#Title

முதன்மைச் செயலாளர் கே.என்.நேரு இல்லத்தில் சோதனை! காழ்ப்புணர்ச்சியின் உச்சத்திற்கே சென்ற த.வெ.க. அரசு! கழகத் துணைப் பொதுச் செயலாளர் கனிமொழி கருணாநிதி எம்.பி. கண்டனம்!

சென்னை, செப். 7 –

‘‘கழக முதன்மைச் செயலாளரும் முன்னாள் அமைச்சருமான கே.என்.நேரு அவர்கள் இல்லத்தில் லஞ்ச ஒழிப்புத் துறையை ஏவி விட்டு சோதனை நடத்தும் த.வெ.க. அரசு காழ்ப்புணர்ச்சியின் உச்சத்திற்கே சென்றுள்ளது’’ என்று கழகத் துணைப் பொதுச் செயலாளர் கனிமொழி கருணாநிதி எம்.பி. கண்டனம் தெரிவித்துள்ளார்.

முதலமைச்சர் விஜய் தலைமையிலான த.வெ.க. அரசு பதவியேற்றது முதல், மக்கள் நலப்பணிகளில் கடுகளவுக்கூட கவனம் செலுத்தாமல் எதிர்கட்சிகளை பழிவாங்கும் நடவடிக்கைகளில் தொடர்ந்து ஈடுபட்டு வருகிறது. சட்டப்பேரவையில் அலறவிடும் எதிர்கட்சித்தலைவர் உதயநிதி ஸ்டாலினை, விஜயால் சமாளிக்க முடியவில்லை. இதனால் ஆத்திரமடைந்த விஜய், சட்டமன்ற கூட்டத்தொடர் தொடங்குவதற்கு முதல்நாளன்று எதிர்க்கட்சித் தலைவர் உதயநிதி ஸ்டாலினை கைது செய்து அவரை முடக்க நினைத்தார். இருப்பினும், நீதிமன்றத்தின் குட்டு காரணமாக, உதயநிதி ஸ்டாலின் விவகாரத்தில் த.வெ.க. அரசு பின்வாங்கியது. இந்நிலையில், த.வெ.க. அரசின் அரசியல் பழிவாங்கும் நடவடிக்கையாக முன்னாள் அமைச்சர் கே.என்.நேருவுக்கு சொந்தமான இடங்களில் DVAC சோதனை நடத்தி வருகிறது.

இதேபோன்று, எதிர்க்கட்சி துணைத்தலைவர் கே.என்.நேரு உள்ளிட்டோரும்த.வெ.க. அமைச்சர்களுக்கு உடனுக்குடன் பதிலடி கொடுத்து வருவதால் அவரை முடக்கும் நோக்கிலும் DVAC சோதனையை த.வெ.க. அரசு ஒரு கருவியாக பயன்படுத்தி வருகிறது.

இதுகுறித்து அவர் தமது சமூக வலைதளத்தில் பதிவிட்டிருப்பதாவது:–

சட்டமன்றத்தில் தி.மு.கழகத்தை அரசியல் ரீதியாக எதிர்கொள்ள முடியாமல், தொடர்ந்து அவதூறுகளையும் திசைதிருப்பல் நாடகங்களையும் அரங்கேற்றி வந்த தவெக அரசு, தற்போது காழ்ப்புணர்ச்சியின் உச்சத்திற்கே சென்று, கழக முதன்மைச் செயலாளரும் சட்டமன்ற எதிர்க்கட்சித் துணைத் தலைவருமான கே.என்.நேரு அவர்களைப் பழிவாங்கப் பார்க்கிறது.

மிரட்டல்களுக்கும் சோதனைகளுக்கும் பணிந்து போகும் இயக்கம் தி.மு.கழகம் அல்ல. எதிர்க்கட்சியின் குரல்வளையை நெரிப்பதற்காக, அதிகாரத்தைத் தவறாகப் பயன்படுத்தும் இந்த ஜனநாயக விரோத த.வெ.க. அரசின் நடவடிக்கைகளைப் பார்த்து தி.மு.கழகம் ஒருபோதும் அஞ்சாது.

இவ்வாறு கனிமொழி கருணாநிதி எம்.பி. தமது சமூக வலை தளத்தில் பதிவிட்டுள்ளார்.