மு
தல்வரான பிறகும் சட்டசபையில் நடிப்பை
உடல்மொழியால் தொடர்கின்ற நடிகர்,
பழைய ஈக வரலாற்றை ஒருவகையில்
நினைவுபடுத்த வைத்துவிட்டார்.
அரசியலில் வளர்ந்தபிறகு ஒருவேளை நடிகர் உணரக்கூடும், “மு.க.ஸ்டாலின் மேல் கை வைத்தது எவ்வளவு பெரிய தவறு “ என்று !
பொதுமக்களுக்குத் தி.மு.க.வினர் மேல் வருத்தம் இருக்கலாம். மு.க.ஸ்டாலின் மேல் அப்படி எந்த வருத்தமும் மக்களுக்கு இல்லை.
தளபதி மு.க.ஸ்டாலின் மிசாவில் கைதாகவில்லை எனத் தேன்கூட்டில் கைவைத்து விட்டார்கள். அவரின் மிசா காலச் சித்திரவதை வாழ்வைக் கொச்சைப்படுத்துவது அறியாமை .
நெருக்கடி நிலை (மிசா) கொடிய வரலாற்றைத் தெளிவு படுத்தும் நூல்களும் உண்டு ; நேரடிப் பாதிப்போடு நம்மோடு வாழ்பவர்களும் உண்டு.
நெருக்கடிநிலை ‘மிசா’ என்னும்
அன்றைய இருண்ட காலம் குறித்து,
ஒவ்வொருவருக்கும் வெவ்வேறு
நினைவுகளும் உண்டு.
நான் அப்போது சென்னை சைதாப்பேட்டை ஆசிரியர் கல்லூரியில் பயின்று கொண்டிருந்தேன். ஆசிரியர் கல்லூரிச் செயலராகவும் இருந்தேன்.
நான் கைதாகி விட்டதாகத் தவறாகக் கேள்விப்பட்டு , செந்தலை என்னும் தஞ்சை மாவட்டச் சிற்றூரிலிருந்து அலறிஅடித்து என்தந்தையார் ஓடிவந்ததெல்லாம் மறந்துபோன துயர வரலாறு.
நெருக்கடி நிலைக்கு எதிராக இருந்ததாகப் பேராசிரியர் ந.சஞ்சீவி, பேரா.இரா.கணேசன், புலவர் சரவணத்தமிழன், புலவர் பொன்னிவளவன், புலவர் ஆடலரசு முதலிய பலரும் பணிநீக்கம் செய்யப்பட்டார்கள்.
சித்திரவதைக்கு ஆளான உதகைத்தமிழரசன் ( தோழர் ஓவியாவின் தந்தை) முதலான கல்வித்துறையினர் பற்றி யெல்லாம் பேச நூற்றுக்கணக்கான செய்திகள் உண்டு.
அவற்றை நினைவு படுத்தாததால் இந்த இருள் முகங்களின் மதமதப்புப் பேச்சுகளைக் கேட்கும் நிலை இன்று ஏற்பட்டுவிட்டது.
யார் நண்பர் , யார் உளவாளி என
அறியமுடியாத சூழல் அன்றைக்கு இருந்தது.
தி.மு.க. வேடம் போட்டுப் பலன்அனுபவித்த பலர்,
‘தேசிய ஆசிரியர் பேரவை’ போன்ற புதிய புதிய வேடம் போட்டு நெருக்கடி நிலைக்கு வாழ்த்துப் பாடிய வரலாறெல்லாம் உண்டு.
இனியாவது அவற்றையெல்லாம் நினைவுபடுத்தத்தான் வேண்டும்.
தமிழ்நாட்டு அரசுவெளியீடான ‘தமிழரசு’ இதழில் ஸ்ரீ, ஸ்ரீமதி என வெளிப்படையாகப் பயன்படுத்தினார்கள் !
திராவிடம், தமிழ் எல்லாம் முடிவுக்கு வந்துவிட்டன என்பதைப்போல எத்தனையெத்தனைக் கொடுமைகளை ஆட்டம் போட வைத்தார்கள்.
இனியாவது எல்லாவற்றையும்
தூசிதட்டிக் காட்டவேண்டும்.