சென்னை, ஆக. 31 –
முதல்வர் விஜய் தங்களை நேரில் சந்திக்க வேண்டும் என பணி நிரந்தரம் உள்ளிட்ட பல்வேறு கோரிக்கைகளை வலியுறுத்தி போராடி வரும் தூய்மைப் பணியாளர்கள் நேற்று 10–வது நாளாக துடைப்பம் எடுத்து போராட்டத்தை தொடர்ந்து வருவது பரபரப்பை ஏற்படுத்தியுள்ளது.
தூய்மை பணியாளர்களைப் பணி நிரந்தரம் செய்வது, மகப்பேறு விடுப்பு, கழிப்பறை மற்றும் ஓய்வறை வசதிகள், சம்பளத்துடன் கூடிய வார விடுமுறை வழங்க வேண்டும் உள்ளிட்ட ஒன்பது அம்ச கோரிக்கைகளை வலியுறுத்தி உழைப்போர் உரிமை இயக்கம் சார்பில் கடந்த 10 நாட்களாக பல்வேறு விதமான போராட்டங்களை முன்னெடுத்து வருகின்றனர்.
இதற்கிடையே தூய்மை பணியாளர்களின் கோரிக்கைகளைப் பரிசீலிக்கும் வகையில், சென்னை மாநகராட்சி ரிப்பன் மாளிகை வளாகத்தில் உள்ள ஆணையர் அலுவலகத்தில் ஆணையர் சமீரன் தலைமையில் கடந்த 23–ஆம் தேதி பேச்சு வார்த்தை நடைபெற்றது.
குண்டுகட்டாக கைது!
ஆனால், இந்த பேச்சுவார்த்தை தோல்வியில் முடிவுற்றது. இதனைத் தொடர்ந்து, பெரம்பூர் சட்டமன்றத் தொகுதியில் உள்ள முதல்வர் அலுவலகத்தை முற்றுகையிடும். போராட்டத்தை முன்னெடுத்தனர். அதை தொடர்ந்து, தண்டையார்பேட்டை 4ஆவது மண்டல அலுவலகத்தை முற்றுகையிட்டு தூய்மைப் பணியாளர்கள் திடீர் போராட்டத்தில் ஈடுபட்டனர். அவர்களை போலீசார் குண்டுக்கட்டாக கைது செய்தது பதற்றத்தை ஏற்படுத்தியது.
அப்போது, காவல் துறையினர், அவர்களை வாகனத்தில் ஏற்றி அங்கிருந்து அப்புறப்படுத்தினர். இதனால் போலீசார் மற்றும் தூய்மைப் பணியாளர்களிடையே தள்ளுமுள்ளு ஏற்பட்டது. இதையடுத்து, சென்னை மாநகராட்சி வளாகத்தில் நடத்திய 6–வது நாள் போராட்டத்தின் போது, மின்சாரத்தை அதிகாரிகள் துண்டித்தனர்.
இதனால் செல்போன் வெளிச்சத்தில் போராட்டம் நடத்தினர்.
அதை தொடர்ந்தும், தூய்மை பணியாளர்களின் போராட்டம் தொடர்ந்து வருகிறது. போராட்டக்காரர்கள் தரப்பில்,”எங்களுடைய கோரிக்கை நிறைவேற வேண்டும். அரசாங்கம் பேச்சுவார்த்தை நடத்த வேண்டும். முதல்வர் விஜய் எங்களைச் சந்திக்க வேண்டும்” எனத் தெரிவிக்கப்பட்டிருந்தது.
இதனையடுத்து அரசுத் தரப்பில் அமைச்சர்கள் மற்றும் அதிகாரிகள் நடத்திய முதற்கட்டப் பேச்சுவார்த்தைகள் தோல்வியில் முடிந்ததால், தங்களின் நியாயமான கோரிக்கைகள் முதல்வரின் கவனத்திற்குச் செல்லும் வரை போராட்டத்தைக் கைவிடப் போவதில்லை எனத் தூய்மைப் பணியாளர்கள் தெரிவித்திருந்தனர்.
கேட்குதா? கேட்குதா?
முதல்வருக்கு கேட்குதா?
இதற்கிடையே, தூய்மைப் பணியாளர்கள் ரிப்பன் மாளிகை முன்பு நேற்று முன்தினம் 9–வது நாளாக போராட்டத்தில் ஈடுபட்டனர். அப்போது, விசில் அடித்து வினோதமான முறையில் தங்களது போராட்டத்தைத் தீவிரப்படுத்தி னர்.
இப்போராட்டத்தில் கலந்து கொண்டவர்கள், “கேக்குதா? கேக்குதா? முதல்வருக்கு கேக்குதா?. நாங்கள் மவுனமாக இருந்தால் எங்கள் கோரிக்கைகள் யாருக்கும் கேட்காது, முதல்வர் விஜய் எங்களை நேரில் சந்தித்துப் பேசும் வரை நாங்கள் இந்த இடத்தை விட்டு நகர மாட்டோம்” எனக் கூறி, விசில்களைத் தொடர்ந்து ஊதி தங்களது எதிர்ப்பைப் பதிவு செய்தனர்.
இந்நிலையில் நேற்று காலை சென்னை மாநகராட்சி ரிப்பன் மாளிகை முன்பு கூடிய தூய்மை பணியாளர்கள் தமிழக அரசை கண்டித்து தொடர் போராட்டத்தில் ஈடுபட்டனர். அப்போது துடைப்பத்தால் பெருக்கி த.வெ.க. அரசுக்கு எதிர்ப்பு தெரிவித்து போராட்டத்தில் ஈடுபட்டனர். இந்த அங்கு மீண்டும் பதற்றம் நிலவியுள்ளது. பாதுகாப்பு கருதி போலீசார் குவிக்கப் பட்டனர். போராட்டக்காரர்கள் வெளியேற முடியாத வகையில் பேரிகார்டுகள் போட்டு தடுத்து வைக்கப்பட்டுள்ளனர்.
இது குறித்து போராட்டக்காரர்கள் கூறியதாவது:–
தமிழ்நாடு முதலமைச்சரின் தேர்தல் வாக்குறுதியின்படி பணி நிரந்தரம் வேண்டும். அரசு ஊழியர்கள் 3வது குழந்தை பெற்றுக் கொள்ள ஒரு ஆண்டு மகப்பேறு விடுப்பு வழங்கப்படுகிறது. ஆனால், தூய்மை பணியாளர்களுக்கு மகப்பேறு விடுப்பு வழங்க முடியாது என மாநகராட்சி ஆணையர் கூறுகிறார். இது நியாயமான மற்றும் சரியான நிலைப்பாடு அல்ல. கடந்த ஆண்டு நாங்கள் போராட்டம் நடத்திய போது த.வெ.க. தலைவராக இருந்த விஜய், நாங்கள் கேட்கும் கோரிக்கைகளை வாக்குறுதிகளாக கொடுத்தார்.
இப்போது முதல்வராக வந்துவிட்டார், அவர் கொடுத்த தேர்தல் வாக்குறுதிகளைத் தான் நிறைவேற்றக் கேட்கிறோம். இப்போது வரை எங்களை சந்திக்க அவர் நேரம் ஒதுக்கவில்லை. தொடர்ந்து 10 நாட்களாக போராடி வரும் எங்களை சந்திக்க முதல்வர் மறுக்கிறார். இதை கண்டித்து விசில் அடித்தும், துடைப்பத்தை தூக்கியும் போராட்டம் நடத்தி வருகிறோம். நாளைக்கு என்னென்ன எடுப்போம் என்று எங்களுக்கே தெரியவில்லை.
எனவே, எங்கள் குரலுக்கு முதல்வர்செவி சாய்த்து கோரிக்கைகைளை நிறைவேற்ற முன்வர வேண்டும். முதல்வர் எங்களை சந்திக்கும் வரை 100 நாட்கள் ஆனாலும் எங்கள் போராட்டத்தை நாங்கள் கைவிடமாட்டோம்.
இவ்வாறு அவர்கள் கூறினர்.