மதுரை, செப். 4 –
மதுரை மீனாட்சி அம்மன் கோவில் கும்பாபிஷேக அழைப்பிதழில் அறங்காவலர்கள் பெயர்களை சேர்க்காதது குறித்த வழக்கில் கோவில்கள் விவகாரத்தில் அரசியல் செய்வதை ஏற்க முடியாது என மதுரை உயர்நீதிமன்றம் கருத்து தெரிவித்தது.
கும்பாபிஷேக விழா!
மதுரை மீனாட்சி அம்மன் கோவில் அறங்காவலர் குழு உறுப்பினர் சுப்புலட்சுமி, மதுரை உயர்நீதிமன்றத்தில் தாக்கல் செய்த மனுவில் கூறியிருந்ததாவது :-–
மதுரை மீனாட்சி- சுந்தரேசுவரர் கோவிலின் அறங்காவலர் குழு உறுப்பினராக உள்ளேன். மீனாட்சி அம்மன் கோவில் கும்பாபிஷேகம் வருகிற 17–-ந்தேதி நடக்கிறது. இதற்கான அழைப்பிதழில் அறங்காவலர் குழுவினர் பெயர்களை சேர்க்காதது சட்டவிரோதம். எனவே கும்பாபிஷேக பணிகளில் நாங்கள் சட்டப்பூர்வ கடமைகளை நிறைவேற்ற அனுமதிக்கும்படி உத்தரவிட வேண்டும்.
இவ்வாறு மனுவில் கூறி
யிருந்தார்.
இந்த வழக்கு நீதிபதி சரவணன் முன்பு நேற்று முன்தினம் விசாரணைக்கு வந்தது.
அரசியல் காழ்ப்புணர்ச்சி!
அப்போது மீனாட்சி அம்மன் கோவில் அறங்காவலர் குழு தலைவர் ருக்மணி பழனி வேல்ராஜன் மற்றும் அறங்காவலர் மீனா ஆகியோர் சார்பில் வக்கீல் திலக்குமார் ஆஜராகி, தற்போதைய கும்பாபி ஷேக விழாவில் அறங்காவலர்கள் குழுவினரை புறக்கணிப்பது சட்டவிரோத நடவடிக்கையாகும்.
அரசியல் காழ்ப்புணர்ச்சியின் காரணமாக இதுபோன்ற நடவடிக்கைகளில் ஈடுபடுவது எதிர்காலத்தில் தவறான முன்உதாரணமாக அமையும். எனவே மீனாட்சி
அம்மன் கோவில் கும்பாபிஷேக விழா வருகிற 6-ந்தேதி தொடங்கி 17-ந் தேதி வரை நடக்கிறது. இந்த விழாக்களில் அறங்காவலர்கள் குழுவினரிடம் உரிய ஆலோசனை நடத்தியே ஒவ்வொரு முடிவுகளையும் அதிகாரிகள் எடுக்க வேண்டும். கும்பாபிஷேக விழா தொடர்பான கல்வெட்டுகளில் அறங்காவலர்கள் பெயரை கண்டிப்பாக சேர்க்க வேண்டும் என உத்தரவிட வேண்டும்.
இவ்வாறு அவர் வாதாடினார்.
பின்னர் அரசு தரப்பில்வக்கீல் பாலசுப்பிரமணியம் வாதிடுகையில், இந்த விவகாரத்தில் உயர் அதிகாரிகளின் பங்கு எதுவும் இல்லை. கோவில் செயல் அலுவலர் தன்னிச்சையாக முடிவு எடுத்து இருக்கிறார் என்றார்.
கல்வெட்டில் பெயர்!
அதற்கு நீதிபதி, மீனாட்சி அம்மன் கோவில் கும்பாபிஷேக அழைப்பிதழில் அறங்காவலர்கள் பெயரை சேர்க்காதது தவறு. இந்த விவகாரத்தில் அறநிலையத்துறை மீதான நம்பிக்கையை சீர்குலைக் கும் வகையில் அதிகாரிகளின் செயல்பாடுகள் உள்ளன. கோவில்கள் விவகாரத்தில் அரசியல் செய்வதை ஏற்க முடியாது. இந்த கும்பாபிஷேகம் முடிந்த பின்பு கோவிலில் வைக்கப்படும் கல்வெட்டில் அறங்காவலர்கள் பெயர் இடம்பெறவேண்டும்.
இவ்வாறு நீதிபதி உத்தரவிட்டு வழக்கை முடித்துவைத்தார்.