சென்னை, செப்.17 –-
தமிழகத்தில் மினசார விநியோகம் சீராக இருப்பதாக மின்துறை தரப்பில் தெரிவிக்கப்பட்டு வரும் நிலையில், சென்னையின் பல்வேறு பகுதிகளில் இரவு நேரங்களிலும் பல மணி நேரம் மின்வெட்டு ஏற்படுவது, மின்மாற்றி மற்றும் கேபிள் பழுதுகளால் மக்கள் பாதிக்கப்படுவது, மின் தடையை புகார் செய்ய வேண்டிய மின்னகம் சேவை மையத்துக்கே மின்தடை ஏற்படுவது என மின்துறை செயல்பாடுகள் மீது தொடர்ந்து புகார்கள் எழுந்துள்ளன. இதனால் குழந்தைகள், முதியவர்கள், நோயாளிகள், பொதுமக்கள் மட்டுமின்றி சிறு, குறு மற்றும் நடுத்தர தொழில் நிறுவனங்களும் பாதிக்கப்பட்டு வருவதாக கூறப்படு கிறது.
இதற்கிடையே, மின் துறையில் போதுமான பணியாளர்களை நியமித்து பராமரிப்பு பணிகளை வலுப்படுத்துவதற்கு பதிலாக, மின் உற்பத்தி, பரிமாற்றம், விநியோகம் உள்ளிட்ட பணிகளில் தனியார் பங்களிப்பை அதிகரிக்கும் முயற்சிகள் மேற்கொள்ளப்படுவதாக தமிழ்நாடு மின் ஊழியர் மத்திய அமைப்பு குற்றம் சாட்டியுள்ளது.
மின்தடை, குறைந்த மின்ன ழுத்தம், மின் கட்டணப் பிரச்சினை உள்ளிட்ட புகார்களைதெரிவிக்க பொதுமக்கள் பயன்படுத்தும் 94987 94987 என்ற மின்னகம் எண்ணுக்கு தினமும் சுமார் 3,000 அழைப்புகள் வருவதாக கூறப்படுகி றது. ஆனால், மின்தடை ஏற்பட்ட நேரத்திலேயே மின்னகம் அழைப்பு மையத்தையும் தொடர்பு கொள்ள முடியாத நிலை ஏற்படுவதாக புகார்கள் எழுந்துள்ளன. மின்னகம் அழைப்பு மையத்திற்கு வழங்கப்பட்டுள்ள மின் காப்பு வசதி சுமார் 10 நிமிடங்களுக்கு மட்டுமே போதுமானதாக இருப்பதாக அதிகாரிகள் தெரிவித்துள்ளனர்.
மின்னகம் அழைப்பு மையத்துக்கு மயிலாப்பூர் 230 கிலோ வோல் துணை மின் நிலையத்தில் இருந்து மினசாரம் வழங்கப்படுகிறது. அந்த துணை மின் நிலையத்தில் ஏதேனும் கோளாறு ஏற்பட்டு, 10 நிமிடங்
களுக்குள் மின்சாரம் சீராகவில்லை என்றால், மின்னகம் அழைப்பு மையமும் செயல்பட முடியாத நிலை ஏற்படுவதாக கூறப்படுகிறது. மினவெட் டால் பாதிக்கப்பட்ட மக்கள் புகார் தெரிவிக்க வேண்டிய நேரத்திலேயே, அந்த புகாரை பெற வேண்டிய மின்னகம் மையமும் மின்சாரம் இல்லாமல் முடங்குவது, மின்துறையின் மின் காப்பு மற்றும் அவசரகால ஏற்பாடுகள் குறித்து கேள்வியை எழுப்பியுள்ளது.
களப்பணியில் உள்ள மின் அதிகாரிகளின் செல்போன் எண்கள் மாற்றப்பட்டுள்ளதாக கூறப்படும் நிலையில், புதிய எண்கள் குறித்து பொதுமக்களிடம் போதிய அளவில் தகவல் தெரிவிக்கப்படவில்லை என்ற புகாரும் உள்ளது. இதனால் பழைய எண்களில் தொடர்பு கொள்ளும் மக்கள் பதில் கிடைக்காமல் தவிக்கின்றனர். சில பகுதிகளில் ‘ஃபியூஸ் ஆஃப்’ புகார் எண்களும் தொடர்பு கொள்ள முடியாத நிலை இருப்பதாக கூறப்படுவ தால், பொது மக்கள் மின்னகம் எண்ணையே நம்ப வேண்டிய நிலை உள்ளது. ஆனால், அதுவும் மின்தடையால் முடங்கினால் புகார் தெரிவிக்கக்கூட முடியாதநிலை ஏற்படுகிறது.
சென்னையின் பல்வேறு பகுதிகளில் இரவு நேரங்களிலும் அறிவிக்கப்படாத மின்வெட்டு ஏற்படுவதாக பொதுமக்கள் தொடர்ந்து புகார் தெரிவித்து வருகின்றனர். சென்னை அமைந்தகரை பகுதியில் 8 மணி நேரத்திற்கும் மேலாக மின்சாரம் இல்லாமல் மக்கள் பாதிக்கப்பட்டதாக தகவல்கள் வெளியாகியுள்ளன. மின் விசிறி உள்ளிட்ட அத்தியாவசிய சாதனங்கள் இயங்காததால் குழந்தை கள், முதியவர்கள் உள்ளிட்டோர் இரவு நேரத்தில் கடும் சிரமத்திற்கு ஆளானதாக தெரிவிக்கப்பட்டுள்ளது. புளியந்தோப்பு, பாலவாக்கம் உள்ளிட்ட பகுதிகளிலும் சுமார் 3 மணி நேரம் வரை மின்தடை ஏற்பட்டதாக பொதுமக்கள் தெரிவித்துள்ளனர். நிலத்தடி கேபிள் கோளாறு உள்ளிட்ட காரணங்களால் மின்சாரம் துண்டிக்கப்பட்டதாக கூறப்படுகிறது.
ஒருபுறம் மின் விநியோகம் சீராகிவிட்டதாக மின்துறை தரப்பில் தெரிவிக்கப்படும் நிலையில், மறுபுறம் பல பகுதிகளில் மின்தடை தொடர்வது பொதுமக்களிடையே கேள்வியை எழுப்பியுள்ளது. மின்தடை ஏற்படும் பல்வேறு சம்பவங்களில் மின்மாற்றி பழுது, நிலத்தடி கேபிள் கோளாறு, மின் சாதனங்களில் தொழில்நுட்பக் கோளாறு போன்றவை காரணங்களாக தெரிவிக்கப்படுகின்றன.
மின்மாற்றிகளில் தீப்பற்றுதல் அல்லது முக்கிய மின் சாதனங்களில் பழுது ஏற்பட்டால், மின்சாரத்தை மீண்டும் வழங்குவதற்கு நீண்ட நேரம் ஆகிறது. இதனால் மின்மாற்றி கள், துணை மின் நிலையங்கள், கேபிள்கள் உள்ளிட்ட மின் கட்டமைப்புகளில் வழக்கமான பராமரிப்புப் பணிகள் போதுமான அளவில் மேற்கொள்ளப்படுகிறதா என்ற கேள்வி எழுந்துள்ளது.
ஒவ்வொரு மின்மாற்றி தீ விபத்துக்கும் பராமரிப்பின்மையே காரணம் என்று கூற முடியாது என்றாலும், தொடர்ந்து ஏற்படும் பழுதுகளை கருத்தில் கொண்டு மின் கட்டமைப்புகளை முன்கூட்டியே ஆய்வு செய்து பராமரிக்க வேண்டும் என்பதே பொது மக்களின் எதிர்பார்ப்பாக உள்ளது.
மின்தடை வீடுகளை மட்டுமின்றி சிறு, குறு மற்றும் நடுத்தர தொழில் நிறுவனங்களையும் பாதிக்கிறது. திடீர் மின்தடையால் இயந்திரங்கள் நிறுத்தப்படுவதுடன், மீண்டும் மின்சாரம் வந்த பிறகு உற்பத்தியை தொடங்குவதற்கு கால தாமதம் ஏற்படுகிறது. இதனால் உற்பத்தி இழப்பு ஏற்படுவதுடன், மாற்று மின்சார வசதிகளை பயன்படுத்த வேண்டிய தொழில் நிறுவனங்களுக்கு கூடுதல் செலவும் ஏற்படுகிறது. மின்சார விநியோகம் சீராக இல்லாவிட்டால் தொழில் வளர்ச்சி, வேலை வாய்ப்பு, உற்பத்தி என பல துறைகளிலும் பாதிப்பு ஏற்படும் அபாயம் இருப்பதாக சமூக ஆர்வலர்கள் எச்சரிக்கின்றனர்.
தமிழ்நாடு மின் ஊழியர் மத்திய அமைப்பு பொதுச் செயலாளர் ஜெய்சங்கர் வலியுறுத்தியுள்ளதாவது:
மின்சாரம் என்பது மக்களின் அடிப்படைத் தேவை. மின்வெட்டால் மக்கள் பாதிக்கப்படும் நிலையில், புகார் தெரிவிக்கும் மின்னகத்துக்கே போதுமான மின்காப்பு வசதி இல்லாதது ஏற்றுக்கொள்ள முடியாது. மின் உற்பத்தி முதல் விநியோகம் வரை பொதுத் துறையை வலுப்படுத்துவதற்கு பதிலாக தனியார் பங்களிப்பை அதிகரிப்பது தீர்வாகாது. புதிய மின் உற்பத்தி நிலையங்கள் மற்றும் துணை மின் நிலையங்களை பொதுத்துறை மூலம் அமைக்க வேண்டும். மின் மாற்றி, கேபிள் உள்ளிட்ட மின் கட்டமைப்புகளை முறையாக பராமரிக்க போதுமான ஊழியர்களை நியமிக்க வேண்டும். ஒப்பந்த தொழிலாளர்களின் உரிமைகளையும் பாதுகாக்க வேண்டும். மின்துறையை தனியார் மயமாக்கும் முயற்சிகளை கைவிட வேண்டும் என்றார்.
எனவே, இரவு நேர மின்வெட்டை கட்டுப்படுத்தி தடையற்ற மின்சாரம் வழங்குதல், மின்மாற்றி மற்றும் மின் கட்டமைப்புகளை முறையாக பராமரித்தல், மின்னகத்திற்கு போதுமான மின் காப்பு வசதி ஏற்படுத்துதல், போதுமான மின் ஊழியர்களை நியமித்தல், ஒப்பந்த தொழிலாளர்களின் உரிமைகளை பாதுகாத்தல் மற்றும் மின்துறையை தனியார் மயமாக்கும் முயற்சிகளை கைவிட்டு பொதுத்துறை மின்வாரியத்தை வலுப்படுத்துதல் ஆகிய நடவடிக்கைகளை அரசு உடனடியாக மேற்கொள்ள வேண்டும் என்பதே பொதுமக்கள் மற்றும் மின் ஊழியர்களின் கோரிக்கையாக உள்ளது.