திருவள்ளூர் செப் 11;-
திருவள்ளூர் மத்திய மாவட்டம், பூவிருந்தவல்லி கிழக்கு ஒன்றிய திமுக நிர்வாகிகளுக்கான மறுசீரமைப்பு கலந்தாய்வுக் கூட்டம், ஒன்றியக் கழகச் செயலாளர் ப.ச.கமலேஷ் ஏற்பாட்டில் சென்னீர்குப்பத்தில் நடைபெற்றது.
கூட்டத்தில் திருவள்ளூர் மத்திய மாவட்டக் கழகச் செயலாளரும், முன்னாள் அமைச்சருமான ஆவடி சா.மு.நாசர் பங்கேற்று, கழகக் கிளைகளின் மறுசீரமைப்பு பணிகள் குறித்து நிர்வாகிகளுக்கு விரிவான ஆலோசனைகளை வழங்கினார். தொடர்ந்து, நிர்வாக மறுசீரமைப்புக்கான படிவங்களை நிர்வாகிகளிடம் வழங்கி, பணிகளை விரைந்து நிறைவு செய்யுமாறு அறிவுறுத்தினார்.
கூட்டத்தில் பேசிய ஆவடி சா.மு.நாசர், ஆட்சியின் தோல்விகளை மறைப்பதற்காக தரம் தாழ்ந்த விமர்சனங்களையும், கொச்சையான பேச்சுகளையும் முன்வைப்பதை மக்கள் ஏற்றுக்கொள்ள மாட்டார்கள் என்று தெரிவித்தார்.
நடிகர் விஜயின் தரம் தாழ்ந்த பேச்சைக் கண்டித்து திருவள்ளூரில் நடைபெறவுள்ள மாபெரும் கண்டன ஆர்ப்பாட்டத்தில் பூவிருந்தவல்லி கிழக்கு ஒன்றியத்தின் சார்பில் கழக நிர்வாகிகளும், தொண்டர்களும் பெருந்திரளாக பங்கேற்க வேண்டும் என்றும் அவர் கேட்டுக்கொண்டார்.
தொடர்ந்து தமிழக அரசை விமர்சித்த அவர், தேர்தலுக்கு முன்பு மக்களிடம் ஏராளமான வாக்குறுதிகளை அள்ளி வீசி, ஆட்சிக்கு வந்த பின்னர் அவற்றை நிறைவேற்றாமல் கிடப்பில் போட்டுள்ளதாக குற்றம்சாட்டினார்.
“மக்களை ஏமாற்றி, விளம்பரங்களாலும் ரீல்ஸ்களாலும் ஆட்சிக்கு வந்துவிடலாம்; ஆனால் மக்களின் வாழ்க்கையை ஏமாற்ற முடியாது. மக்கள் அனைத்தையும் கவனித்துக் கொண்டிருக்கிறார்கள். உரிய நேரத்தில் தங்களது தீர்ப்பை வழங்குவார்கள்” என்ற கருத்தை வலியுறுத்திய அவர், பொதுமக்களின் நலனில் அக்கறையின்றி செயல்படும் இந்த ஆட்சிக்கு மக்கள் விரைவில் முடிவு கட்டுவார்கள் என தெரிவித்தார்.
திமுக நிர்வாகிகள் அனைவரும் தற்போது நடைபெற்று வரும் நிர்வாக மறுசீரமைப்புப் பணிகளை விரைந்து முடிக்க வேண்டும். ஒவ்வொரு கழகக் கிளையையும் வலுப்படுத்தி, புதிய நிர்வாகிகளை உருவாக்கி, அடிப்படைக் கட்டமைப்பை மேலும் உறுதிப்படுத்த வேண்டும்.
கழகத்தின் கொள்கைகளையும், திமுக அரசின் சாதனைகளையும் மக்களிடம் தொடர்ந்து எடுத்துச் செல்ல வேண்டும். மக்கள் பிரச்சினைகளில் முன்னின்று குரல் கொடுத்து, மக்களோடு மக்களாக நின்று பணியாற்ற வேண்டும். வலுவான கழகக் கட்டமைப்புடன் களப்பணியாற்றி, மீண்டும் திமுகவை ஆட்சியில் அமரச் செய்ய அனைவரும் முழு ஈடுபாட்டுடன் செயல்பட வேண்டும் என ஆவடி சா.மு.நாசர் கேட்டுக்கொண்டார்.