சென்னை, செப்.16–
தமிழ்நாட்டில் மதுராந்தகம் மற்றும் தாராபுரம் தொகுதிகளுக்கான இடைத்தேர்தல் வரும் அக்டோபர் மாதம் 6–ஆம் தேதி நடைபெறுகிறது. இத்தேர்தலில் தி.மு.க. சார்பில் போட்டியிடும் வேட்பாளர்களுக்கு எமது மக்கள் விடுதலை கட்சி தனது முழு ஆதரவை தெரிவித்துக்கொள்கிறது.
ஜனநாயகம், சமூக நீதி, சமத்துவம் , மதச்சார்பின்மை, தமிழ் மொழி பாதுகாப்பு ஆகியவற்றை பேணிக்காக்கும் தி.மு.க. தலைமையிலான கூட்டணியில் மக்கள் விடுதலை கட்சி நீண்ட காலமாக பயணிக்கிறது. தியாகி இமானுவேல் சேகரனாரின் பிறந்த நாளை அரசு விழாவாகவும் மற்றும் மணிமண்டபம் அமைக்க வேண்டுமென்ற எங்களின் கோரிக்கையை ஏற்று முன்னாள் தமிழக முதல்வர் மு.க.ஸ்டாலின் அவர்கள், தியாகி இம்மானுவேல் சேகரனாரின் பிறந்தநாள் அரசு விழாவாக கொண்டாடப்படும் என அறிவித்தார்.
மேலும் பரமக்குடியில் தியாகி இமானுவேல் சேகரனாருக்கு மணிமண்டபம் அமைத்துக் கொடுத்தார். எனவே தி.மு.க.வின் கரத்தை மேலும் வலுப்படுத்தும் வகையில் இடைத்தேர்தலிலும் எங்களின் ஆதரவு தொடரும். இரு வேட்பாளர்களின் வெற்றி உறுதியான நிலையில், அவர்களுக்காக இரு தொகுதிகளிலும் மக்கள் விடுதடைில கட்சியின் சார்பில் களப் பணியாற்றுவோம்.
தி.மு.க. தலைவர் மு.க.ஸ்டாலின் அவர்களின் கருத்தை வலுப்படுத்தும் வகையில் இந்த இரு தொகுதிகளின் இடைத்தேர்தல் வெற்றி அமையும். விரைவில் தி.மு.க. தலைவர் மு.க.ஸ்டாலின் அவர்களை நேரில் சந்தித்து எங்களின் முழு ஆதரவையும் தெரிவிப்போம்.
இவ்வாறு மக்கள் விடுதலைக் கட்சி நிறுவன தலைவர் சு.க. முருகவேல் ராஜன் தெரிவித்துள்ளார்.