சென்னை. செப்.19–
சென்னை வடக்கு மாவட்டம் பெரம்பூர் பகுதி 44-வது வட்ட தி.மு.க. சார்பில் தமிழ்நாடு சட்டமன்றத்தில் தரங்கெட்டு பேசிய முதலமைச்சர் விஜய் அவர்களின் ஆணவத்தை கண்டித்து மாபெரும் கண்டனப்பொதுக்கூட்டம் பெரம்பூர் பழனி ஆண்டவர் கோவில் தெருவில் நடைபெற்றது.
இக்கூட்டத்திற்கு வட்ட செயலாளர் த.ஆறுமுகம் தலைமை தாங்கினார். பகுதி செயலாளர்கள் க.ஜெயராமன். அ.முருகன் ஆகியோர் முன்னிலை வகித்தனர். இக்கூட்டத்தில் தி.மு.க. அமைப்புச் செயலாளர். மூத்த வழக்கறிஞர் ஆர்.எஸ். பாரதி பேசினார்.
அவர் பேசியதாவது:–
பெரம்பூர் சட்டமன்ற தொகுதியில் நடைபெறுகின்ற இந்த பொதுக்கூட்டம் மிகவும் உணர்ச்சிமயமான. கழகத் தொண்டர்கள் திரளாக பங்கேற்றுள்ள பொதுக் கூட்டமாக நடைபெற்று வருகிறது. இதே பழனி ஆண்டவர் கோவில் தெருவில் கடந்த 40 ஆண்டுகளுக்கு முன்பு ஆர்.டி.சீதாபதி மாவட்ட செயலாளராக இருந்தபோது. செங்கைசிவம் பகுதி செயலாளராக இருந்தபோது பல கூட்டங்களில் நான் பங்கேற்று உள்ளேன்.
எழுச்சியைக்
காண்கிறேன்!
அப்போது நான் கண்ட எழுச்சியை இப்பொழுது காண்கிறேன். ஆட்சி இருக்கும் பொழுது இது போன்ற கூட்டத்தை கூட்டினால் நலத்திட்ட உதவிகள் என்ற பெயரில் கூட்டத்தை கூட்டுவது வாடிக்கையாக இருந்தது. ஆனால் தற்பொழுது எதிர்க்கட்சியாக இருக்கிறது நடைபெறுகின்ற இந்த கூட்டம். கழகத் தோழர்களையும் பொதுமக்களையும் பங்கேற்க செய்துஉள்ள சிறப்புமிக்க கூட்டமாக திகழ்கிறது.
எப்பொழுதுமே எதிர்க்கட்சியாக இருந்தால் தி.மு.கழகத்திற்கு ஒரு கெத்து உள்ளது. அதைத்தான் கலைஞர் அவர்களும் சொல்லுவார்.
தி.மு.க.காரன் தூங்கினால் கும்பகர்ணன். எழுந்தால் இந்திரஜித் என்பார். அதைப் போல் தான் இன்றைக்கு ஒவ்வொரு தி.மு.க.காரனும். இந்திரஜித் -ஆக வீறு கொண்டு எழுந்து உள்ளான்.
நடைபெற்று முடிந்த சட்டமன்ற தேர்தலில். தி.மு.க. ஆட்சியில்
இருந்தபோது செய்த எண்ணற்ற
சாதனைகளை. நலத்திட்டங்களை எல்லாம் மக்கள் மறந்து விட்டு. மது கிண்ணத்தில் விழுந்த வண்டை போல் மயங்கி போய் விசிலுக்கு வாக்களித்து விட்டார்கள். இப்பொழுது இந்த ஆட்சியில் நடைபெற்று வரும் சீர்கேடுகளை கண்டு. மக்கள் விரோத நடவடிக்கைகளை கண்டு. ஏண்டா இவர்களுக்கு ஓட்டு போட்டோம் என்று மக்கள் கொஞ்சம் கொஞ்சமாக தெளிந்து வருகிறார்கள்.
குற்ற சம்பவங்களில்
த.வெ.க. நிர்வாகிகள்!
உதாரணத்திற்கு முதலமைச்சர் விஜய் வெற்றி பெற்ற இந்த தொகுதி கேட்பாரற்று உள்ளது. பத்து நாட்களாக குடிக்க குடிநீர் கூட கிடையாது. எங்கு பார்த்தாலும் மின்வெட்டு. இங்குதான் இப்படி என்றால். தமிழ்நாடு முழுவதும் கொலை. கொள்ளைகள். பாலியல் பலாத்காரங்கள் தினம் தினம் அதிகரித்து வருகிறது. இதில் யார் அதிகமாக ஈடுபடுகிறார்கள் என்றால். த.வெ.க.வை சேர்ந்தவர்கள் தான் அதிகம் குற்ற சம்பவங்களில் ஈடுபடுகிறார்கள் என்று பத்திரிகை களில் தினம் தினம் செய்திகள் வெளி வருகின்றன. உதாரணத்திற்கு நேற்று முன்தினம் கூட திருப்பதி குடை ஊர்வலத்தில் பாதுகாப்பு பணி ஈடுபட்டிருந்த பெண் போலீஸிடம். த.வெ.க. நிர்வாகி சில்மிஷத்தில் ஈடுபட்டுள்ளார். பாதிக்கப்பட்ட பெண் போலீஸ் அளித்த புகாரின் பேரில் த.வெ.க. நிர்வாகி மீது வழக்கும் பதிவு செய்யப்பட்டுள்ளது .
ஆனால் ஆதவ் அர்ஜுனா அவர்கள் தலையீட்டின் பேரில் அந்த
நிர்வாகி மீது எந்த நடவடிக்கையும் எடுக்கவில்லை என்பதை இந்த பொதுக்கூட்டம் வாயிலாக நான் குற்றம் சாட்டுகிறேன்.
மக்கள் விரோத
த.வெ.க. அரசு!
த.வெ.க. ஆட்சிக்கு வந்து இந்த 115 நாட்களில் ரீல்ஸ் போடுவதை மட்டுமே வழக்கமாகக் கொண்டுள்ளார்கள். கஜானா காலி என்று சொல்கிற விஜய் அவர்கள். பட்டினப்பாக்கத்தில் சட்டமன்றம் கட்ட மட்டும் பணம் எப்படி வந்தது. அதுவும் குறிப்பாக மீனவர்கள் அதிகம் வாழ்கிற பகுதி அது. மீனவர்கள் பலத்த எதிர்ப்பு தெரிவித்த போதும் இந்த மக்கள் விரோத அரசு எதேச்சதிகாரத்தோடு சட்டமன்றம் கட்ட முயற்சிப்பது மிகவும் கண்டனத்துக்குரியதாகும்.
இதே போல் தான் எம்.ஜி.ஆர். ஆட்சி காலத்தில் அதே பட்டினப்பாக்கம் பகுதியில் அங்கிருந்து மீனவ
மக்களை வெளியேற்ற முயன்ற போது . மீனவர்கள் மத்தியில் மிகப்பெரிய போராட்டம் வெடித்தது. அப்போது எட்டு மீனவர்கள் கொல்லப்பட்டனர். இந்த வரலாறுகள் எல்லாம் இப்போதுள்ள ஆட்சி அதிகாரத்தில் உள்ளவர்களுக்கும் தெரியாது. இப்போதுள்ள அதிகாரிகளுக்கும் தெரியாது. கொல்லப்பட்ட எட்டு பேரின் இறுதி ஊர்வலத்தில் தி.மு.கழகத்தின் சார்பில் பங்கேற்று 10 கிலோ மீட்டர் தூரம் நடந்தே சென்று இறுதி மரியாதை செலுத்தினேன்.
கடந்த தி.மு.க. ஆட்சி காலத்தின் போது ஏராளமான திட்டங்கள் நிறைவேற்றப்பட்டது. அதையெல்லாம் மக்கள் மறந்து விட்டு மாற்றம் வேண்டும் என்று சொல்லி ஓட்டு போட்டதன் விளைவாக, அதன் பயனை மக்கள் அனுபவித்துக் கொண்டுள்ளார்கள்.
இன்றைக்கு விலைவாசி. தி.மு.க. ஆட்சி காலத்தை விட இந்த நான்கு மாதங்களில் பன்மடங்கு உயர்ந்து உள்ளது. குறிப்பாக சொல்ல வேண்டுமென்றால் ஒரு மூட்டை புழுங்கல் அரிசி . திமுக ஆட்சி காலத்தில் 1600 ரூபாய் இருந்தது. இன்று 2200 க்கு விற்கிறது. ஒரு கிலோ சர்க்கரை ரூபாய் நாற்பதில் இருந்து 74 க்கு உயர்ந்துள்ளது. ஒரு கிலோ துவரம் பருப்பு ரூபாய் 130 இருந்து. 170 ரூபாயாக உயர்ந்துள்ளது. இதுதான் இந்த ஆட்சியின் லட்சணம்.
ஊரிலே ஒரு பழமொழி சொல்வார்கள். நாயை குளிப்பாட்டி நடுவீட்டில் வைத்தாலும் அது எதையோ தின்பதற்கு வாலை ஆட்டிக் கொண்டு வெளியே ஓடுமாம். அது போல இருக்கிறது இன்றைய அரசியல் நிலை.
சட்டமன்றம்
நாடக மன்றமாக மாறிவிட்டது!
இன்றைய சட்டமன்றம் என்பது நாடக மன்றமாக மாறிவிட்டது. சட்டமன்றத்தில் எதிர்க்கட்சிகள் கேட்கும் கேள்விக்கு பதில் சொல்ல யாருக்கும் தெரியவில்லை. மாறாக தி.மு.க. மீது வேண்டுமென்றே பொய்யான குற்றச்சாட்டை முன் வைக்கிறார்கள். சட்டமன்றத்தில் காவல்துறை மானிய கோரிக்கையின் போது நடைபெற்ற விவாதத்தின் போது பங்கேற்று பேசிய சட்டமன்ற எதிர்க்கட்சித் தலைவர்
உதயநிதி ஸ்டாலின் முத்தமிழ்
அறிஞர் கலைஞர் அவர்களை போல் ஆதாரத்தோடு பேசினார். பல்வேறு கேள்விகளை முன் வைத்தார். அதற்கு முதலமைச்சர் விஜய் அவர்கள் மூன்று நாள் அவகாசம் வாங்கிக் கொண்டு சென்றார். என்ன பதில் சொல்லலாம் என்று அதிகாரிகளிடம் ஆலோசனை நடத்தி உள்ளார்.
அதிகாரிகளும் உதயநிதி கேட்ட கேள்விகள் அனைத்தும் சரிதான். அவற்றுக்கு ஏதும் பதில் இல்லை என்று சொல்லி இருப்பார்கள். அதனால் அந்த கேள்விகளை மடைமாற்றம் செய்ய சர்க்காரியா கமிஷன் குறித்து எவனோ எழுதிக் கொடுத்ததை முதலமைச்சர் விஜய் சட்டமன்றத்தில் பேசியுள்ளார். சர்க்காரியா கமிஷன் என்பது 1972 ஆம் ஆண்டு எம்.ஜி.ஆர். அவர்கள் தி.மு.க.வில் இருந்து பிரிந்து சென்ற போது கொடுத்த புகாரின் அடிப்படையில். 1976 ஆம் ஆண்டு எமர்ஜென்சி அமல்படுத்தப்பட்ட பிறகு போடப்பட்ட கமிஷன். ஆனால் யார் புகார் கொடுத்தாரோ. அதே எம்ஜிஆர் அவர்கள் ஆட்சிக்கு வந்த பிறகு. எந்தவித ஆதாரமும் இல்லாததால் அவரே அதனை கைவிட்டார் என்பது வரலாறு.
அதேபோலத்தான் மிசா சட்டமும். மிசா என்கிற எமர்ஜென்சியை கொண்டு வந்த இந்திரா காந்தி. தி.மு.க. தலைவர் கலைஞர் அவர்களிடம் இந்த சட்டத்தை நீங்கள் ஆதரித்தால் உங்கள் ஆட்சிக்கு மேலும் ஒரு வருடம் நீட்டிப்பு தருகிறேன் என்று கூறினார். அதை கலைஞர் அவர்கள் ஏற்கவில்லை. அதுமட்டுமல்ல இன்றைக்கு வாய் கிழிய காமராஜர் ஆட்சி வரவேண்டும் என்று பேசுகிறார்களே காங்கிரஸ் காரர்கள். அந்த காமராஜரை கைது செய்ய வேண்டும் என்று இந்திரா காந்தி அவர்கள் கலைஞர் அவர்களிடம் சொன்னார். அதற்கு கலைஞர் அவர்கள் மறுத்தகாரணத்தினாலும். மேலும் காமராஜர் அவர்கள் இறந்த போது அவருக்கு அரசு மரியாதை கொடுத்ததால் அம்மையார் இந்திரா காந்திக்கு தி.மு.க. மீது கடும் கோபம் ஏற்பட்டது. அதனை தொடர்ந்து தான் 30.01.1976 ஆண்டு தி.மு.க. ஆட்சி கலைக்கப்பட்டது.
கொடூர சட்டமான
மிசா சட்டம்!
மிசா சட்டத்தில் இந்தியாவில் உள்ள பெருந்தலைவர்களான வாஜ்பாய், லல்லு பிரசாத் யாதவ், ஜெயபிரகாஷ் நாராயணன் உள்ளிட்ட பலர் கைது செய்யப்பட்டனர் .
இந்த கொடூர சட்டமான மிசா சட்டத்தில் தான் நமது கழகத் தலைவர் அவர்கள் தளபதி அவர்களும் கைது செய்யப்பட்டார். கைது செய்யப்பட்ட போது முத்தமிழ் அறிஞர் கலைஞர் அவர்கள் சொன்ன வார்த்தையை நான் இங்கு நினைவு படுத்த விரும்புகிறேன். “” ஸ்டாலின் நான் கூட 29 வயது தான் சிறைக்குச் சென்றேன். ஆனால் நீ 23 வயதிலேயே சிறைக்கு செல்கிறாய் . என்னை விட நீ பெரிய தியாகி ஸ்டாலின்” என பாராட்டினார். இதுதான் தி.மு.க.வின் தியாக
வரலாறு.
மிசா சட்டத்தில் கைது செய்யப்பட்ட கழகத் தலைவர் தளபதி. சிட்டி பாபு உள்ளிட்ட ஏராளமானார் எண்ணற்ற கொடுமைகளுக்கு உள்ளானார்கள்.
மிசா சட்டம் குறித்து
அவதூறு பரப்பும் முதலமைச்சர்!
மிசா சட்டம் குறித்து அவதூறு பரப்பும் இப்போதைய தமிழக முதலமைச்சருக்கும். எந்த ஒரு கட்சியிலும் நிலையாக இல்லாமல். பல கட்சிகளுக்கு சென்று இப்பொழுது த.வெ.க.வில் சேர்ந்து அமைச்சராக இருக்கும்
நிர்மல் குமாருக்கும் ஒன்றைச் ஆதார மாக சொல்லிக் கொள்கிறேன்.
“ 2013-ம் ஆண்டு தற்போதைய பிரதமர் மோடி அவர்கள் ஒரு ட்விட்டர் ஒன்றை பதிவு செய்துள்ளார். அதில் மிசா எமர்ஜென்சி காலத்தின் போது இந்தியாவில் உள்ள பல்வேறு தலைவர்களும். அவர்களது மகன்களும் குறிப்பாக ஸ்டாலின்அவர்களும். பல்வேறு கொடுமைகளை அனுபவித்தனர் “ என்று பதிவு செய்துள்ளதை மிசா என்றால் தெரியாத கத்துக்குட்டிகளுக்கு சுட்டிக்காட்ட விரும்புகிறேன். அது மட்டுமல்ல மிசா சட்டத்தின்
ஆவணங்கள் குறித்து RTI - ல் எங்களது வழக்கறிஞர்கள் கேட்டிருந்தனர். அதற்கு RTI-ல் இருந்து வந்த பதில். ஆவணங்கள் இல்லை என்று தெரிவித்திருக்கிறார்கள். அரசுஆவணங்களை மறைப்பது. அவற்றை ஒளித்து வைப்பது.: தவறாக பயன்படுத்துவது மாபெரும் குற்றமாகும்.
இதே போல் குற்றத்தை தான் டான்சி நில வழக்கின் போது நான் ஆவணங்களை கேட்டு தர மறுத்ததன் காரணமாக. நீதிமன்றத்தில் வழக்கு தொடுத்து அந்த வழக்கில் ஜெயலலிதா குற்றவாளி என்று தீர்ப்பு கிடைக்கப்பெற்று ஜெயலலிதா சிறைக்குச் சென்றார் என்பதை இன்றைய ஆட்சியாளர்களுக்கு சுட்டிக்காட்ட விரும்புகிறேன். நிச்சயம் அதே நிலை இப்போது ஆட்சியாளர்களுக்கும் ஏற்படும். தி.மு.க. மீது அவதூறு பரப்பினால். பொய் குற்றச்சாட்டுகளை கூறி கெட்ட பெயர் ஏற்படுத்த வேண்டும் என்று முயற்சித்தால் தி.மு.க.வினர் சும்மா விட மாட்டார்கள். சட்டத்தின் துணையோடு. உரிய ஆதாரங்களோடு இந்த மக்கள் விரோத ஆட்சி மீது தகுந்த நடவடிக்கை எடுக்கப்படும். அது மட்டுமல்ல. ஊழலற்ற ஆட்சி தருகிறேன் என்று கூறிவிட்டு. இன்றைக்கு எந்தத் துறையில் பார்த்தாலும் ஊழல் நிறைந்துள்ளது. அவற்றையெல்லாம் எங்கள் சட்டத்துறை ஆதாரத்தோடு சேகரித்து வருகிறோம். ஏற்கனவே நிறைய ஊழல் பட்டியல்களை ஆதாரத்துடன் வைத்துள்ளோம் அவற்றையும் சட்டப்படி உரிய தொடர் நடவடிக்கை எடுத்து மக்கள் விரோத விஜய் ஆட்சியின் மீது உரிய நடவடிக்கை எடுப்போம்.
நூற்றி பதினைந்து நாள்
ரீல்ஸ் ஆட்சி!
இந்த நூற்றி பதினைந்து நாள் ரீல்ஸ் ஆட்சியில் மக்கள் மிகவும் தெளிவடைந்து விட்டார்கள். கொடுத்த வாக்குறுதிகள் எதையும் நிறைவேற்றவில்லை. மக்கள் நலப் பணிகள் முடக்கப்பட்டு கிடப்பில் போடப்பட்டுள்ளன. வளர்ச்சித் திட்டங்கள் ஏதும் முன்னெடுக்கவில்லை. பரந்தூர் விமான நிலைய திட்டம் கைவிடப்பட்டது. இந்த ஆட்சியின் நிர்வாக திறமை இன்மையால் பல்வேறு தொழிற்சாலைகள் அண்டை மாநிலங்களுக்குப் போய் கொண்டுள்ளது. இவையெல்லாம் மக்கள் தினம் தினம் பார்த்துக் கொண்டுதான் இருக்கிறார்கள். இவற்றிற்கெல்லாம் வருகின்ற மதுராந்தகம் மற்றும் தாராபுரம் சட்டமன்ற இடைத்தேர்தலில் மக்கள் தங்கள் பதிலினை தங்களது வாக்குகளின் மூலம் சவுக்கடியாக தெரிவிப்பார்கள். தி.மு.க. கூட்டணி வேட்பாளர்கள் நிச்சயம் வெற்றி பெறுவார்கள். அவர்கள்வெற்றி பெறுவதன் மூலம் இந்த மக்கள் விரோத ஆட்சியாளர்களுக்கு சரியான பாடம் புகட்டப்படும் என்பதை தெரிவித்துக் கொள்கிறேன்.
இவ்வாறு அவர் பேசினார்.
கூட்டத்தில் சென்னை வடக்கு மாவட்ட பொறுப்பாளர் ஆர்.டி.சேகர், வடசென்னை நாடாளுமன்ற உறுப்பினர் டாக்டர் கலாநிதி வீராசாமி, மாநிலங்களவை உறுப்பினர் இரா. கிரி ராஜன், தலைமை செயற்குழு உறுப்பினர் இரா. கருணா,மாநில நிர்வாகிகள் இரா. நரேந்திரன், என். மருது கணேஷ், மாவட்ட நிர்வாகிகள் எஸ்.ஆர்.கமலக்கண்ணன், தயாளன், பொதுக்குழு உறுப்பினர்கள் வே. சிவக்குமார், த.கமலக்கண்ணன் மற்றும் கழக நிர்வாகிகள் ஏராளமானோர் பங்கேற்றனர்.