ஒட்டன்சத்திரம், செப்.7–
திண்டுக்கல் மாவட்டம், ஒட்டன்சத்திரம் வட்டம், விருப்பாட்சியில் செய்தி மக்கள் தொடர்புத்துறையின் சார்பில் அமைக்கப்பட்டுள்ள விடுதலைப் போராட்ட வீரர் கோபால் நாயக்கர் மணிமண்டபத்தில் 225-ஆவது நினைவு தினத்தை முன்னிட்டு திண்டுக்கல் மேற்கு மாவட்ட செயலாளர் அர.சக்கரபாணி எம்.எல்.ஏ. கோபால்நாயக்கரின் திருவுருச்சிலைக்கு மாலைஅணிவித்து
மரியாதை செலுத்திய பின்பேசியதாவது.
விருப்பாட்சியை 40 ஆண்டுகள் ஆட்சி செய்து வெள்ளை ஏகாதிபத்தித்தால் தூக்கிலிடப்பட்ட, தமிழ்நாட்டின் மிகப் பெரிய விடுதலைப் பேராட்ட வீரர் குப்பளப் பாட்சா என்று திப்புசுல்தானாலும், கோபால் நாயக்கர் என்று மக்களாலும் அன்புடன் அழைக்கப்பட்டவர் திருமலை குப்பளசின்னப்ப நாயக்கர். விருப்பாட்சியைச் சுற்றிலும் தன்னுடைய உறவினர்களை கொண்டு பல ஊர்களை உருவாக்கி ஆண்டு வந்தார்.
வெள்ளையர் ஆதிக்கத்தை எதிர்த்து திண்டுக்கல் பகுதியில் போரிட்டவர் விருப்பாட்சி கோபால் நாயக்கர். இவர் சிவகங்கைராணி வேலுநாச்சியார், பாஞ்சாலங்குறிச்சி ஊமைத்துரை ஆகியோருக்கு தேவையான பாதுகாப்பையும், படை பலத்தையும் வழங்கியவர். கடந்த 05.09.1801ம் ஆண்டு, நாட்டின் விடுதலைக்காக உயிர் தியாகம் செய்த கோபால்
நாயக்கரின் நினைவாக கடந்த திமுக ஆட்சியில் 2006-2011 ஆண்டில் விருப்பாட்சியில் ரூ.69 இலட்சம் மதிப்பீட்டில் அவர்களின் முழு உருவச் சிலையுடன் கூடிய மணிமண்டம் தமிழக அரசு சார்பில் அனுமதி வழங்கப்பட்டு, பின்னர் 20.02.2013 அன்று திறந்து வைக்கப்பட்டது. மேலும், விடுதலைப் போராட்ட வீரர் கோபால் நாயக்கரின் நினைவு தினம் அரசு விழாவாக கொண்டாடப்பட்டு வருகிறது.
இந்திய திருநாட்டின் நலனுக்காக பாடுபட்ட தலைவர்கள் வழியில், நாமும் செயல்பட்டு, நாட்டின் நலனை காப்பாற்ற இந்நாளில் உறுதி எடுத்துக்கொள்வோம் என அர.
சக்கரபாணி எம்.எல்.ஏ பேசினார்.
இந்நிகழ்ச்சியில் வேடசந்தூர் சட்டமன்ற உறுப்பினர் எஸ்.டி.சாமிநாதன், ஒன்றியசெயலாளர்கள் தர்மராஜன், தங்கம்.எஸ்.ஆர்.கே.பாலு வீரபாண்டிய பண்பாட்டுக் கழகமாநில பொதுச் செயலாளர் ராம
கிருஷ்ணன், கோபால்நாயக்கர் சேவாசங்கதலைவர் செந்தில்குமார்,
ஒன்றிய இளைஞரணி அமைப்பாளர் அசோக் வேலுச்சாமி, ம.தி.மு.க. மாவட்டச் செயலாளர் தமிழ்வேந்தன், ஊர் தலைவர் செந்தில்நாதன், மாவட்ட தகவல் தொழில்நுட்ப அணி அமைப்பாளர் தினேஷ், முன்னாள் ஊராட்சி மன்ற துணைத் தலைவர் கௌரி சரவணன் உள்ளிட்ட பொதுமக்கள் கலந்துகொண்டனர்.