செஞ்சி, செப். 3 –
விழுப்புரம் வடக்கு மாவட்டம் செஞ்சி சட்டமன்றத் தொகுதி தி.மு.க. நிர்வாகிகள் ஆலோசனைக் கூட்டம் செஞ்சியில் உள்ள தமிழ் திருமகன் திருமண மண்டபத்தில் நடைபெற்றது.
கூட்டத்திற்கு விழுப்புரம் வடக்கு மாவட்ட அமைத்தலைவர் டாக்டர் சேகர் தலைமை தாங்கினார். ஒன்றிய செயலாளர்கள் நெடுஞ்செழியன், விஜயராகவன், பச்சையப்பன், சாந்தி சுப்ரமணியன், நாராயணமூர்த்தி, அனந்தபுரம் நகர செயலாளர் சம்பத் ஆகியோர் முன்னிலை வகித்தனர். செஞ்சி கிழக்கு ஒன்றிய செயலாளர், ஒன்றிய பெருந்தலைவர் விஜயகுமார் அனைவரையும் வரவேற்றார்.
கூட்டத்தில் விழுப்புரம் வடக்கு மாவட்ட செயலாளர், முன்னாள் அமைச்சர் செஞ்சி மஸ்தான் கலந்து கொண்டு பல்வேறு ஆலோசனைகளை வழங்கி சிறப்புரையாற்றினார்.
கூட்டத்தில் அவர் பேசுகையில்:
கழகத் தலைவர் மு.க.ஸ்டாலின்அவர்களின் அறிவுறுத்தலின்படி கழக நிர்வாக சீரமைப்பு தீர்மானத்தின் படி ஒன்றிய, நகர, பேரூர் கழகம் மறு சீரமைப்பு பணிகள் மேற்கொள்ளப்பட உள்ளது.
அந்த வகையில் 45 வயதுக்கு உட்பட்ட புதிய உறுப்பினர்களை கழகத்தில் சேர்ப்பதற்கு தி.மு.க. நிர்வாகிகள் தங்களது பணியை தீவிரப்படுத்த வேண்டும். இந்த இயக்கத்தை இன்னும் 200 ஆண்டுகளுக்கு வழி நடத்த வேண்டும். தி.மு.க. நிர்வாகிகள் கூடுதலாக கவனம் செலுத்தி தங்களது வீட்டில் உள்ள பிள்ளைகளை தி.மு.க. இயக்கத்தில் உறுப்பினராக சேர்க்கும் பணியை செய்ய வேண்டும்.
மேலும் தலைமைச் செயற்குழு கூட்டத்தில் கழக நிர்வாக சீரமைப்பு தீர்மானத்தின்படி ஒன்றிய, நகர, பேரூர் கழகம் மறு சீரமைப்பு பணிகள் 200 சதவீதமாக எந்த ஒரு தொய்வும் இல்லாமல் பணி நடைபெறுவதற்கு உறுதிமொழி எடுத்துக் கொள்வதாக விழுப்புரம் வடக்கு மாவட்டச் செயலாளர் – முன்னாள் அமைச்சர் செஞ்சி மஸ்தான் தெரிவித்தார்.
கூட்டத்தில் முன்னாள் மத்திய அமைச்சர் செஞ்சி இராமச்சந்திரன், முன்னாள் சட்டமன்ற உறுப்பினர்கள் சேதுநாதன், செந்தமிழ்ச் செல்வன், தலைமை தீர்மானக் குழு உறுப்பினர் செஞ்சி சிவா, மாவட்ட இளைஞரணி அமைப்பாளர் ஆனந்த், மாவட்ட கவுன்சிலர் அரங்க ஏழுமலை, பொதுக்குழு உறுப்பினர் மணிவண்ணன், பேரூராட்சி மன்ற தலைவர் மொக்தியார் அலிமஸ்தான், ஒன்றிய துணை பெரும் தலைவர்கள் ஜெயபாலன், விஜயலட்சுமி முருகன், மாவட்ட மகளிர் அணி அமைப்பாளர் திலகவதி, மாணவரணி அமைப்பாளர் பிரசன்னா உள்ளிட்ட ஒன்றிய, பேரூர் கழக நிர்வாகிகள், ஊராட்சி, வார்டு கழக நிர்வாகிகள் கலந்துகொண்டனர். செஞ்சி நகர செயலாளர் கார்த்திக் நன்றி கூறினார்.