திருவாரூர் மாவட்டம், திருத்துறைப்பூண்டி ஒன்றியம், ஆலிவலம் கிராமத்தில் நாகராஜன் – பானுமதி இணையரின் மகனாக 2.6.1981 அன்று பிறந்தார்.

நா. இளையராஜா எட்டாம் வகுப்பு மாணவனாக இருந்த நேரத்தில், அன்றைய இளைஞர் அணிச் செயலாளராகப் பொறுப்பில் இருந்த கழகத் தலைவர் தளபதி மு.க. ஸ்டாலின் நாகை மாவட்டத்தில் கிராமம் தோறும் கொடியேற்ற வருகைத் தந்தார்.

ஆர்வத்துடன் அந்த நிகழ்ச்சியில் கலந்து கொண்டு கண்டு களித்த இளையராஜா அன்று முதல் கழகத் தலைவர் மு.க. ஸ்டாலினை தன்னுடைய ஆசானாக ஏற்றுக் கொண்டு களமாடத் தொடங்கினார். பின்னர் பொறியியல் பட்டப் படிப்பினை தஞ்சை சாஸ்திரா பல்கலைக் கழகத்தில் தொடர்ந்த நேரத்தில் 1999ஆம் ஆண்டு நடைபெற்ற நாடாளுமன்றத் தேர்தலில் கழக வேட்பாளருக்காக தன்னுடைய கல்லூரி நண்பர்களுடன் வாக்கு சேகரிக்கும் பணியில் தீவிரமாக ஈடுபட்டார்.

ஆலிவலம் கிராமத்தில் அந்த நாட்களில் பொதுவுடைமை இயக்கம் மட்டுமே செயல்பட்டு வந்த நிலையில் தளபதி நற்பணி மன்றத்தை உருவாக்கி அதன் முதல் கிளையின் செயலாளராகப் பொறுப்பேற்று திறம்படப் பணியாற்றினார். அந்த பத்தாண்டு காலத்தில் திருவாரூர் மாவட்டத்தில் உள்ள 430 கிராமங்களிலும் சுற்றுப் பயணம் மேற்கொண்டு அதிக எண்ணிக்கையில் இளைஞர் அணிக்கு உறுப்பினர்களைச் சேர்த்து தமிழ்நாட்டிலேயே அதிகமாக இளைஞர் அணி உறுப்பினர்களைச் சேர்த்த பெருமையும் பெற்றார். 2012 முதல் 2022 வரை திருவாரூர் மாவட்ட இளைஞர் அணி அமைப்பாளராகப் பொறுப்பேற்று அவர் செய்த இப்பெரும்பணி அனைவராலும் பாராட்டப்பட்டது.

2018ஆம் ஆண்டு கஜா புயல் டெல்டா மாவட்டங்களில் பெரும் சேதம் ஏற்படுத்திய நேரத்தில் கழகத் தலைவர் மு.க. ஸ்டாலின் அவர்கள் மீட்புப் பணிகளை முன்னெடுக்க வேளாங்கண்ணி வந்தபோது, சாலைகளில் மரங்கள் சாய்ந்து போக்குவரத்து இல்லாமல் இருந்த சூழ்நிலையில் 40 கிலோ மீட்டர் தூரம் நடந்தே சென்று பார்வையிட்ட நேரத்தில், இளையராஜா அன்பகம் கலை அவர்களுடன் இணைந்து தலைவர் அவர்களோடு மீட்புப் பணியில் ஈடுபட்டார்.

2022ஆம் ஆண்டில் கழக இளைஞர் அணி துணைச் செயலாளராகப் பொறுப்பேற்று இளைஞர் அணி பணிகளை திறம்பட முன்னெடுத்து வருகிறார். இரண்டாவது இளைஞர் அணி மாநாட்டில் பங்கேற்று சிறப்பாகப் பணியாற்றினார்.

இவரது கழகப் பணியினை பாராட்டிடும் வகையில், தலைமைக் கழகத்தின் சார்பில் நேற்று (19.9.2026), சென்னை, அண்ணா அறிவாலயம் “கலைஞர் அரங்கில்” நடைபெற்ற முப்பெரும் விழாவில், கழகத் தலைவர் மு.க.ஸ்டாலின் அவர்கள் “மு.க. ஸ்டாலின் விருது” வழங்கிச் சிறப்பித்தார்.