சென்னை, செப். 15 –
‘‘நடைபெறவிருக்கும் இடைத் தேர்தல்கள் மூலம் ‘டம்மி’ முதலமைச்சருக்கு சரியான பாடத்தைப் புகட்டுவோம்’’ என்று கழக இளைஞர் அணி செயலாளரும் சட்ட மன்ற எதிர்க்கட்சித் தலைவருமான உதயநிதி ஸ்டாலின் அவர்கள் வேளச்சேரி பகுதி இளைஞர் அணி அமைப்பாளர் தினேஷ் திருமணத்தை நடத்தி வைத்து உரையாற்றும் போது கூறினார்.
சென்னை தெற்கு மாவட்டம், வேளச்சேரி பகுதி இளைஞர் அணி அமைப்பாளர் தினேஷ்- – எலிசபெத் மிஷேல் ஆகியோரின் திருமணத்தை, கழக இளைஞர் அணிச் செயலாளரும் சட்டப்பேரவை எதிர்க்கட்சித் தலைவருமான உதயநிதி ஸ்டாலின் நடத்தி வைத்து மணமக்களை வாழ்த்தினார். இதில் கழக முன்னணி யினர் பலரும் கலந்துகொண்டனர்.
மணவிழாவை நடத்தி வைத்து, கழக இளைஞர் அணிச் செயலாளரும் சட்டப்பேரவை எதிர்க்கட்சித் தலைவருமான உதயநிதி ஸ்டாலின் அவர்களின் வாழ்த்துரை வருமாறு :–
இன்று சென்னை தெற்கு மாவட்டம், வேளச்சேரி பகுதி இளைஞர் அணி அமைப்பாளர் சகோதரர் தினேஷ்,
சகோதரி எலிசபெத் மிஷேல் ஆகியோரின் திருமணத்தை, உங்கள் முன்னிலையில் நடத்தி வைப்பதில் மிகுந்த மகிழ்ச்சி அடைகின்றேன். இது நம்முடைய வீட்டுத் திருமணம் என்ற அந்த உரிமையுடன் நாம் அத்தனை பேரும் இந்தத் திருமண நிகழ்ச்சியில் கலந்துகொண்டு மணமக்களை வாழ்த்தி இருக்கின்றோம்.
சிறப்பான பணி
இதில் எங்களுக்குக் கூடுதல் மகிழ்ச்சி என்னவென்றால், கூடுதல் பெருமை என்னவென்றால், மணமகன் தினேஷ் அவர்கள் எங்களுடைய இளைஞர் அணியைச் சேர்ந்த சகோதரர் ஆவார். இளைஞர் அணியில் நிர்வாகி மட்டுமல்ல, மிகச்சிறப்பாகத் தன்னுடைய பணிகளைச் செய்து வருபவர்தான் தம்பி தினேஷ் அவர்கள். அதுமட்டுமல்ல,
இந்தத் திருமணத்தில் பல விசேஷங்கள் இருக்கின்றன, சிறப்புகள் இருக்கின்றன.
கூடுதல் மகிழ்ச்சி என்னவென்றால், இது ஒரு காதல் திருமணம். அதற்கு
முதலில் மணமக்களுக்கு என்னுடைய வாழ்த்துகளைத் தெரிவித்துக்கொள்கிறேன். அதுமட்டுமல்ல, சாதாரண காதல் திருமணம் மட்டுமல்ல, மதம் கடந்து நடக்கும் ஒரு கலப்புத் திருமணம். அதோடு மட்டும் நிற்கவில்லை, இது மாநிலம் கடந்து நடக்கக்கூடிய ஒரு திருமணம்.
பெற்றோர் சம்மதம்
முதலில் திருமணம் என்பதே ஒரு
கடினமான விஷயம். அதில் காதல் திரு மணம் என்பது கூடுதல் கடினம். முதலில் பெண், பையனிடம் காதலைச் சொல்ல வேண்டும். பையன் பெண்ணிடம் காதலைச் சொல்ல வேண்டும். கவர வேண்டும். அவர்களுக்கு நம்பிக்கையைக் கொடுக்க வேண்டும். அவர்களுடைய சம்மதத்தைப் பெற வேண்டும். அதன் பிறகு அவர்களுடைய பெற்றோர்களுடைய சம்மதத்தைப் பெற வேண்டும்.
இவையெல்லாம் முடிந்ததற்கு பிறகு அந்தப் பெண்ணின் சித்தப்பா, மாமா இவர்கள் எல்லாம் கிளம்பி வருவார்கள், சண்டைக்கு வருவார்கள். `அது எப்படி எங்களைக் கேட்காமல் இந்தத் திருமணத்தை நீங்கள் நிச்சயம் செய்தீர்கள்’ என்று கேட்பார்கள். அவர்களைச் சம்மதிக்க வைக்க வேண்டும். இப்படிப் பல கடினமான விஷயங்கள் திருமணங்களில், அதுவும் குறிப்பாகக் காதல் திருமணங் களில் இருக்கின்றன. அதுவும் மாநிலம் கடந்து நடத்தும் ஒரு திருமணம்.
அதுமட்டுமல்ல, மதம் கடந்து நடக்கும் இந்தக்காதல் திருமணத்தைப் பார்க்கும்போது, அவ்வளவு எளிதாக இது நடந்திருக்காது, அவ்வளவு எளிதாக இந்த அனுமதி கிடைத்திருக்காது உங்களுக்கு. அதனால்தான் நம்முடைய வீட்டில் இந்தத் திருமணத்தைப் பாதுகாப்பாக இன்று அவர்கள் திட்டமிட்டு இருக்கிறார்கள். ஆனால் எத்தனை தடைகளையும் தாண்டி இன்றைக்கு இந்தத் திருமணம் மிகச்சிறப்பாக நடந்திருக்கின்றது. தம்பி தினேஷ் அவர்களுக்கும் எலிசபெத் அவர்களுக்கும் என்னுடைய வாழ்த்துகளைத் தெரிவித்துக் கொள்கிறேன்.
நல்ல நண்பர்களாக
வாழ வேண்டும்
இன்று இந்தத் திருமண பந்தத்தில் அடியெடுத்து வைத்திருக்கிறார்கள். எப்படித் திருமணத்திற்கு முன்பு இருவரும் ஒரு சிறந்த நண்பர்களாக இருந்தார்களோ, அதேபோலத் திருமணத்திற்குப் பின்பும் மணமக்கள் இருவரும் நல்ல நண்பர்களாக இருக்க வேண்டும் என்று நம்முடைய வாழ்த்துகளைத் தெரிவித்துக் கொள்கின்றேன்.
இன்றைக்கு நாம் ஒரு மிக மிக முக்கியமான ஒரு காலகட்டத்தில் அடியெடுத்து வைத்திருக்கிறோம். நம்முடைய திராவிட முன்னேற்றக் கழகம் இன்னும் இரண்டு நாளில் முப்பெரும் விழாவைக் கொண்டாட இருக்கின்றது. 76-வது ஆண்டை நிறைவு செய்து, 77-வது ஆண்டில் அடி யெடுத்து வைக்கப் போகிறது நம்முடைய திராவிட முன்னேற்றக் கழகம்.
இந்த 77 ஆண்டுகளில் நம்முடைய இயக்கம் எத்தனையோ வெற்றிகளையும் பார்த்திருக்கின்றது, எத்தனையோ தோல்விகளையும் பார்த்திருக்கிறோம். தேர்தல் வெற்றி, தோல்விகளுக்கெல்லாம் அப்பாற்பட்டு, என்றுமே மக்களோடு நிற்கின்ற இயக்கம், கடந்த 77 ஆண்டுகளாக மக்களோடு நிற்கின்ற இயக்கம்தான் நம்முடைய திராவிட முன்னேற்றக் கழகம்.