தேனி, செப். 8 –
தேனி மாவட்டம் ஆண்டிபட்டி ஜக்கம்பட்டி மற்றும் டி.சுப்புலாபுரம் பகுதிகளில் கைத்தறி மற்றும் பிடல் தறி இல்லாமலேயே, இருப்பதாக போலியாக கணக்கு காட்டி, நெசவாளர்கள் பெயரில் பல கோடி ரூபாய் மோசடி நடந்துள்ளதாக புகார் எழுந்துள்ளது. நேர்மையான அதிகாரிகள் இருக்கும் நேர்மையான ஆட்சியில் இது எப்படி கண்டுகொள்ளாமல் இருந்து வருகிறது என பொதுமக்கள் கேள்வி எழுப்பியுள்ளனர்.
100-க்கும் மேற்பட்ட தறிகள் இயங்கிய பகுதி:
ஆண்டிபட்டி, டி.சுப்புலாபுரம் பகுதிகளில் 100-க்கும் மேற்பட்ட கைத்தறி மற்றும் பிடல் தறி இயங்கி வந்தன. நூற்றுக்கணக் கான குடும்பங்கள் இதனை நம்பி வாழ்ந்து வந்தன.
தறி இல்லாமல் உற்பத்தி செய்ததாக மோசடி:
ஆனால் மைனாரிட்டி த.வெ.க. ஆட்சியில் நடந்ததாக கூறப்படும்மோசடியில், உண்மையில் கைத்தறி,பிடல் தறி இல்லாத நபர்கள், தங்கள் வீட்டில் தறி இருப்பதாகவும், துணி உற்பத்தி செய்வதாகவும் போலி ஆவணங்கள் தயாரித்துள்ளனர்.
- உற்பத்தியே செய்யாமல், உற்பத்தி செய்ததாக கணக்கு காட்டி, அரசிடம் இருந்து நூல் மானியம், ஊக்கத்தொகை, இலவச மின்சார மானியம், கூட்டுறவு சங்க கடன்
தள்ளுபடி என ஒரு நபருக்கு லட்சக்கணக்கில் பணம் பெறப்பட்டுள்ளது.
- இப்படி பல நபர்கள் மூலம் பல கோடி ரூபாய் அரசு பணம் சுருட்டப்பட்டுள்ளதாக நெசவாளர்கள் குற்றம் சாட்டுகின்றனர்.
நேர்மையான அதிகாரிகள்
கண்டுகொள்ளாதது ஏன்?
தமிழகத்தில் நேர்மையான ஆட்சி நடைபெற்று வருவதாகவும், மாவட்டத்தில் நேர்மையான அதிகாரிகள் பணியாற்றி வருவதாகவும் கூறப்படும் நிலையில், இவ்வளவு பெரிய மோசடி எப்படி கண்டுகொள்ளாமல் விடப்பட்டது என்பது பொதுமக்களின் கேள்வியாக உள்ளது.
கைத்தறி துறை அதிகாரிகள் முறையாக கள ஆய்வு செய்திருந்தால், தறி இல்லாத இடத்தில்
தறி இருப்பதாகவும், உற்பத்தி இல்லாத இடத்தில் உற்பத்தி நடப்பதாகவும் காட்டப்பட்ட போலி கணக்குகள் வெளிச்சத்திற்கு வந்திருக்கும் என சமூக ஆர்வலர்கள் தெரிவிக்கின்றனர்.
கோரிக்கை:
எனவே இது குறித்து மாவட்ட ஆட்சியர் நேரடியாக தலையிட்டு, ஆண்டிபட்டி, டி.சுப்புலாபுரம் பகுதியில் உள்ள ஒவ்வொரு நெசவாளர் வீட்டிற்கும் சென்று தறி உள்ளதா? உண்மையில் உற்பத்தி நடக்கிறதா? என ஆய்வு செய்ய வேண்டும்.
போலியாக பணம் பெற்றவர்கள் மீது நடவடிக்கை எடுத்து, அந்த பணத்தை மீட்டு உண்மையான நெசவாளர்களுக்கு வழங்க
வேண்டும் என்பதே அனைவரின் எதிர்பார்ப்பு.