பல்லவர் கலைமிளிரப்

பலகாலம் ஆண்டிருந்த

கல்விநகர் காஞ்சியிலே

கைத்தறிக் குடும்பத்தில்

நல்லவர் நாடுறும்

நடராசர் பங்காரு

செல்வமக னாய்ப் பிறந்தீர்!

திசையெலாம் திகைப்புறச்

சொல்லழகும் எழுத்தெழிலும்

துள்ளிவரக் கருத்தாறும்

செல்லுமிடம் எங்கெங்கும்

செந்தமிழர் கிளர்ச்சியுறப்

பல்லாண்டு மண்டிய

பகுத்தறிவுக்கு ஒவ்வாத

ஒல்லாத எண்ணங்கள்

ஓட்டியே அரசியலில்

நல்லாறு காட்டவே

நல்லியக்கம் கண்டவரே!

நில்லாது சுற்றியே

நெடுந்தமிழ் நாடெங்கும்

கல்லாதார் நீங்கிடக்

கற்றவர் ஓங்கிட

இல்லாதார் எப்போதும்

இருப்போராய் மாறிடப்

பொல்லாதார் போய்விடப்

பொறுப்புளோர் ஆண்டிட

வெல்லவே செய்தவர்நீர்!

விழுதுபல விட்டிங்கே

எல்லோர்க்கும் பயனளிக்கும

இயக்கமாய் ஆக்கியவர்

வல்லமையாய் அறுபதாண்டு

வண்டமிழ் நாடாள

நல்லுரம் நீர்அன்றோ!

நாடெங்கும் சீர்அன்றோ!

அண்ணா,நீர் பிறந்ததனால்

அல்லவோ தமிழரிடம்

எண்ணங்கள் மாறின,

எழுச்சிகள் தோன்றின!

கண்மூடி வழக்கங்கள்

காணாமல் போயின!

மண்மூடிப் பலகாலம் மறைந்திருந்த மாண்புகள்

கண்டெடுத்துத் தமிழரிடம்

காலமெலாம் கருத்தோடு

விண்டுரைத்தும் எழுதியும்

விரிவாக விளக்கியும்

தொண்டுநீர் செய்ததனால்

தொல்பெருமை மீண்டது!

குண்டுமழை பொழியாமல்

கூர்வேல் வாள் வீசாமல்

கண்டங்கள் நாடுகள்

கால்கொண்ட அரசுகள்

கொண்டுவந்து காட்டியே

கொள்கைவிதை தூவியதால்

திண்டிருந்து ஆண்டவர்கள். திக்குமுக்கு ஆடினர்

துண்டின்றித் துணியின்றித்

தொலைதூரம் ஓடினர்!

வண்டுகள் தேனெடுக்கும்

வஞ்சம்போல் தமிழ்நாட்டைத்

திண்டமர்ந்த வடநாட்டுத்

திமிங்கிலங்கள் விழுங்கிட

மண்டியிட்டுக் காங்கிரசார்

மானமிழந்து அண்டிட,

சுண்டிவிட்டுத் தமிழரின்

தூக்கத்தைக் கலைப்பதற்கு

வெண்கதிராய்ப் பிறந்தவரே!

வெளிச்சத்தைத் தந்தவரே!

கண்மூடி வாய்பொத்திக்

கைகட்டிக் கால்பற்றித்

தெண்டனிட்ட மக்களுக்குத்

திறனளித்து விட்டவரே!

சிண்டுகள் சூழ்ச்சிகளைச் சிதறடித்துத் தொலைத்தவரே!

பண்டிருந்த பெருமையெலாம்

பலரறிய வைத்தவரே!

ஒண்டவந்த பேர்களெலாம்

உப்பரிகை ஏறிநின்ற

வண்டவாளம் எல்லாமே

வரிவரிப் பட்டியலாய்த்

தண்டவாளம் ஏற்றினீர்;

தன்மானம் போற்றினீர்!

வரலாறு தெரியாமல்

வளைத்துள்ள கூட்டமின்று

அரணாகத் தமிழருக்கு

அமைந்தநல் திராவிடத்தின்

முரணாகப் போகிறது

மூடநிலை ஆகிறது!

தரங்கெட்ட தற்குறிகள்

தன்மானம் அற்றதுகள்

புரட்டுக்கோர் அளவில்லை

பொய்கட்கோ அணையில்லை

மிரட்டலுக்கு எல்லையில்லை

மெய்யென எதுவுமில்லை

இரட்டுற மொழிதலும்

ஈனமாய்ச் செய்தலும்

திரட்டியே திரிகின்ற

செந்தமிழர்க்கு எதிரிகளை

விரட்டிட. வேண்டுமன்றோ!

வில்லங்கக் ்கும்பலன்றோ!

உரம்போட்டு நீர்வளர்த்து

உருவாக்கி உயரத்தில்

நிரந்தரமாய் நிறுத்திய

நெடுங்காலக் கழகந்தான்

பரந்திங்கே இருப்பதனால்

பழையபடி ஆட்சியைப்

புரந்திட வருமென்று

புகல்கிறோம்! அண்ணா,உம்

நிரந்தொளிரும் பிறந்தநாளில்

நிகழ்த்துகிறோம் வஞ்சினம்!

சுரந்தொளிரும் சூரியனைச்

சுற்றுகிற புவிக்கோளில்

இருந்தொளிரும் என்றென்றும்

இலட்சியமே வென்றென்றும்!

விதியென்று கிடந்தோர்க்கு

விழிப்பூட்டி விறலூட்டிக்

கதியாவார் பெரியார்தாம்

கருத்தாலே கைகாட்டி

மதிகொண்டு போராடி

மாற்றாரை வென்றவர்நீர்!

குதித்துவந்து தமிழ்நாட்டைக் கொள்ளவந்த இந்தியைக்

கொதித்தெழுந்து விரட்டிடக்

கொண்டுவந்தீர் இருமொழி!

துதித்தெழுந்து தமிழ்நாடு

தூயபெயர் சூட்டினீர்

மதித்தொரு சட்டமிட்டீர்

தன்மான மணத்திற்கு!

அதிகார ஆட்சியிலே

அமர்ந்தபின் எத்தனையோ

புரிந்தீரே! பலகாலம்

வதியாமல் போனதற்கு

மாற்றேது? இருந்தாலும்

பதியமிட்டுக் கழகத்தைப்

பண்படுத்தி வைத்ததனால்

சதிசெய்ய முயன்றோர்கள்

சாய்ந்தனர் தரையோடு!

உதவியாய்ப் பேராசிரியர்

உறுதியாய் உடனிருக்க

நிதியாகக் கலைஞர்தாம்

நெடுங்காலம் காத்திருக்க

அதிராத தளபதி

ஆற்றலுடன் செயற்படப்

புதிராகும் வெற்றியெனும்

புகழ்மகுடம் போனதுதான்!

முதிராத விடலைகளின்

மோகநிலைச் செயலாலே

உதிர்ந்ததுபோல் தோன்றினும்

உதித்திடும் சூரியன்தான் !

அண்ணா, உம் பிறந்தநாள்

அகமெலாம் நிறைந்தநாள்!

விண்ணாக,காற்றாக

விரிகதிராய் வளர்தீயாய்

உண்ணுநீர் உணவாக

உணர்கின்றோம்! தமிழ்நாட்டு

மண்ணில்நீர் பிறந்ததுதான்

மாபெருந் தவமாகும்;

அண்ணா நீர் தமிழருக்கு

அகலாத நவமாகும்;

கண்ணிலே கொண்டுயாம்

காலமெலாம் போற்றுவோம்!