சென்னை, செப்.2–
மதுவிலக்கு மற்றும் ஆயத்தீர்வைத்துறையில் பேசுவதற்கு அனுமதி மறுக்கப்பட்டதால் பேரவையில் இருந்து தி.மு.க. உறுப்பினர்கள் வெளிநடப்பு செய்தனர். வெளிநடப்புக்குப் பின் முன்னாள் அமைச்சர் செந்தில் பாலாஜி பேட்டியளிக்கையில், தி.மு.க. மீது பொய்யான தகவல்களை த.வெ.க. அரசு பரப்பி வருகிறது என்றும், த.வெ.க. அமைச்சர்களின் பொய் குற்றச்சாட்டுகளுக்கு பதில் கொடுக்க அனுமதி மறுக்கப்படுகிறது என்றும், தி.மு.க. ஆட்சியில் டாஸ்மாக் நிர்வாகம் வெளிப்படைத்தன்மையுடன் சிறப்பாக செயல்பட்டது என்றும் குறிப்பிட்டார்.
சட்டப்பேரவையில் இருந்து வெளிநடப்பு செய்த பின் முன்னாள் அமைச்சர் கே.என்.நேரு கூறுகையில், அமைச்சர் அவர்கள் பேசுகின்றபோது பொய் பேசுகிறார்கள். பார்ட்டி பண்ட் என்று சொன்னாங்க. அதற்கு விளக்கம் சொல்ல நாங்கள் கேட்டதற்கு சபாநாயகர் அனுமதி தரவில்லை. அந்தத் துறையின் முன்னாள் அமைச்சர் உங்களுக்கு பேட்டி அளிப்பார்.
முன்னாள் அமைச்சர் செந்தில் பாலாஜி செய்தியாளர்களுக்கு அளித்த பேட்டி வருமாறு:–
மதுவிலக்கு மற்றும் ஆயத்தீர்வை மானியக் கோரிக்கையில் அந்தத் துறையின் அமைச்சர் பதிலுரையில் தன்னுடைய உரையின்போது, பார்ட்டிபண்ட் என்று பொத்தாம் பொதுவாக சொல்வதைப்போல ஒரு கருத்தை முன்வைத்து அதனை சட்டமன்றத்தில் பதிவு செய்தார்கள். அது குறித்து நாங்கள் உரிய விளக்கங்களை எழுப்புவதற்கு அனுமதி கேட்டபோது பேரவைத் தலைவர் அனுமதி தர மறுத்துவிட்டார். அதனால் திராவிட முன்னேற்றக் கழகத்தின் சார்பில் நாங்கள் வெளிநடப்பு செய்தோம்.
ஒரு துறையினுடைய அமைச்சர் பேசுகின்றபோது உரிய ஆதாரங்களோடு அந்தக் கருத்துக்களை முன்வைக்க வேண்டும். அதற்கு மாறாக நான் யாரையும் குறிப்பிட்டுச் சொல்லவில்லை என்று பொத்தாம் பொதுவாக சொல்வதைப்போல சட்டமன்றத்தில் ஒரு கருத்தை பதிவு செய்வது ஏற்புடையது அல்ல.
பார்ட்டிபண்ட் என்று பொத்தாம் பொதுவாக ஒரு கருத்தை முன்வைக்கும் போது, ஒரு உண்மைக்கு மாறான பொய்யான தகவலை சட்டமன்றத்தில் பதிவு செய்தார். அதற்கு மறுப்பு தெரிவிக்க பேரவைத் தலைவர் அனுமதி கொடுக்கவில்லை.
இன்றைய துறையில் குறிப்பாக மது விலக்குத் துறையில் கூடுதல் சிறப்பு ரிமை கட்டணம் என்ற பெயரில் மதுபான உற்பத்தியாளர்களிடமிருந்து அந்தக் கட்டணத்தை நிர்ணயம் செய்து, அதன் மூலம் வரக்கூடிய தொகையை டாஸ்மாக் நிர்வாகத்திற்கு கூடுதல் வருவாய் வந்ததாக அந்த கருத்தை முன்வைக்கி ன்றார்.
ஒரு அரசு, அந்தத் துறையை நிர்வகிக்கின்ற போது சில நேரங்களில், விற்பனைக்கான கட்டணத்தை மதுவின் விலையை உயர்த்துகின்றபோது வருவாய் அதிகரிக்கும். இந்த த.வெ.க. அரசு விலையை உயர்த்தாமல் சிறப்புரிமை கட்டணம் என்ற பெயரில் அதற்கான கட்டணத்தை நிர்ணயம் செய்து, வசூல் செய்திருக்கின்றார்கள்.
அதன் மூலம் டாஸ்மாக் நிர்வாகத்தின் வருவாயை அதிகரித்து இருக்கிறார்கள். அதற்கு அவர்கள் புதிய பெயரை வைக்கின்றார்கள். இதற்கெல்லாம் முன்பாக பார்ட்டி பண்ட் என்ற பெயரில் யாரோ ஒருவர் வசூல் செய்ததைப்போல அது எங்கேயோ சென்றதைப்போல ஒரு தோற்றத்தை உருவாக்கு
கிறார்கள்.
நிச்சயமாக அதுபோன்ற தவறு இருந்தால் இந்த அரசு நடவடிக்கை எடுத்திருக்கலாம். அதற்கு மாறாக தி.மு.க. அரசு மீதும் எங்கள் நிர்வாகத்தின் மீதும் பல்வேறு குற்றச்சாட்டுகளை சொல்வதைப்போல, இது உண்மைக்கு மாறான பொய்யான கருத்துகளை தொடர்ந்து இதுபோன்ற கருத்துக்களை த.வெ.க. அரசு செய்வதை முன்னெடுப்பதை நாங்கள் வன்மையாக கண்டிக்கின்றோம். பேரவையில் இதற்கான விளக்கத்்தை அளிப்பதற்கு பேரவைத் தலைவர் அனுமதி கொடுக்கவில்லை. இதனால் நாங்கள் வெளிநடப்பு செய்திருக்கின்றோம்.
இவ்வாறு முன்னாள் அமைச்சர் செந்தில் பாலாஜி பேட்டியளித்தார்.