சென்னை, செப். 7–
“கொள்கைத் தெளிவில்லாத
த.வெ.க. அரசுடன் தேர்தல் கூட்டணியாக உருவெடுக்க இடதுசாரிகள் உடன்பட வேண்டாம்” என்று பொதுப் பள்ளிக்கான மாநில மேடை பொதுச் செயலாளர் பு.பா.பிரின்ஸ் கஜேந்திரபாபு வேண்டுகோள் விடுத்துள்ளார்.
இதுகுறித்து அவர் விடுத்துள்ள அறிக்கை வருமாறு:–
கொள்கையில் தெளிவாக உள்ளதாக தனது செயல்பாடுகள் மூலம் மாநிலத்தில் ஆட்சிப் பொறுப்பேற்றக் கட்சி வெளிப்படுத்த முயலாத சூழலில், ஆளும் கட்சியுடன் தேர்தல் அரசியல் கூட்டணி அமைக்க இடதுசாரி கட்சிகளுக்கு அவசியம் எழவில்லை.
இடதுசாரி கட்சிகளின் ஒருங்கிணைப்பை வலுப்படுத்தி, மேலும் சில ஜனநயாக சக்திகளை இணைத்துக் கொண்டு இடது ஜனநாயக முன்னணியாக வலுப்பெறுவதையே மக்கள் விரும்புகின்றனர்.
ஒன்றிய ஆட்சிப் பொறுப்பில் மாற்றம் வேண்டும் என்று அகில இந்திய அளவில் மக்கள் விரும்புகின்றனர். வலுவான அரசியல் கூட்டணியே தற்போது ஒன்றியத்தில் ஆட்சிப் பொறுப்பில் இருக்கும் வலதுசாரி சித்தாந்தத்தை வீழ்த்த உதவும். அதற்கேற்ற தேர்தல் வியூகங்களை அமைக்க வேண்டிய கடமை அகில இந்திய அளவில் இடதுசாரி கட்சி களுக்கு உள்ளபடியால் தமிழ்நாடு மாநிலத்தில் அதற்கேற்ப முடிவுகள் அமைவது அவசியம்.
அபாயத்தை
உணராத மாநில அரசு!
தமிழ்நாடு அரசை நிர்வகிக்கின்ற பொறுப்பை ஏற்றுள்ள கட்சி மக்களாட்சி மாண்புகளை காத்திடவும், அரசின் நிதியில் இயங்கும் பள்ளிக் கல்வி, உயர் கல்வி நிறுவனங்களை காப்பதிலும், சமமான கற்றல் வாய்ப்பை அனைவருக்கும் உறுதி செய்யவும் எந்த நடவடிக்கையும் மேற்கொள்ளவில்லை. நிதிநிலைஅறிக்கையிலும், துறைசார்ந்த கொள்கை குறிப்பிலும் அதற்கான எந்த அறிவிப்பும் வெளியிடவில்லை. அதற்கு நேர் மாறாக, தற்போது உள்ள பாகுபாடுகளை நிலைநிறுத்தி, மேலும் பாகுபாடுகளை அதிகரிக்கும் வகையில் திட்டங்கள் அறிவிக்கப்
பட்டுள்ளது.
ஒன்றிய அரசின் திட்டங்களின் விளைவாக, பள்ளி தொடங்கி பல் கலைக்கழகம் வரை மிகப் பெரும் அச்சுறுத்தலை, நாடு எதிர்கொண்டுவரும் சூழலில், இன்றுவரை மாநிலத்தின் ஆட்சிப் பொறுப்பில் இருப்பவர்கள் அபாயத்தை உணரவில்லை என்பதை அவர்களின் அணுகுமுறை வெளிப்படுத்துகிறது.
இடதுசாரிகள் தெளிவான
பதிலை பெறாதது ஏன்?
செப்டம்பர் 4, 2026 அன்று இடதுசாரி கட்சித் தலைவர்களை சந்தித்த பின்னர் அமைச்சர் ஒருவர் கூறியதாக பத்திரிகையில் வெளியான செய்தியில் வட்டாட்சியர் நடவடிக்கை, உயர் கல்வித் துறை அனுப்பி சுற்றறிக்கை என்ற அளவில் மட்டுமே பேசியுள்ளனர். தலைமைச் செயலாளர் தலைமையில் நடந்த சட்டம் ஒழுங்கு ஆய்வுக் கூட்ட விவாதக் குறிப்பு குறித்து அவர்கள் கவனத்தில் எடுத்து அதன் மீது மக்களாட்சியில் தேர்ந்தெடுக்கப்பட்ட அரசின் கொள்கை வழிகாட்டுதல் என்னஎன்ற தெளிவான பதிலை கூறவில்லை.
விக்சித் பாரத் சிக்க்ஷா ஆதிஷ்டான் மசோதா, 2025 நிறைவேறி, சட்டம் நடைமுறைக்கு வந்தால் பாதிக்கப் படும் அரசுக் கல்லூரி மாணவர்கள் மிகப் பெரும் போராட்டத்தில் ஈடுபடுவார்கள், அதை தடுக்கவே, ஒன்றிய அரசு பல்வேறு வழிகாட்டுதல்களை மாநில அரசுகளுக்கு வழங்கி வருகிறது என்பதை மக்களால் உணர
முடிகிறது.
தமிழ்நாட்டில் ஜூலை 28, 2026 அன்று நடந்த சட்டம் ஒழுங்கு ஆய்வுக் கூட்டத்தில் உயர் கல்வித் துறை, பள்ளிக் கல்வித் துறை, காவல்துறை, மாவட்ட நிர்வாகம் ஆகியவற்றின் கூட்டு நடவடிக்கைக்கு தலைமைச் செயலாளர் வழிகாட்டுதல்களை முன்வைத்து, விவாதக் குறிப்பில் இடம்பெற்றதாக கூறப்படும் கருத்தின் அடிப்படையில் பொதுத் துறைச் சுற்றறிக்கை அனைத்துத் துறைகளுக்கும் அனுப்பப்பட்டதாக தெரியவருகிறது.
ஆட்சியாளர்கள்
வெளிப்படுத்தாதது ஏன்?
விவாதக் குறிப்பில் இடம்பெற்றதாக வெளிப்படும் கருத்து, மக்களாட்சி மாண்புகளுக்கு முற்றிலும் எதிரானது, அடிப்படை உரிமைகளை மறுக்கும், போராட துணிந்தால் அடக்குமுறை பயன்படுத்த காவல்
துறைக்கு முழு அதிகாரத்தையும் வழங்கும் கருத்து.
ஜூலை 28, 2026 நடந்த சட்டம் ஒழுங்கு கூட்டத்தின் விவாதக் குறிப்பு குறித்து மாநில அமைச்சரவை மேற்கொண்ட நடவடிக்கைகள் என்ன? அரசின் கொள்கை முடிவுகளை மேற்கொள்ள வேண்டிய அமைச்சரவை இந்த விவகாரத்தில் எத்தகைய முடிவுகளை மேற்கொண்டு உள்ளது? என்பதை இதுநாள் வரை ஆட்சிப் பொறுப்பில் உள்ளவர்கள் வெளிப்படுத்தவில்லை.
பல்வேறுதுறைகளில் அமைச்சரவையின் அணுகுமுறை கவலை தருவதாக உள்ளது.
மக்களாட்சி மாண்புகளுக்கு மதிப்பளித்து, கூடுதல் எண்ணிக்கை பெற்ற கட்சிக்கு ஆதரவளித்து ஆட்சி அமைக்க வழிவகை செய்வதே மக்களுக்கு மக்களாட்சி மீது உள்ள நம்பிக்கைக்கு வலுசேர்க்கும் என்ற அடிப் படையில் இடதுசாரி கட்சிகள் உள்ளிட்ட கட்சிகள் தங்களின் ஆதரவை வழங்கிட வேண்டும் என்று தேர்தல் முடிவுகளுக்கு பின்னர் பொதுப் பள்ளிக்கான மாநில மேடை கோரி இருந்தது.
தற்போது உள்ள சூழலில், ஆதரவு அளிக்கும் கட்சிகள் அரசியல் கூட்டணியாக உருவெடுக்க வேண்டிய அவசியமில்லை. ஒன்றியத்தில் ஆட்சி மாற்றம் ஏற்பட அகில இந்திய அளவில் கூட்டணிகள் அமைவது அவசியம்.
இந்திய நாட்டின் ஒற்றுமையையும், விடுதலைப் போராட்ட உணர்வுகளை உள்வாங்கி உருவாக்கப்பட்டு, இன்றுவரை நடைமுறையில் உள்ள இந்திய அரசமைப்புச் சட்டத்தையும் காத்திட வேண்டிய பொறுப்பு விடுதலைக்காக பாடுபட்ட இடதுசாரி கட்சி களுக்கு கூடுதலாக உள்ளது.
தமிழ்நாடு மாநிலத்தில் அரசுக்கு ஆதரவு அளிக்கும் கட்சிகள் தற்போது தேர்தல் கூட்டணியாக உருவெடுக்க இடதுசாரி கட்சிகள் உடன்பட வேண்டாம் என்று பொதுப் பள்ளிக்கான மாநில மேடை கோருகிறது.
அரசு நிதியில் இயங்கும் பள்ளிகள் முதல் பல்கலைக்கழகங்கள் வரை முழு கல்வியியல் சுதந்திரத்துடன் இயங்குவதை உறுதிசெய்ய வலுவான மக்கள் போராட்டத்தை இடதுசாரி கட்சிகள் முன்னெடுக்க வேண்டும் என்று பொதுப் பள்ளிக்கான மாநில மேடை கோருகிறது.
இவ்வாறு பு. பா. பிரின்ஸ் கஜேந்திர பாபு தமது அறிக்கையில் கூறியுள்ளார்.