள் என்றே கருதப்பட்டு வந்தது. ஆப்பிரிக்காவிலிருந்து நீக்ரோக்களை வேட்டையாடிப் பிடித்துக் கொண்டு வந்து அமெரிக்காவில் விற்றுப் பொருள் குவித்து வந்தனர் கொடியவர்கள். இந்தச் சூழ்நிலையில் வெள்ளை மாளிகைக்கு ஒரு கருநிறத் தலைவர் என்கிறபோதுதான் வியப்புடன் கூடிய வெடவெடப்பு எடுக்கிறது நிறவெறியர்களுக்கு.

அமெரிக்கக் குடியரசுத் தலைவர் தமது பதவிக்காலத்தில் இறந்துபடுவாரானால், உடனடியாகத் துணைத் தலைவர், குடியரசு தலைவராக்கப்படுவார். இது அங்கு மரபு. குடிஅரசுத் தலைவரும் இறந்துபட்டால் துணைத்தலைவர். துணைத் தலைவரும் இறந்துபட்டால்? பாராளுமன்றத் தலைவர். அவரும் இறந்துபட்டால்? பாராளுமன்ற மேலவைத் தலைவர். இப்படி ஒரு மரபு பற்றி ஆசிரியர் குறிப்பிட்டுக் கொண்டு, தமது கற்பனையைக் கட்டியிருக்கிறார். அப்படி ஒரு சூழ்நிலையை ‘மனிதன்’ என்ற ஏடு உருவாக்கிக் காட்டுகிறது.

திடீரென்று அமெரிக்கக் குடியரசின் துணைத்தலைவர் இறந்துவிடுகிறார். குடியரசுத் தலைவர், நண்பர் இறந்ததால் ஏற்பட்ட துக்கத்தைத் துடைத்துக் கொள்ளவும் நேரமின்றி, ஐரோப்பாவில் பிரான்ஸ் நாட்டில் ஓர் ஊரில், சோவியத் அதிபரைச் சந்தித்து ஆப்பிரிக்கப் பிரச்சினை பற்றிப் பேசவேண்டி ஏற்பட்டுவிடுகிறது. அந்த மாநாட்டுக்குச் சென்றிருக்கிறார்.

அமெரிக்கத் தலைநகரில், மற்ற அமைச்சர்கள், உயரதிகாரிகள் இருக்கின்றனர். அவர்களுடன் மாநாட்டு இடைவேளையில் தொலைபேசி மூலம் பேசுகிறார் குடியரசுத் தலைவர். தொலைபேசி நின்றுவிடுகிறது. ஏதோ இயந்திரக் கோளாறு? பதைபதைக்கிறார்கள் பாதியிலே பேச்சு நின்றுவிட்டதே என்று!

“அய்யோ” என்று அவர்கள் அலறும்படியான செய்தி வருகிறது தொலைபேசி மூலம்! நம்பமுடியவில்லை.. அதிர்ச்சி.. குழப்பம்.. கலக்கம். தொலைபேசி தெரிவிக்கிறது, குடியரசுத் தலைவர் திடீரென இறந்துவிட்டார்! மாநாடு நடைபெற்றுக் கொண்டிருந்தபோது, மாளிகையின் மேற்பகுதி இடிந்து விழுந்துவிட்டது. அந்த இடத்திலேயே குடியரசுத் தலைவர் இறந்து போனார்.

குடியரசுத் துணைத்தலைவரோ ஏற்கனவே மறைந்துபோனார். தலைவரோ பிரான்சிலே பிணமாகிக் கிடக்கிறார். எத்தனை சோகத்தைத் தாங்கிக் கொள்ள முடியும். தத்தளித்தனர். அந்த தத்தளிப்புக்கு இடையிலேயே ‘மரபு’ குறிப்பிடுகிறபடி, பாராளுமன்றத் தலைவர் குடியரசுத் தலைவராகப் பொறுப்பேற்க வேண்டுமே?

கூப்பிடுக அவரை! என்றார் ஓர் அமைச்சர். “அவர் எங்கே இங்கே இருக்கிறார்? அவருமல்லவா, மாநாட்டில் கலந்துகொள்ள குடியரசுத் தலைவருடன் சென்றிருக்கிறார்” என்று விவரமளிக்கிறார் வேறொருவர். மீண்டும் பரபரப்பு. பதைப்பு.

தொலைபேசி வேலை செய்கிறது. அடிபட்டவர்களில் அவரும் ஒருவர். ஆனால் உயிர் போகவில்லை. மருத்துவமனையில் கிடத்தப்பட்டிருக்கிறார் என்று செய்தி கிடைக்கிறது. ஒருவருக்கொருவர் தைரியத்தைத் தருவித்துக் கொண்டிருக்கும்போதே அவர்கள் அனைவரையும் அடித்துக் கீழே தள்ளிவிடத்தக்க தாக்குதலை நடத்திற்று தொலைபேசி.

“அவரும் இறந்துவிட்டார் மருத்துவமனையில்” என்ற செய்தியைத் தெரிவித்தது.

குடியரசுத் தலைவர், துணைத்தலைவர், பாராளுமன்றத் தலைவர் மூவருமல்லவா மறைந்தனர். இனி, குடியரசுத் தலைவராக வேண்டியவர் பாராளுமன்ற மேலவைத் தலைவர் என்றார் ஒருவர். அவர் யார்? என்ற நினைப்புமற்ற நிலையில் சோகத்துடன், “ஆம்” என்றனர் மற்றையோர். தம்பி.. அந்த மேலவைத் தலைவர்தான் டக்ளஸ் டில்மன் என்ற நீக்ரோ. செனட் சபையின் தலைவர் டக்ளஸ் டில்மன்.

மரபு இருக்கிறதே? தலைவர், துணைத்தலைவர், பாராளுமன்றத் தலைவர் ஆகியோர் இறந்துபடின், செனட் சபைத் தலைவரே குடியரசுத் தலைவராக ஏற்றுக்கொள்ளப்பட வேண்டுமென்று!

எப்படிப்பட்ட சூழ்நிலையைத் தீட்டி, ஒரு நீக்ரோவைக் குடியரசுத் தலைவர் ஆக்கிக் காட்டியுள்ளார் ஆசிரியர் பார்த்தனையா?

மரபின்படி உயர்நீதிமன்றத் தலைவர் வருகிறார். பதவிப் பிரமாணம் செய்து வைக்கப்படுகிறது.“அமெரிக்க நாட்டுக்கு அமைந்துள்ள அரசியல் சட்டத்திட்டத்தையும் ஒழுங்கையும் காப்பாற்றியும் அதற்குக் கட்டுப்பட்டும் நான் ஆட்சி நடத்தி வருவேன்“ என்று உறுதிமொழி கூறுகிறார் டில்மன்.

“அமெரிக்க குடியரசுத் தலைவரே.. வாழ்க! கர்த்தர் தங்களை- அமெரிக்கக் குடியரசுத் தலைவராக அமரும் முதல் நீக்ரோவைக் காத்திடுவாராக!” என்று உயர்நீதிபதி கூறுகிறார். சூழ நிற்கிறார்கள் வெள்ளை இனத்தவர்.

‘வெள்ளை மாளிகையில்’ என்ற நூலில் பேரறிஞர் அண்ணா இதனை அழகாக விவரித்து, இந்தியாவில் நிலவும் தீண்டாமையை, தில்லைக் கோவில் தீட்சிதர்கள் செயல்பாடுகள் வரை சுட்டிக்காட்டி எழுதியுள்ளார்.

இர்விங் வாலாஸ் கற்பனையில் எழுதிய மனிதன் என்ற புதினத்தின் உட்கருத்து, பின்னாளில் உண்மையாக நடந்தேறியது. கறுப்பினத்தவர் ஒருவர் நேரடியாகவே அமெரிக்க மக்களால் குடியரசுத் தலைவராகத் தேர்ந்தெடுக்கப்பட்டார். அப்போது அண்ணா இல்லை. அவர் உருவாக்கிய தி.மு.கழகம் வலுவாக இருக்கிறது. அதனைக் கட்டிக்காத்த கலைஞரும் இருந்தார். அமெரிக்காவின் முதல் ஆஃப்ரோ-அமெரிக்க குடியரசுத் தலைவரானார் பராக் ஒபாமா. அவரை நேரில் சந்தித்து உரையாடினார் திராவிட இயக்கச் சிந்தனையாளரான முன்னாள் ஒன்றிய அமைச்சர் முரசொலி மாறன்.