சென்னை,செப்.01–
சென்னை ஸ்டான்லி அரசு மருத்துவமனை வளாகத்தில் மருத்துவக் கழிவுகள், குப்பை தேக்கமடைந்துள்ளதால் கடும் துர்நாற்றம் வீசுவதோடு, தொற்று நோய் பாதிப்பு ஏற்படும் நிலை உள்ளது. வண்ணாரப்பேட்டை பகுதியில் ஸ்டான்லி அரசு மருத்துவமனையில் நாள்தோறும் உள்நோயாளிகள், புறநோயாளிகள் என ஆயிரத்துக்கும் மேற்பட்ட மருத்துவ பயனாளர்கள் சிகிச்சை பெற்று வருகின்றனர். இங்கு, ஒட்டுறுப்பு, கல்லீரல், சிறுநீரக பாதிப்பு, இதயம் தொடர்பான பாதிப்புகள், எலும்பு முறிவு, நரம்பியல் துறை, கண் சிகிச்சை, பல் மருத்துவம் முழு உடல் பரிசோதனை மையம், குழந்தைகள் சிகிச்சை மையம் என பல்வேறு சிகிச்சைப் பிரிவுகள் இயங்கி வருகின்றன.
இந்த மருத்துவமனையில் உயர்தர சிகிச்சைகள் வழங்கப்பட்டு வந்தாலும், அவ்வப்போது மருத்துவமனையை சுற்றி சர்ச்சைகளும், விமர்சனங்களும் எழுந்த வண்ணம் உள்ளது. தற்போது, மருத்துவமனையின் பிணவறைக்கு அருகில் மருத்துவமனையில் உபயோகப்படுத்தப்பட்ட மருத்துவக் கழிவுகள், குப்பைபோன்றவை திறந்த வெளியில் கொட்டப்பட்டு தேக்கமடைந்துள்ளது.
இவற்றை தரம் பிரித்து அகற்றப்படாமல் ஒட்டுமொத்தமாக ஒரே இடத்தில் குவித்து வைத்துள்ளதால் கடும் துர்நாற்றம் வீசுவதுடன், கொசு உற்பத்தி அதிகரித்து வருகிறது. இதனால், நோயாளிகளுக்குத் தொற்று நோய் பாதிப்பு ஏற்படும் நிலை உள்ளது.
மேலும், அந்தக் குப்பை கழிவுகளை பன்றிகள் கிளறுவதுடன், பிணவறை வரை சுற்றிதிரிவதால், மருத்துவமனை வளாகத்தில் சுகாதாரமற்ற சூழல் நிலவுகிறது. எனவே, பொதுமக்களுக்கும், நோயாளிகளுக்கும் நோய் தொற்று நோய் பாதிப்பும், சுற்றுச்சூழல் மாசு ஏற்படுத்தும் அவல நிலையில் உள்ள மருத்துவக் கழிவுகள், குப்பையை விரைந்து அகற்ற மருத்துவமனை நிர்வாகமும், சென்னை மாநகராட்சி சுகாதார அதிகாரிகளும் உரிய நடவடிக்கையை எடுக்க வேண்டும், என்று பொதுமக்கள் தெரிவிக்கின்றனர்.