சட்டமன்றத்தில் சட்டமன்ற விதிகளுக்கு முரணாக முதலமைச்சர் பேசிய கருத்துக்களை அவை குறிப்பில் இருந்து நீக்க வேண்டும் என்று கோரிக்கை வைத்த திமுக சட்டமன்ற உறுப்பினர்களை அவை காவலர்களை விட்டு வலுக்கட்டாயமாக வெளியேற்றிய சட்டப்பேரவைத் தலைவர் நடவடிக்கை கண்டித்து மனிதநேய ஜனநாயக கட்சி
சட்டமன்ற உறுப்பினர்
தமிமுன் அன்சாரி சட்டமன்றத்தில் இருந்து வெளிநடப்பு செய்தார்.
அவர் அவைக்கு வெளியே செய்தியாளர் களிடம் கூறியதாவது:
நேற்று சட்டமன்றத்தில் காவல்துறை மானிய கோரிக்கையில் மாண்புமிகு முதலமைச்சர் அவர்கள் பேசும் பொழுது மானிய கோரிக்கைக்கு சம்பந்தமில்லாத பல விஷயங்கள் பேசப்பட்டது, குறிப்பாக சர்க்காரியா கமிஷன் குறித்தும் மிசா சட்டம் குறித்தும்முதலமைச்சர் பேசியதால் தி.மு.க. சட்டமன்ற உறுப்பினர்கள் அதனை எதிர்த்தனர்,
நேற்று பேச வாய்ப்பு கிடைக்காததால் இன்று பேச வாய்ப்பு கேட்டனர்.
அந்த வாய்ப்பின் போது முதலமைச்சர் பேசிய சட்ட விதிகளுக்கு முரணான கருத்துக்களை அவைக் குறிப்பில் இருந்து நீக்க வேண்டும் என்று கோரிக்கை வைத்தனர்.
குறிப்பாக மிசா குறித்து முதலமைச்சர் பேசியதை நீக்கி இருக்க வேண்டும், சர்க்காரியா கமிஷன் பற்றி ஏற்கனவே சட்டமன்றத்தில் பலமுறை பேசப்பட்டு விட்டது, குறிப்பாக சர்க்காரியா கமிஷன் குறித்து முன்னாள் முதலமைச்சர் எம்ஜிஆர் அவர்களிடம்அப்போது கேட்டபோது, எனக்கு எதுவும் தெரியாது வழக்கறிஞர் சொன்னதைத்தான் சொன்னேன் என்று கூறியிருந்தார், பின்னர் அந்த வழக்கு நிரூபிக்கப்படவில்லை.
இது போன்ற நிரூ பிக்கப்படாத ஒன்றை, வழக்கில் சம்பந்தப்பட்டவர்கள் நிரபராதி என்று சொல்லப்பட்ட ஒன்றை, குறிப்பாக மறைந்த முன்னாள் முதல்வரை கலங்க படுத்தியிருப்பது என்ன நியாயம், எனவே இது போன்ற சட்ட விதிகளுக்கு முரணான கருத்துக்களை நீக்க வேண்டும் என்று தி.மு.க. சட்டமன்ற உறுப்பினர்கள் கோரிக்கை வைத்தனர், அதை நீக்கி இருந்தால் எந்த பிரச்சினையும் இல்லை, அதனை நீக்காத தால் தான் தி.மு.க. உறுப்பினர்கள் தர்ணா செய்தனர் , தர்ணா செய்வது என்பது ஜனநாயக நடைமுறை , இது தவறானது அல்ல, இது ஜனநாயகத்தில் அனுமதிக்கப்பட்ட ஒரு அம்சம், அந்த நேரத்திலாவது சட்டப் பேரவைத் தலைவர் அவர்கள் நீங்கள் உட்காருங்கள் மீண்டும் பரிசீலிக்கிறேன். அதனை அவை குறிப்பில் இருந்து நீக்குகிறேன் என்று என்று ஒரு வாய்ப்பு தந்திருக்கலாம், ஆனால் சட்டப் பேரவைத் தலைவர் அவர்கள் தி.மு.க. சட்டமன்ற உறுப்பினர்களின் கருத்துக்களை ஏற்க மறுத்து அவர்களை அவையில் இருந்து வெளியேற்ற சொன்னது நல்ல நடைமுறை அல்ல, எனவே சட்டப் பேரவைத் தலைவரின் இந்த நடவடிக்கையை கண்டித்து மனிதநேய ஜனநாயக கட்சி சார்பில் நான் வெளிநடப்பு செய்துள்ளேன். இவர் அவர் கூறினார்.