சேலம்.செப்.13–
தொழிலாளர்கள், தூய்மை பணியாளர்கள், விவசாயிகள் என அனைத்து தரப்பு மக்களுக்கும் எதிராகவும் தனியாருக்கு ஆதரவாகவும் செயல்படும் இந்த தவெக ஆட்சி விரைவில் தூக்கி எறியப்படும் என்று முன்னாள் அமைச்சர் ராஜேந்திரன் தெரிவித்தார்
போக்குவரத்து கழகத்தை தனியார் மயமாக்கும் தவெக அரசின் நடவடிக்கையை கண்டித்தும், வட மாநில தொழிலாளர்களை பணியில் அமர்த்துவதை கைவிட வேண்டும் என்பது உள்ளிட்ட கோரிக்கைகளை வலியுறுத்தி போக்குவரத்து தொழிலாளர் முன்னேற்ற சங்கத்தின் சார்பில் கண்டன ஆர்ப்பாட்டம் மற்றும் வாயில் கூட்டம் சேலம் ராமகிருஷ்ணா சாலையில் உள்ள சேலம் மண்டல போக்குவரத்து கழக தலைமை அலுவலகம் முன்பு நடைபெற்றது.
போக்குவரத்து தொமுச மண்டல தலைவர் ஸ்ரீதர் தலைமையில் நடைபெற்ற இந்த ஆர்ப்பாட்டத்தில் சேலம் மத்திய மாவட்ட செயலாளரும் முன்னாள் அமைச்சரும்தொமுச சிறப்பு தலைவருமான ராஜேந்திரன்கலந்துகொண்டு சிறப்புரை ஆற்றினார்.
முன்னதாக தொழிலாளர்களை பாதிக்கும் நான்கு தொழிலாளர் சட்ட தொகுப்புகளை ரத்து செய்திட வேண்டும் தொழிலாளர் பாதுகாப்பு சட்டங்களை அமல்படுத்திட வேண்டும் என்று ஒன்றிய பாஜக அரசை வலியுறுத்தியும், போக்குவரத்து கழகத்தை தனியாருக்கு விற்கும் முயற்சியில் ஈடுபடும் தவெக அரசை கண்டித்தும்,அரசு பேருந்துகளின் இயக்கத்தை குறைத்து தனியாருக்கு ஆதரவாக செயல்படும் போக்கினை கண்டித்தும் ஒப்பந்த தொழி லாளர்களை வட மாநிலங்களில் இருந்து பணியில் அமர்த்துவதை நிறுத்திட வேண்டும் என்பது உள்ளிட்ட கோரிக்கைகளை முழக்கங்களாக எழுப்பி தங்களது எதிர்ப்பை வெளிப்படுத்தினர்.
தொடர்ந்து கூட்டத்தில் பேசிய முன்னாள் அமைச்சர் ராஜேந்திரன் தமிழகத்தில் போக்குவரத்து துறையை உருவாக்கியது திமுக என்றும் போக்குவரத்து தொழிலாளர்களுக்கு பல்வேறு சலுகைகளை வழங்கியது கலைஞர் மற்றும் முன்னாள் முதல மைச்சர் மு க ஸ்டாலின் என்று பெருமிதத்தோடு கூறிய அவர் தற்போது உள்ள அரசு அனைத்து தரப்பு மக்களுக்கும் எதிரான அரசாக செயல்பட்டு வருவதாகவும் போக்குவரத்துத் துறை மட்டுமல்லாமல் அனைத்து துறைகளையும் தனியாருக்கு முக்கியத்துவம் அளித்து வரும் தமிழ்நாடு முதலமைச்சர் விஜய் போக்குவரத்து தொழிலாளர்கள் தூய்மை பணியாளர்கள் விவசாயிகள் என அனைத்துதரப்பு மக்களுக்கும் விரோதமான ஆட்சியை நடத்தி வருகிறார் என்றும் இந்த ஆட்சி மக்களின் ஆதரவோடு விரைவில் தூக்கி எறியப்படும் என்று தெரிவித்த அவர் மக்கள் விரோத இந்த ஆட்சி தூக்கி எறியப்படும் நாளே தமிழக மக்களின் பொற்காலம் என்று தெரிவித்தார்.