சென்னை, செப்.8–
பெரம்பலூர் மண்ணில் திராவிட முன்னேற்றக் கழகத்தின் வளர்ச்சிக்காகத் தன் வாழ்நாளை அர்ப்பணித்த குன்னம் சி.இராஜேந்திரன் அவர்கள் என்று கழகத் தலைவர் மு.க. ஸ்டாலின் அவர்கள் வெளியிட்டுள்ள இரங்கல் செய்தியில் குறிப்பிட்டுள் ளார்.
இதுகுறித்து கழகத் தலைவர் மு.க.ஸ்டாலின் அவர்கள் வெளியிட்டுள்ள இரங்கல் செய்தி வருமாறு:–
பெரம்பலூர் மண்ணில் திராவிட முன்னேற்றக் கழகத்தின் வளர்ச்சிக்காகத் தன் வாழ்நாளை அர்ப்பணித்த குன்னம் சி. இராசேந்திரன் அவர்கள் மறைவெய்தினார் என்ற செய்தியறிந்து மிகுந்த அதிர்ச்சியும் வேதனையும் அடைந்தேன்.
பெரம்பலூர் மாவட்டக் கழகச் செயலாளராகப் பொறுப்பேற்று, அந்த மாவட்டத்தின் பட்டிதொட்டியெங்கும் கழகத்தின் இருவண்ணக் கொடி பட்டொளி வீசிட உழைத்தவர். கழகத்தின் கொள்கைகளையும் இலட்சியங்களையும் மக்களிடம் கொண்டு சேர்ப்பதிலும், கழகத் தோழர்களை அரவணைத்து ஒருங்கிணைப்பதி லும் சிறப்புறச் செயல்பட்டு, கழகத்தை வளர்த்தவர்.
பெரம்பலூர் மாவட்ட ஊராட்சிக் குழுத் தலைவராக மக்களுக்குப் பணியாற்றிய அவர், பின்னர் கழகத்தின் வர்த்தகர் அணி துணைச் செயலாளராகவும் தனது பணியைத் தொடர்ந்தார். பொறுப்புகள் மாறினாலும் அவரது பற்றும் உழைப்பும் ஒருநாளும் மாறியதில்லை.
கழகமே தன் குடும்பம்; கழகப் பணியே தன் கடமை என்ற உணர்வோடு இயங்கிய அவரது மறைவு ஈடுசெய்ய முடியாத பேரிழப்பாகும்.
கழகப் பணிகள் குறித்து அவர் பகிர்ந்துகொண்ட எண்ணங்களும், கழகத்தின் மீது அவர் கொண்டிருந்த உறுதியான பற்றும் என் நினைவில் என்றும் நிலைத்திருக்கும்.
குன்னம் சி.இராசேந்திரன் அவர்களை இழந்து வாடும் அவரது குடும்பத்தினர், உறவினர்கள், நண்பர்கள், பெரம்பலூர் மாவட்டக் கழகத்தினர் உள்ளிட்ட அனைவருக்கும் எனது ஆழ்ந்த இரங்கலையும் ஆறுதலையும் தெரிவித்துக் கொள்கிறேன்.
இவ்வாறு கழகத் தலைவர் மு.க.ஸ்டாலின் அவர்கள், வெளியிட்டுள்ள இரங்கல்செய்தியில் குறிப்பிட்டுள்ளார்.