சேலம் மாவட்டத்தில் திரு. கிருஷ்ணசாமி, திருமதி மாரியாயி இணையரின் மகனாக 16.10.1937 அன்று பிறந்தவர் திரு. ஜி.கே. சுபாஷ் அவர்கள். அவருடன் பிறந்தவர்கள் இரண்டு சகோதரர்கள், ஐந்து சகோதரிகள்.

பேரறிஞர் அண்ணா, முத்தமிழறிஞர் கலைஞர் போன்ற கழக முன்னோடிகளின் உரைகளைக் கேட்டு கழகக் கொள்கைகளில் ஈர்ப்பு கொண்டு 1953ஆம் ஆண்டில் தன்னை கழகத்தில் இணைத்துக் கொண்டு பணியாற்றத் தொடங்கினார் ஜி.கே. சுபாஷ்.

1965ஆம் ஆண்டு நடைபெற்ற இந்தி எதிர்ப்புப் போராட்டம், விலைவாசி உயர்வு எதிர்ப்புப் போராட்டம், சேலம் நகர கைத்தறிப் போராட்டத்திற்குத் தலைமைத் தாங்கி கடையடைப்பு, இலங்கைத் தமிழர்களுக்கான போராட்டம், பால் கமிஷன் அறிக்கையொட்டி தலைவர் கலைஞர் கைதைக் கண்டித்துப் போராட்டம், ராஜீவ்காந்தி கொடும்பாவி எரித்துக் கைது என கழகம் அறிவித்த அனைத்துப் போராட்டங்களிலும் கலந்து கொண்டு கைதாகி சிறைவாசம் ஏகியவர் ஜி.கே. சுபாஷ்.

சேலம் நகரச் செயலாளராக, பின்னர் மாநகரச் செயலாளராக, மாநகர அவைத் தலைவராக, தலைமைச் செயற்குழு உறுப்பினராக, பல்வேறு பொறுப்புகளை ஏற்றுப் பணியாற்றியுள்ள திரு.ஜி.கே. சுபாஷ், தற்போது மாவட்டக் கழக அவைத் தலைவராகப் பொறுப்பு வகித்து வருகிறார்.

1990ஆம் ஆண்டு சேலம் மாநகரக் கூட்டுறவு வங்கியின் தலைவராகத் தேர்ந்தெடுக்கப்பட்டார். 1996ஆம் ஆண்டில் மாநகராட்சியின் துணை மேயராகப் பொறுப்பேற்று ஐந்தாண்டுகள் பதவி வகித்தார்.

கழகத் துணை அமைப்புகளான தென்னவர் முத்தமிழ் மன்றச் செயலாளர், கேவிகே சாமி நினைவு படிப்பகச் செயலாளர் போன்ற பொறுப்புகளிலும் செயல்பட்டு வந்துள்ளார்.

1983ஆம் ஆண்டு சேலத்தில் நடைபெற்ற மாபெரும் கூட்டத்தில் கலந்து கொண்ட முத்தமிழறிஞர் கலைஞர் “சுபாஷ் இனி சபாஷ்” என்று பாராட்டினார்.

ஜி.கே. சுபாஷ் அவர்களின் துணைவியார் அமிர்தம் அம்மையார். இவர்களுக்கு ஒரு மகன், ஒரு மகள் உள்ளனர்.

இவரது கழகப் பணியினை பாராட்டிடும் வகையில், தலைமைக் கழகத்தின் சார்பில் நேற்று (19.9.2026), சென்னை, அண்ணா அறிவாலயம் “கலைஞர் அரங்கில்” நடைபெற்ற முப்பெரும் விழாவில், கழகத் தலைவர் மு.க.ஸ்டாலின் அவர்கள் “அண்ணா விருது” வழங்கிச்சிறப்பித்தார்.