#Title

திசை திருப்பும் வேலைகளை முறியடிப்போம்! தெளிவாகப் பேச வேண்டியதைத் தீர்மானிப்போம்!

மு தலீடுகளை ஈர்க்கவா விஜய் வெளிநாடு சென்றார்? அவர் என்னென்ன ஈர்த்தார்? அவரது ஆட்கள் தரப்பிலிருந்தே வெளியான படங்களும், வீடியோக்களும் லண்டன் பயணத்தின் ரகசியங்களை அம்பலப்படுத்திவிட்டன.

இதுபற்றி எவரும் கேள்வி கேட்கக் கூடாது என்பதற்காக, த.வெ.க. அமைச்சரும், பல கரைவேட்டிகளை மாற்றிய கேவலமான சாதனைக்குரியவருமான நிர்மல்குமார், தேவையே இல்லாமல் மிசா வழக்கு பற்றித் தொடர்ந்து பேசுகிறார். மிசா பற்றி விஜய்க்கும் எதுவும் தெரியாது. அவரது அமைச்சரவையில் இருக்கிற எவருக்குமே தெரியாது.

காங்கிரஸ் கட்சியுடன் கூட்டணி சேர்ந்துகொண்டு கச்சத்தீவு, எமர்ஜென்சி, மிசா என்பதெல்லாம், பூனையை மடியில் கட்டிக்கொண்டு சகுனம் பார்க்கிற வேலைதான்.அந்தக் காங்கிரசிடம் கேட்க வேண்டிய கேள்விகளை தி.மு.க.வை நோக்கிக் கேட்கிறார்கள். அவதூறான செய்திகளை சட்டமன்றத்திலும் வெளியிலும் த.வெ.க. அமைச்சர்கள் பேசுகிறார்கள். எல்லாவற்றுக்கும் மேலாக விஜய்யே மோசமான முறையில் உடல்மொழியை வெளிப்படுத்தி சைகை செய்கிறார்.

சுதந்திர இந்திய வரலாற்றில் ஜனநாயகத்தின் இருண்ட காலமான எமர்ஜென்சி காலத்தில் தி.மு.க. நடத்திய ஜனநாயக மீட்புப் போராட்டம் தமிழ்நாடு அளவிலானது மட்டுமல்ல, அது இந்தியா முழுமைக்கு மானது. இந்திராகாந்திஅரசின் எமர்ஜென்சியை எதிர்த்துப் போராட்டம் நடத்திய தலைவர் ஜெயப்பிரகாஷ் நாராயணன் உள்ளிட்டவர்கள் இதனை உறுதி செய்திருக்கிறார்கள். அற்பர்கள் கூ(ட்)டமான த.வெ.க.வில் உள்ளவர்களுக்கு இவை எதுவும் தெரியாது.

மிசா சிறைவாசத்தில் சித்திரவதைகளை எதிர்கொண்ட தியாகத் தலைவர் திராவிட நாயகரான நம் கழகத் தலைவர் அவர்களைக் கொச்சைப்படுத்தும் விதத்தில் விஜய்யும் அவரது கூட்டமும் பேசியதைக் கண்டித்து தமிழ்நாடு முழுவதும் 11-.9.-2026 அன்று தி.மு.க. சார்பில் மாவட்டத் தலை நகரங்களில் கண்டன ஆர்ப்பாட்டம் நடை பெற்றது.

சென்னை தெற்கு கழக மாவட்டத்தில், பிற கழக மாவட்டங்களும் இணைந்து சைதாப்பேட்டையில் நடத்திய ஆர்ப்பாட்டத்தில் கழகத்தின் துணைப் பொதுச்செயலாளர் ஆ.ராசா அவர்கள் கழகத் தலைவரின் எமர்ஜென்சி கால தியாகத்தை விளக்கி, அவதூறாகப் பேசிவரும் நிர்மல்குமாருக்குசவால் விட்டார். த.வெ.க. கூட்டம் அதனைத்திசை திருப்பிட முயன்றது. பிரச்சினையை விட்டுவிட்டு, ஆ.ராசா எம்.பி. பேசியதி லிருந்து ஒரு சொல்லை எடுத்துக் கொண்டு சமூக வலைதளங்களில் பரப்பியது.

மிசா சிறைக் கொடுமைகளை அனுபவித்த கட்சிகளில் ஒன்றான மார்க்சிஸ்ட் கம்யூனிஸ்ட் கட்சிகூட, த.வெ.க.வின் வலையில் விழுந்த மீனாக தி.மு.க.விற்கு எதிராகத் துள்ளியது. மிசா கொடுமைகளுக்கு காரணமான காங்கிரஸ் கட்சியின் ‘அல்லுசில்லு’ களும் த.வெ.க.வின் கூலிப்படை போல செயல்பட்டன. ஒரு நாள்முழுவதும் இதுவே விவாதமாக மாறியது.

பேரறிஞர் அண்ணாவின் பிறந்தநாளில் அவர் சொன்ன ஓர் எடுத்துக்காட்டை இங்கே நினைவூட்ட வேண்டியது அவசியமாகிறது. உண்மை என்ன என்பது ஊருக்கேதெரிந்திருந்தாலும் எதிராளிகள் நம்மைப் பற்றி அவதூறு பரப்பிக்கொண்டேதான் இருப்பார்கள் என்பதையும், அவர்கள் போக்கிலேயே நாம் போய்க்கொண்டிருந்தால் நம் பணிகளைக் கவனிக்க முடியாது என்பதையும் விளக்குவதற்காக அண்ணா சொன்ன எடுத்துக்காட்டு இதுதான்.

“ஒருத்தன் அண்ணாதுரைக்கு யானைக்கால்னு சொன்னா.. நான் ஒரு மீட்டிங் போட்டு பெட்ரோமாக்ஸ் லைட் வச்சு பாருங்க என் கால் யானைக்கால் இல்லை என காட்டணும். அடுத்து அவன் என்ன சொல்வான்? அண்ணாதுரை கெட்டிக்கார ஆளு, வலது கால் தானே காட்டுனாரு, இடது காலை காட்டச் சொல்லுங்கன்னு சொல்வான். உடனே நான் இன்னொரு மீட்டிங் போட்டு பெட்ரோமாக்ஸ் லைட் வச்சு இடது காலை காட்டணும். உடனே திரும்பவும் அண்ணாதுரை விவரமான ஆளு, முழங்கால் வரை தான் காட்டுனாரு. அதுக்கு மேல காட்டுனாரான்னு சொல்வான். சொல்றவன் சொல்லிட்டு தான் இருப்பான், அதை எல்லாம் கண்டுக்கவே கூடாது. சொல்றவன் தான் நிரூபிக்கணும்” என்பது கழகத்தினருக்கு பேரறிஞர் அண்ணா சொன்னதை அவர் பிறந்தநாளில் நினைவில் கொண்டு, நம் மீதான அவதூறுகளுக்கு உரியளவில் பதில்களைக் கொடுத்துவிட்டு, அவதூறு பரப்புகிறவர்கள் செய்கிற அநியாயங்களைத் தோலுரித்துக் காட்டுவதே நம்முடைய முதன்மையான பணியாக அமையவேண்டிய நேரம் இது.

விநாயகர் சதுர்த்தியையொட்டி கடந்த சனி, ஞாயிறு, திங்கள் என மூன்று நாட்கள் தொடர் விடுமுறை என்பதால் வெள்ளிக்கிழமை மாலை முதலே சென்னையி லிருந்து வெளியூர் செல்பவர்கள் தங்கள் ஊருக்கானப் பேருந்துகளைத் தேடத் தொடங்கிவிட்டார்கள். த.வெ.க. ஆட்சியில் இலஞ்சமும் ஊழலும் விஜய்யைப் பார்த்து பயந்து ஓடிவிட்டது போல பேசியதை யாரும் மறக்க மாட்டார்கள். ஆம்னி பஸ்கள் கூடுதல் கட்டணமின்றி இயங்கும் என்று அதன் சங்கத்தைச் சார்ந்த ஒருவர் பேட்டி அளித்ததும் நினைவிருக்கலாம். ஆம்னி பஸ் டிக்கெட் என்பது விமான டிக்கெட் விலைக்கு விற்கப்பட்டது. ஊழலை ஒழித்த ஆட்சி என்றால் ஏன் இந்த அநியாயமானக் கூடுதல் கட்டணம்? த.வெ.க. அரசு என்ன நடவடிக்கை எடுத்தது?

கிளாம்பாக்கம் கலைஞர் நூற்றாண்டு நினைவுப் பேருந்து முனையத்தில் வெள்ளி இரவில் கடல் போலக் கூட்டம் காத்திருக்கிறது. எந்த ஊருக்கும்போதுமான அளவில் அரசுப் பேருந்துகள் இயக்கப்படவில்லை. அதற்கான திட்டமும் த.வெ.க. அரசிடமில்லை. தி.மு.க. ஆட்சிக்காலத்தில் பொங்கல், தீபாவளி, பண்டிகை நாட்கள் மற்றும் வார இறுதி விடுமுறை நாட்களில் பயணிகளின் தேவையை கருதி பேருந்துகள் இயக்கப்பட்டன.

அப்போதும்கூட, தேவையற்ற பிரச்சினைகளை ஊடகங்கள் மூலமாக எதிராளிகள் கிளப்பிய நிகழ்வுகள் உண்டு. ஆனாலும், திராவிட மாடல்அரசின் போக்கு வரத்துத் துறை அமைச்சராக இருந்த சிவசங்கர் அவர்கள் விடிய விடிய கிளாம்பாக்கத்திலேயே நின்று, கடைசிப் பயணியும் சொந்த ஊருக்குப் போய்ச் சேர்வதற்கான பேருந்து வசதியை செய்தார். த.வெ.க. அரசின் போக்குவரத்துத்துறை அமைச்சர் எங்கே போனார்?

வெள்ளிக்கிழமை ஊருக்குப் போக வேண்டியவர்கள் ஞாயிறு இரவு வரை கிளாம்பாக்கத்திலேயே காத்திருந்த பேரவலத்திற்கு விஜய்யோ அவரது அரசில் உள்ள அமைச்சர்களோ பொறுப்பேற்க முன்வந் தார்களா? தி.மு.க.வுக்கு எதிராக அவதூறு பேசுவது ஒன்றுதான் த.வெ.க. ஆட்சியின் முக்கியமான வேலையா?

மக்களிடம் நாம் கொண்டு செல்ல வேண்டியது, அவர்கள் சார்ந்த இத்தகைய பிரச்சினைகளைத்தான். மின்வெட்டால் தமிழ்நாடே இருளில் மூழ்கியுள்ளது. முதலமைச்சராகிவிட்டவரின் தொகுதி பெரம்பூர். அங்கு மின்வெட்டு தொடர்கிறது. மின்வாரிய அலுவலகத்திற்குச் சென்று, காரணம் கேட்கும் பொதுமக்களுக்குஉரிய பதில் தரப்படுவதில்லை. மின்வெட்டுக்குஅடுத்தபடியாக, பெரம்பூர் தொகுதியில் குடிநீர் விநியோகமும் கடந்த 5 நாட்களாக இல்லை. மகாகவி பாரதியார் நகர், கண்ணதாசன் நகர் உள்ளிட்ட பகுதி மக்கள் குடிக்கத் தண்ணீர் இல்லாமல் தவிக்கிறார்கள்.

குடிதண்ணீர் இல்லை. பேருந்து வசதி செய்யப்படவில்லை. அரிசி விலை ஏறிவிட்டது. மின்சாரம் இல்லை. மின்கட்டணம் உயர்கிறது. தீப்பந்தங்களை ஏற்றி வந்து இரவு நேரத்தில் மக்கள் சாலை மறியல் செய்கின்ற அவலம் தொடர்கிறது. மக்களின் அடிப்படைத் தேவைகள் எதையும் கண்டுகொள்ளாமல், லண்டனில் ரீல்ஸ்க்கான ஷூட்டிங் நடத்திக் கொண்டிருக்கிறார் விஜய். தொழில் முதலீடுகளை ஈர்ப்பதாகச் சொன்ன பயணத்தில் தொழில்துறை அமைச்சர் பங்கேற்கவில்லை. விஜய்யின் நண்பா-நண்பீஸ்தான் கூடவே இருக்கிறார்கள். ஊரான் வீட்டு நெய்யில் ஸ்வீட் சாப்பிட்டுக் கொண்டிருக்கிறார் விஜய்.

மக்களிடம் இவற்றை அம்பலப்படுத்துவோம். குறிப்பாக, இடைத்தேர்தல்களை சந்திக்கும் மதுராந்தகம்- – தாராபுரம் தொகுதிகளில் பரப்புவோம். த.வெ.க.வின் திசை திருப்பும் சூழ்ச்சியை முறியடிப்போம். பேரறிஞர் அண்ணா சொன்னது போல மக்களிடம் செல்வோம். ஆட்சியின் அவலத்தைமக்களிடம் சொல்வோம். நாம் பேச வேண்டியதை நாமே தீர்மானிப்போம்.