மா
ர்கழி மாத அதிகாலையில் வைணவத் திருக்கோயில்களில் திருப்பாவை ஒலிப்பது
வழக்கம். சைவத் திருக்கோயில்களில் திருவெம்பாவை பாடப்படும். இரண்டு சமய நெறிகளும் போற்றுகின்ற மாதமாக மார்கழி அமையும்.
ரமலான் மாதம் முஸ்லிம்களின் நோன்பு மாதம். புனிதவெள்ளியும்- ஈஸ்டர் திருநாளும் வருகின்ற மாதத்தில் கிறிஸ்தவர்கள் சிறப்புப் பிரார்த்தனை களை மேற்கொள்வார்கள். அவரவர் மார்க்கம் சார்ந்த சிறப்பு மாதங்கள் இருப்பதுபோல,
திராவிட இயக்கத்திற்கான சிறப்பு மாதமாக
செப்டம்பர் மாதம் அமைந்துள்ளது.
தலைமுறைகளின் இலட்சியக் கனவைத் தனது தொடர்ச்சியான போராட்ட செயல்பாடுகளால் நிறைவேற்றுகின்ற திராவிட இயக்கத்தின் வரலாற்றில் ஓர் ஆண்டின் 365 நாட்களுமே முக்கியமானவை தான். ஒவ்வொரு நாளிலும் ஒரு முக்கியமான
வரலாற்று நிகழ்வு நிச்சயம் இருக்கும். எனினும், செப்டம்பர் என்பதற்குக் கூடுதல் சிறப்பு உண்டு.
செப்டம்பர் 17- தந்தைபெரியார் பிறந்தநாள். செப்டம்பர் 15- பேரறிஞர் அண்ணா பிறந்தநாள். பெரியார் பிறந்த செப்டம்பர் 17ஆம் நாள்தான் திராவிட முன்னேற்றக் கழகமும் பிறந்தது. இந்த மூன்றையும் இணைத்து முப்பெரும் விழாவாகக் கொண்டாடும் வழக்கத்தை முத்தமிழறிஞர் கலைஞர் உருவாக்கினார். இயக்கத்தின் கொள்கைகளை விளக்கிடும் வகையில் கருத்தரங்கம், கவியரங்கம், பட்டிமன்றம், சொற்பொழிவுகள் என 3 நாட்கள் திராவிடத் திருவிழாவாகக் கொண்டாடும் வழக்கத்தை முத்தமிழறிஞர் கலைஞர் முன்னெடுக்க, முப்பெரும் விழாவை செப்டம்பர் மாதத்தில் கழகம் தொடர்ந்து சிறப்பாகக் கொண்டாடி வருகிறது.
இயக்கத்திற்காக அரும்பாடுபட்ட கழக முன்னோடிகளைப் போற்றும் வகையில் பெரியார்-அண்ணா- கலைஞர்- பாவேந்தர் பெயர்களில்
விருதுகள் வழங்கும் வழக்கத்தையும் முத்தமிழறிஞர் கலைஞர் உருவாக்கினார். விருதுகளை வழங்கிச் சிறப்பிக்கும் வழக்கமும் தொடர்வதுடன் இனமானப் பேராசிரியர் பெயரிலும், கழகத் தலைவர் மு.க.ஸ்டாலின் பெயரிலும் மேலும்
2 விருதுகளும் இந்தப் பட்டியலில் இணைந்துள்ளன.
முப்பெரும் விழா நடைபெறும் நாள் மட்டுமல்ல,செப்டம்பர் மாதத்தின் 30 நாட்களுமே திராவிட மாதம்தான் என்பதை திராவிட இயக்கத்தால் பயன்பெற்று, அந்த நன்றியை மறவாதவர்கள் இணையதளத்தில் தொடர்ந்து பதிவிட்டு
வந்தனர். செப்டம்பர் மாதத்தில் மேற்கொள்ளப்பட்ட திராவிட இயக்கத்தின் முக்கிய முடிவுகள், தலைவர்களின் வாழ்வில் முக்கிய நிகழ்வுகள் உள்ளிட்டவற்றையும் எடுத்துக்காட்டினர்.
கலைஞர் ஆட்சிக்காலத்தில் இரண்டு ரூபாய்க்கு ஒரு கிலோ அரிசி, திராவிட நாயகர் முத்துவேல்
கருணாநிதி ஸ்டாலின் ஆட்சியில் காலை
உணவுத் திட்டம், கலைஞர் மகளிர் உரிமைத் தொகை உள்ளிட்ட பல திட்டங்கள் தொடங்கப்பட்டது செப்டம்பர் 15ஆம் நாள்தான். இன்னும் பல
சிறப்புகளும் திராவிட மாதமான செப்டம்பருக்கு உண்டு.
தலைநகர் சென்னையில் திராவிடக் கட்டடக் கலைக்குரிய முகப்புடன் கோட்டை போலத்
திகழும் தி.மு.க.வின் தலைமை நிலைய அலுவலகமான அண்ணா அறிவாலயம் 1987ஆம் ஆண்டு செப்டம்பர் 16ஆம் நாள்
திறக்கப்பட்டது. 1988ஆம் ஆண்டு செப்டம்பர் முப்பெரும் விழாவின் போதுதான் இந்தியாவே திரும்பிப் பார்க்கும் வகையிலான மகத்தானப் பேரணியுடன் தேசிய முன்னணி தொடக்க விழா நடைபெற்றது. அதே முப்பெரும் விழா நேரத்தில்தான் அறிவாலயத்தில் கலைஞர் அரங்கம்
திறக்கப்பட்டது. 2003ஆம் ஆண்டு செப்டம்பர் 30ஆம் நாளன்று இந்தியாவின் முன்னாள்
குடியரசுத் தலைவர் கே.ஆர்.நாராயணன்
அவர்களால் அறிவாலயத்தில் திராவிட இயக்க வரலாற்றுக் கண்காட்சியான கலைஞர்
கருவூலம் திறந்து வைக்கப்பட்டது.
திராவிட இயக்கம் ஏறத்தாழ 115 ஆண்டுகால வரலாற்றைக் கொண்டது. அதில் திராவிடர்
கழகம் 81 ஆண்டுகால வரலாற்றையும், திராவிட முன்னேற்றக் கழகம் 76 ஆண்டுகால வரலாற்றையும் கொண்டவை. இவை இரண்டுக்கும் அடிப்படையான சுயமரியாதை இயக்கம் நூற்றாண்டைக் கடந்திருக்கிறது. இந்த நெடிய அனுபவத்தின்
வரலாற்றை அடுத்தடுத்த தலைமுறைக்கு உணர்த்த வேண்டிய கடமை உள்ளது. அந்தக் கடமையை நினைவூட்டும் மாதம்தான், திராவிட மாதமான
செப்டம்பர்.
தேநீர்க் கடைப் பேச்சு முதல் மாநாட்டு உரைகள் வரை அனைத்து வகை பரப்புரைகளையும் மேற்கொண்டவை திராவிட இயக்கங்கள். திண்ணைப் பிரச்சாரம், பொதுக்கூட்டம், நாடகம், திரைப்படம், தொலைக்காட்சி எனக் காலத்திற்கேற்ற வகையில் தனது பரப்புரையின் அணுகுமுறையைக் கைக்கொண்டன. புத்தாயிரம் (2000) ஆண்டுக்குப் பிறகு தகவல் தொழில்நுட்பத்தின் அதிவேக வளர்ச்சியும் அதன் பரவலும் ஜென்ஸி எனப்படும் இளம் தலைமுறையினருக்கு புது உலகத்தை உருவாக்கிக் காட்டியிருக்கிறது. அந்த உலகத்திற்குள் பயணித்து, ஒரு நூற்றாண்டைக் கடந்த திராவிட இயக்க வரலாற்றையும் அதன் தாக்கங்களையும் இளம் தலைமுறையினருக்கு உணர்த்த வேண்டிய பணியை மேலும் தீவிரப்படுத்த வேண்டிய
தருணம் இது.
இன்றைய தலைமுறையினர் எதிலும் வேகமாக செயல்படுகின்றனர். அந்த வேகத்திலேயே வரலாற்றின் பக்கங்களை சரியாகக் கவனிக்காமல்
புரட்டிவிடுகின்றனர். களைப்பு தெரியாமல் அவர்கள் வேகமாகப் பயணிக்கும் வகையில் காலத்தின் சாலையில் இருபுறமும் நிழல் தரும் மரங்கள் நிறைந்திருக்கின்றன. தங்கள் மீது வெயில் படாமல் இந்த மரங்களை நட்டது யார்? நமக்கு நிழல் தரும் வகையில் மரங்களை வளர்த்தது யார்?
என்பதை அவர்கள் உணர்வதில்லை.
நிழல் தரும் பாதைக்குக் காரணமானவர்களை மறந்துவிட்டு, வேறு வகையான கவர்ச்சிப் போதைகளுக்கு ஆட்பட்டுவிடுகிறார்கள். அப்படிப்பட்ட தலைமுறையினரை மீட்டெடுக்க வேண்டிய கடமையும் திராவிட இயக்கத்திற்குத்தான் இருக்கிறது.
தி.மு.க என்பது சமுதாய மறுமலர்ச்சிக்கான அரசியல் இயக்கம். பதவியில் இருந்தாலும்
இல்லாவிட்டாலும் அது தமிழ்ச் சமுதாயத்தின் வளர்ச்சிக்குத் தொடர்ந்து பாடுபடும். திராவிட மாதமான செப்டம்பர் மாதம் நம்மை நாமே புதுப்பித்துக் கொண்டு, நம்மைச் சுற்றியுள்ள சமுதாயத்தையும் சரிப்படுத்த வேண்டிய பணிகளைத் தொடங்குவதற்கு ஏற்ற மாதமாகும்.
‘ரீல்ஸ்’ உலகம்தான் ‘ரியல்’ உலகம் என்று வாழ்கிற தலைமுறையினரிடம், எளிமையான முறையில் திராவிட இயக்கக் கொள்கைகளையும், அதன்
சாதனைகளையும், வரலாற்று நிகழ்வுகளையும் எடுத்துச் சொல்லவேண்டிய தேவை அதிகமாக
உள்ளது. ஒரு நிமிடத்தில் ஒரு செய்தியை சொல்லும் குறுங்காணொலிகள், சமூக வலைதளங்கள் வாயிலான உரையாடல்கள், நூலகங்களில் சந்திப்புகள், வாசிப்பு இயக்கங்கள், வீக் எண்ட் எனப்படும் வார இறுதி நாட்களுக்கான செயல்திட்டங்கள் உள்ளிட்ட பல்வேறு வகையிலான பணிகளை இந்த திராவிட மாதத்தில் தொடங்க வேண்டியது கட்டாயமாகிறது.
இளம் தலைமுறையினர் விரும்புகிற வடிவங்களில், அவர்களைச் சென்று சேரக்கூடிய இன்ஸ்டாகிராம், யூ-டியூப், ஷேர்ஷாட் உள்ளிட்ட தளங்களில், அவர்களுக்குப் புரியக் கூடிய சொற்களில் திராவிட இயக்க வரலாற்றையும் சாதனைகளையும் வெளிப்படுத்த வேண்டும். அவர்களை ஈர்க்க வேண்டும். எதையும் எளிதில் புரிந்து கொள்ளக்கூடியவர்களாக- ஒளிவுமறைவின்றிப் பேசக்கூடியவர்களாக உள்ள இளந்தலைமுறையினரிடம் உண்மை வரலாற்றைச் சொல்லிப் புரியவைத்தால், திராவிடத்தை நோக்கிய அவர்களின் தேடல் கூடும். அப்போது அவர்களிடையே மொழிப்பற்று, சமூக நீதி, மாநில உரிமை உள்ளிட்ட இலட்சியங்களை விளக்கிட முடியும். கவர்ச்சியை நம்பிய போலியான மாற்றம் தகர்ந்து, புரட்சிகர மாற்றம் நிகழும். திராவிட மாதமான செப்டம்பர் மாதத்தை அந்த உண்மையான மாற்றத்திற்கானத் தொடக்கமாகக் கொண்டு, ஆர்வமுள்ள அனைவரையும் ஒருங்கிணைத்து புதிய பயணத்தைத் தொடங்குவோம்.
பொய்களைப் பரப்பி அதன் மீது பதவி நாற்காலி போட்டு உட்கார்ந்து சுகம் காணும் கூட்டத்திற்கு மாற்றாக, உண்மையைக் கொண்டு
வலுவான அடித்தளத்தைக் கட்ட வேண்டியவர்களாக திராவிட இயக்கத்தவர்கள் இருக்கிறார்கள். கடுமையான அந்தப் பணியைக் களத்தில் செய்ய வேண்டிய பொறுப்பு தி.மு.க.வின் தோள்களில் சுமத்தப்பட்டிருக்கிறது. பெரியார்-அண்ணா-கலைஞர் வகுத்த பாதையில் கழகத் தலைவர்
திராவிட நாயகர் வழிகாட்டுதலில், கழகத்தின் இளம்தலைவர்- -– எதிர்க்கட்சித் தலைவர் துணையுடன் பயணிப்போம்.
இலட்சியம் உயர்வானது. அதை அடைவதற்கானப் பாதை நெடியது. கொள்கை உறுதியுடன் பயணம் தொடரட்டும். வெல்லட்டும்.