சென்னை, செப். 4–
கச்சத்தீவை நாங்கள்
(தி.மு.க.) கொடுக்கவில்லை, அவர்கள் (காங்கிரஸ்) கொடுத்தது என்றும் கச்சத்தீவை மீட்க கலைஞர் பேரவையில் பல தீர்மானங்களை நிறைவேற்றினார் என்றும் சட்டபேரவையில் கழக கொறடா எ.வ.வேலு விளக்க மளித்து பேசினார்.
சட்டப்பேரவையில் கச்சத்தீவு பிரச்சினை பற்றி அமைச்சர் நிர்மல்குமார் பேசியதற்கு பதிலளித்து கழகக் கொறடா எ.வ.வேலு பேசியதாவது:
பேரவைத் தலைவர் அவர்களே கச்சத்தீவைப் பொறுத்தவரை இந்த மாமன்றத்தில் பலமுறை விவாதித்திருக்கிறோம். கச்சத்தீவை கொடுத்தது என்பது அப்போது காங்கிரஸ் பேரியக்கத்தினுடைய தலைவியாக இருந்த பிரதமர் இந்திராகாந்தி அவர்களால் கொடுக்கப்பட்டது.
அது கொடுத்தது தவறு – கலைஞர் முதலமைச்சராக இருக்கும் பொழுதே இதே மாமன்றத்தில் பலமுறை நாங்கள் தீர்மானத்தை நிறைவேற்றி, மீட்டெடுக்க வேண்டும் என்று நாங்கள் சொல்லி இருக்கிறோம்.ஆனால் கச்சத்தீவை நாங்கள் கொடுக்கவில்லை. அவர்கள்தான், கொடுத்துவிட்டார்கள்.
இந்த விஷயத்தில் ஒன்றிய அரசை ஒட்டித்தான் மாநில அரசாங்கம் பல்வேறு கருத்துகளை பரிமாறிக் கொள்கிறோம். மீண்டும் நாம் கச்சத்தீவை அவர்களிடத்தில் கேட்டோம். ஆனால் இதுவரைக்கும் கிடைக்கவில்லை. அதுதான் உண்மை!
இவ்வாறு கழகக் கொறடா எ.வ.வேலு பேசினார்.