புதுக்கோட்டை, செப்.12
காலை உணவு விரிவாக்க திட்டத்திற்கு பெருந்தலைவர் காமராஜர் காலை உணவுத் திட்டம் என பெயர் மாற்றம் செய்து அதற்கான பெயர் பலகை அமைப்பதற்கு நிதி ஆதாரம் எதுவும் வழங்காத நிலையில் தலைமையாசிரியர்கள் உடனடியாக பெயர்பலகை வைத்து புகைப்படத்தினை அனுப்ப வேண்டும் என்று அதிகாரிகள் உத்தரவிடுவது ஆசிரியர்களுக்கு வேதனையை தருகிறது என தமிழ்நாடு தொடக்கப்பள்ளி ஆசிரியர் மன்ற மாநில பொதுச் செயலாளர் மன்றம் நா.சண்முகநாதன் அறிக்கை விடுத்துள்ளார்.
இது குறித்து அவர் விடுத்துள்ள செய்திக் குறிப்பில் கூறியுள்ளதாவது:
தமிழ்நாடு முழுவதும் அனைத்து பள்ளிகளிலும் பள்ளி மேலாண்மை குழு மறு கட்டமைப்பு செய்ய பெற்றோர் விழிப்புணர்வு கூட்டம் நடத்த வேண்டும். அதனைத் தொடர்ந்து மறு கட்டமைப்பு கூட்டம்நடத்த வேண்டும். புதிய பொறுப்பாளர்களை தேர்ந்தெடுக்க வேண்டும் என கூறி விடுமுறை நாட்களிலும் கூட்டம் நடத்துவது, பார்வையாளர்களாக தொலைதூரத்தில் உள்ள பள்ளிகளுக்கு ஆசிரியர்களை நியமிப்பது போன்ற செயல்களில் ஆசிரியர்களை தொடர்ந்து விடுமுறை நாளில் பணியில் ஈடுபடுத்துவது ஏற்புடையது அல்ல. இது ஆசிரியர்கள் மத்தியில் பெரும் பதற்றத்தினை உருவாக்கி உள்ளது.
அது மட்டுமல்லாமல் காலை உணவு விரிவாக்க திட்டத்திற்கு பெருந்தலைவர் காமராஜர் காலை உணவுத் திட்டம் என பெயர் மாற்றம் செய்ததை வரவேற்கிறோம்.அதே வேலையில் அதற்கான பெயர் பலகை அமைப்பதற்கு நிதி ஆதாரம் எதுவும் வழங்காத நிலையில் தலைமையாசிரியர்கள் உடனடியாக பெயர்பலகை வைத்து புகைப்படத்தினை அனுப்ப வேண்டும் என்று அதிகாரிகள் உத்தரவிடுவது வேதனையை ஏற்படுத்தி உள்ளது.
கடந்த ஆட்சியில் பெயர் பலகை நிறுவும் செலவினை உள்ளாட்சி அமைப்புகள் ஏற்றுக்கொண்டன.
தற்போது ஆசிரியர்கள் தனது சொந்த செலவில் பெயர்ப்பலகை அமைப்பது என்பது ஆசிரியர்களுக்கு மன உளைச்சலை ஏற்படுத்தி உள்ளது எனவே தமிழக அரசு உடனடியாக அதற்கான நிதி ஆதாரம் பற்றி தெளிவாக அறிவிக்க வேண்டும் என தனது அறிக்கையில் கூறியுள்ளார்.