சென்னை, செப்.18–
எம்.எல்.ஏ., பதவியை ராஜினாமா செய்துவிட்டு, வேறு கட்சியில் சேர்ந்து மீண்டும் தேர்தலில் போட்டியிடுவது கேலிக்கூத்து என சென்னை உயர்நீதிமன்றம் கடும் கண்டனம் தெரிவித்துள்ளது.
மதுராந்தகம் மற்றும் தாராபுரம் சட்டமன்ற தொகுதிகளுக்கு நடைபெறவுள்ள இடைத்தேர்தலுக்கு தடை விதிக்ககோரி தொடரப்பட்ட பொதுநல வழக்கு சென்னை உயர்நீதிமன்றத்தில் நீதிபதிகள் எஸ்.எம்.சுப்பிரமணி யம், கிருஷ்ணசாமி கோவிந்தராஜன் அமர்வில் நேற்று முன்தினம்விசாரணைக்கு வந்தது.
அப்போது, குறுகிய காலத்தில் எம்.எல்.ஏ., பதவியை ராஜினாமா செய்துவிட்டு, வேறு கட்சியில் சேர்ந்து அதேதொகுதியில் மீண்டும் இடைத்தேர்தலில் போட்டியிடுவதா என நீதிபதிகள் கடும் கண்டனம் தெரிவித்தனர். இதுபோன்ற செயல்கள் கேலி கூத்தானது என்றும், நம்பி வாக்களித்த வாக்காளர்களை அவமானப்படுத்தும் செயல் என்றும் நீதிபதிகள் அதி ருப்தி தெரிவித்தனர்.
இதுபோன்ற செயல்களைதடுக்க தேர்தல் ஆணையம் நடவடிக்கை எடுக்க வேண்டும் என்று நீதிபதிகள் அறிவுறுத்தினர். சில அசாதாரண சூழ்நிலைகளில் தேர்தல் ஆணையம் முடிவெடுக்க வேண்டும் என்றும் உத்தரவிட்டனர்.
மேலும், வழக்கை தலைமை நீதிபதி அமர்வுக்கு மாற்றி நீதிபதிகள் ஆணையிட்டனர்.