#Title

கடையநல்லூர் தொகுதி – மேற்கு தொடர்ச்சி மலைப்பகுதியில் வனவிலங்குகளால் விவசாய நிலங்கள் பாதிக்கப்படுவதை தடுக்க அரசு முன்வருமா? சட்டப்பேரவையில் தி.மு.இராசேந்திரன் பேச்சு!

சென்னை, செப். 7 –

கடையநல்லூர் தொகுதியில் மேற்கு தொடர்ச்சி மலைப் பகுதியில் வன விலங்குகளால் விவசாய நிலங்கள் பாதிக்கப்படுவதை தடுக்க அரசு முன் வருமா? என சட்டப் பேரவையில்தி.மு.இராஜேந்திரன் கேள்வி எழுப்பினார்.

இது குறித்து பேரவையில் நடைபெற்ற விவாதம் வருமாறு:

தி.மு.இராசேந்திரன்: கடையநல்லூர் தொகுதி, மேற்கு தொடர்ச்சி மலைப் பகுதிகளில் வனவிலங்கு களால் விவசாய நிலங்கள் பாதிக்கப்படுவதைத் தடுக்க அரசு முன்வருமா?

ஆம் எனில், எப்போது?

அமைச்சர் ரா.வீ.இரஞ்சித் குமார்: விவசாய நிலங்களைப் பாதுகாக்க கடையநல்லூர் சட்டமன்றத் தொகுதிக்குட்பட்ட மேற்கு தொடர்ச்சி மலை அடிவாரப் பகுதிகளில் வனவிலங்குகள் விவசாய நிலங்களுக்குள் வராமல் தடுப்பதற்கு ரூபாய் 1 கோடியே 50 இலட்சம் செலவில் வன எல்லையோரம் 20 கிலோ மீட்டர் தூரத்திற்கு சூரிய ஆற்றலில் இயங்கும் மின்வேலி அமைக்கப்பட்டுள்ளது.

மனிதர்களுக்கும் காட்டுப் பன்றிகளுக்கும் இடையே ஏற்படும் மோதல்களை தடுக்க திறம்பட கையாளும் வகையில் வனப் பகுதிகளை சுற்றி யுள்ள விவசாயப் பயிர்களை காட்டுப் பன்றிகள் சேதப்படுத்துவதைத் தடுப்பதற்காக விரிவான நிலையான செயல்பாட்டு நடைமுறைகள் வகுக்கப்பட்டு, நடைமுறைப்படுத்தப்பட்டுள்ளன.

தி.மு.இராசேந்திரன்: உங்களை இரண்டாம் சபாநாயகர் செல்லபாண்டியனாக பார்க்கிறேன். அப்படியென்றால், முதல் சபாநாயகர் செல்லபாண்டியன் உங்களுக்குத் தெரியுமா என்று கேட்டால், நான் பயின்ற மேலநீலிதநல்லூரில் உள்ள பசும்பொன் முத்துராம லிங்க தேவர் கல்லூரியோடு அவர் தொடர்புகொண்டவர். அடிக்கடி அவரைச் சந்தித்து பேசுகிற வாய்ப்பு எனக்கு கிடைத்தது உண்டு. அதுகுறித்து, உரியநேரத்தில் எனது உரை அமைகிறபோது பதிவுசெய்வேன் என்பதைத் தெரிவித்துக்கொள்கிறேன்.

கடையநல்லூர் தொகுதியில் வனவிலங்குகளின் நடமாட்டத்தால் வேளாண்மை பாதிக்கப்படுவது குறித்த எனது கேள்விக்கு தக்க விளக்கமளித்த வனத் துறை அமைச்சர் அவர்களுக்கு எனது நன்றியைத் தெரிவித்துக்கொள்கின்றேன். எனது கோரிக்கையுடன்கூடிய வினா என்னவென்றால்,கடந்த மூன்று ஆண்டுகளுக்கு முன்பு எல்லோரும் பார்த்திருப்போம். கோவை -– -பாலக்காடு இரயில் வழித்தடத்தில், இரயில் மோதி பல யானைகள் இறந்துகிடந்தன. அன்றைய முதலமைச்சர் தலைவர் மு.க. ஸ்டாலின் அவர்கள், விரைந்து நடவடிக்கை மேற்கொண்டு கோவை-–பாலக்காடு வழித்தடத்தில் மனித-யானை மோதல் நிகழாமலும், இரயில்-யானை மோதல் நிகழாமலும் தடுப்பதற்கு 13 கிலோ மீட்டர் தூரம், இந்திய வனத் துறைச் சரித்திரத்திலேயே முதன் முறையாக முழு கோபுரங்களை அமைத்து, 24 மணிநேர கண்காணிப்பில் இயங்கக்கூடிய அதற்கு ஒரு கட்டுப்பாட்டு அறையையும் அமைத்தார்கள். இந்த மூன்றாண்டு காலங்களில் அங்கு யானை- மனித மோதல் நிகழவில்லை என்றும், யானை-இரயில் மோதல் நிகழவில்லை என்றும் தகவல்கள் கிடைக்கப்பெறுகின்றன. வனத் துறை அமைச்சர் அவர்கள் தமிழ்நாடு அரசு, அந்தத் திட்டம் சிறப்பாக இயங்குகிறதா என்பதை ஆய்வுசெய்து, இயங்குகிறது எனில் அதை முதற்கட்டமாக எங்கள் கடையநல்லூர் தொகுதியிலும், தென்காசி மாவட்டத்தில் 80 கிலோ மீட்டர் தூரமிருக்கின்ற மேற்கு தொடர்ச்சி மலை அடிவாரப் பகுதியிலும் அமல்படுத்துவதற்கு தமிழ்நாடு அரசு முன்வருமா என்பதையும் கேட்டுக்கொள்கிறேன்.

காட்டுப் பன்றிகளின் தொல்லையால் விவசாயம் சீர்குலைந்தி ருக்கிறது; இயற்கை இடர், விளைச்சல் இன்மை, மழையின்மை, விலையின்மை ஆகிய நான்கு காரணிகள்தான் வேளாண்மைக்கு இடையூறாக இருக்கின்றன என்று சொன்னால், ஐந்தாவது காரணியாக சில ஆண்டுகளாகக் காட்டுப் பன்றிகள் வனப் பகுதிகளில் மட்டுமல்லாமல், சமவெளிப் பகுதிகளிலும் வந்து வேளாண்மையைச் சீர்குலைக்கும் அவலம் நேர்ந்திருக்கிறது. விவசாயிகளிடம் கேட்கும்போது அவர்கள் முன்வைக்கும் ஒரே கோரிக்கை, காட்டுப் பன்றிகளை வனவிலங்குகளின் பட்டியலிலிருந்து அகற்றிவிட்டால் அதை நாங்களே அப்புறப்படுத்துவோம் என்பதுதான். ஆகவே, அரசு இந்த இரண்டு கோரிக்கைகளையும் நிறைவேற்ற, காட்டுப் பன்றிகளை வனவிலங்குகளின் பட்டியலிலிருந்து அகற்றுவதற்கு ஒன்றிய அரசிற்குத் தேவையான அழுத்தங்களைக் கொடுக்குமா என்பதை அறிய விரும்புகிறேன்.

அமைச்சர் ரா.வீ.இரஞ்சித் குமார்: நம்முடைய தமிழ்நாட்டில் 23,188 சதுர கிலோ மீட்டர் வனப் பகுதி உள்ளது; சுமார் ஆயிரக்கணக்கான கிராமங்களில் வனத்தையொட்டிய விவசாய நிலங்கள் உள்ளன. இந்தக் காட்டுப்பன்றிப் பிரச்சினை யால் தமிழ்நாடு முழுவதும் உள்ள விவசாய நிலங்கள் அதிகமாகப் பாதிக்கப்படுவது உண்மைதான்; அதற்கு விதிகள் உள்ளன. ஒரு கிலோ மீட்டர், இரண்டு கிலோ மீட்டர் வரை வெளியே வந்தால் வன அலுவலர்களிடம் தெரிவித்தால், அவர்கள் அதை காட்டிற்குள் விரட்டி அனுப்புவார்கள். மூன்று கிலோ மீட்டர் தூரம் வெளியே வந்தால் அதைச் சுடுவதற்கும் நம்முடைய தமிழக அரசு வனத் துறைச் சட்டத்தில் இடம் இருக்கிறது என்பதை இந்த அவையில் தெரிவித்துக்கொள்கிறேன்.

தி.மு. இராசேந்திரன்: வனத் துறை அமைச்சர் அவர்கள் கூறியது, கடந்த திராவிட மாடல் அரசில் தலைவர் திரு. மு.க. ஸ்டாலின் அவர்கள் வழங்கிய அந்த உத்தரவுதான் தற்போது நடைமுறையில் இருக்கிறது. நீங்கள், காட்டுப் பன்றிகளை விலங்குகளின் பட்டியலிலிருந்து-- கரடி, சிங்கம், புலி இவையெல்லாம் விலங்குகளின் பட்டியலில் உள்ளன, அதை மனிதர்கள் அகற்ற முடியாது; அதுபோலவே, வேளாண்மையை அழிக்கின்ற காட்டுப் பன்றிகளும் அந்த வனவிலங்குகளின் பட்டியலில் இருப்பதால், அதை விவசாயிகளால் அப்புறப்படுத்த முடியாத நெருக்கடி உள்ளது. ஆகவே, காட்டுப் பன்றிகளை வனவிலங்குகளின் பட்டியலிலிருந்து அகற்றுங்கள் என்கிற அழுத்தத்தை ஒன்றிய அரசிற்குத் தமிழ்நாடு அரசு கொடுத்து, அந்தப் பட்டியலிலிருந்து எடுத்துவிட்டால், வேளாண்மைக்கு இருக்கின்ற பெரும் துயர் நீங்கும் என்பதைத் தெரிவித்து, தமிழ்நாடு அரசு அதற்கு ஆவன செய்யுமா என்பதைத் தங்கள் மூலமாக அறிய விரும்புகிறேன்.

அமைச்சர் ரா.வீ.இரஞ்சித் குமார்: நம்முடைய தமிழக அரசு வனத் துறை உயர் அதிகாரிகளுடன் ஆலோசித்து பரிசீலிக்கப்படும் என்பதை இந்த நேரத்தில் தெரிவித்துக்கொள்கிறேன்.

இவ்வாறு விவாதம் நடை பெற்றது.

கரூர் அரசு மகளிர் மற்றும் கலைக் கல்லூரி, பொறியியல் கல்லூரி, கல்வியியல் கல்லூரி குழுமத் தலைவர் பேராசிரியர் முனைவர் பி.நடேசன் தலைமையில் பேராசிரியர், முனைவர் பொன்.கதிரேசன் ஏற்பாட்டில் நடைபெற்ற பன்னாட்டு ஆசிரியர்கள் தின விழா,நூல் வெளியீட்டு விழா மற்றும் முப்பெரும் விழாவில், கழக மாற்றுத்திறனாளிகள் அணி மாநிலத் தலைவரும்,தமிழ்நாடு மாற்றுத்திறனாளிகள் முன்னேற்ற சங்க தலைவருமான ரெ.தங்கம் அவர்களுக்கு மாற்றுத்திறனாளிகளுக்கு சேவை பணியாற்றியமைக்காக விருது வழங்கி சிறப்பிக்கப்பட்டது. கல்லூரி குழுமத்தின் செயலாளர் என்.கண்ணன், ஆசிரியர்கள், பேராசிரியர்களும், அரசு அதிகாரிகளும், எழுத்தாளர்களும், அறிஞர்களும் பங்கேற்றனர். சிறப்பாக செயலாற்றிய பேராசிரியர் களுக்கும், ஆசிரியர்களுக்கும், விருதுகள் வழங்கி சிறப்பிக்கப்பட்டது.