#Title

விடுமுறை தினங்கள் – பண்டிகைக் காலங்களில், தொலைதூரம் செல்லும் பயணிகளின் இன்னல்களைப் போக்கும் வகையில் ரயில் சேவைகளை மேம்படுத்த வேண்டும்! ஒன்றிய அமைச்சருக்கு – தயாநிதி மாறன் எம்.பி. கடிதம்!

சென்னை, செப்.20–

விடுமுறை தினங்கள், வார இறுதி நாட்கள் மற்றும் பண்டிகை காலங்களில் சென்னை – திருச்சி, சென்னை – கோவை, சென்னை – மதுரை, சென்னை – நெல்லை ஆகிய முக்கிய வழித்தடங்களில் பயணிகள் சிரமமின்றி தங்கள் சொந்த ஊர்களுக்குச் செல்ல ரயில் வசதி மற்றும் கூடுதல் சேவைகளை அதிகப்படுத்தவும் பயணிகளின் பாதுகாப்பான பயணத்திற்கும் ஒன்றிய அரசு நடவடிக்கை எடுக்க, கழகத் தலைவர் திரு.மு.க.ஸ்டாலின் அவர்களின் வழிகாட்டுதலின்படி, கழக நாடாளுமன்ற குழுத் துணைத் தலைவரும் கழக விளையாட்டு மேம்பாட்டு அணிச் செயலாளருமான தயாநிதி மாறன் எம்.பி. வலியுறுத்தியுள்ளார்.

இது குறித்து ஒன்றிய ரயில்வே துறை அமைச்சர் அஸ்வினி வைஷ்ணவ் அவர்களுக்கு எழுதியுள்ள கடித்தத்தில் அவர் குறிப்பிட்டுள்ளதாவது:-–

லட்சக்கணக்கான மக்கள்

நீண்ட தூரம் பயணம்!

லட்சக்கணக்கான மக்களுக்கு நீண்ட தூர பொதுப் போக்குவரத்தின் முதன்மையான மற்றும் கட்டணம் குறைவான பயணமாக ரயில் பயணம் விளங்குகிறது. இருப்பினும், முன்பதிவு செய்யப்பட்ட டிக்கெட்டு களைப் பெறுவது மிகவும் கடினமாகிவிட்டது. முக்கியமான வழித்தடங்களில் முன்பதிவு தொடங்கிய சில நிமிடங்களிலேயே டிக்கெட்டுகள் விற்று தீர்ந்துவிடுகின்றன. அவசரமான, எதிர்பாராத அல்லது தவிர்க்க முடியாத சூழ்நிலைகள் காரணமாக முன்கூட்டியே தங்கள் பயணத்தைத் திட்டமிட முடியாத பயணிகளை இது கடுமையாகப் பாதிக்கிறது.

வார இறுதி நாட்கள் மற்றும் பண்டிகை விடுமுறை நாட்களில், சென்னையில் இருந்து தங்கள் சொந்த ஊர்களுக்கு ஏராளமான பயணிகள் பயணிக்கும்போது மிகவும் சிரமமான சூழலை சந்திக்க நேரிடுகிறது. ஏற்கனவே சாலை மார்க்கத்தில் கடுமையான போக்குவரத்துநெரிசல் நிலவும் நிலையில் (குறிப்பாக கிளாம்பாக்கம் பேருந்து நிலையத்தில் கடும் நெரிசல் நிலவுகிறது.) தனியார் பேருந்து நிறுவனங்கள், பயண நெரிசல் மிகுந்த காலங்களில் வழக்கமான கட்டணத்தைவிட பல மடங்கு கட்டணம் வசூலிப்பதாகத் தகவல்கள் தெரிவிக்கின்றன.

இதன் விளைவாக, ஆயிரக்கணக்கான பயணிகள் தங்கள் கடைசி நேர மற்றும் குறைந்த பயண கட்டண தேர்வாக ரயில் சேவையை நாடுகின்றனர். எனினும், குறைவான சேவைகளாலும் போதுமான ரயில் பெட்டி வசதிகள் இல்லாததாலும் கடும் சிரமங்கள் ஏற்படுகிறது. பொதுப் பெட்டிகளில் (General Compartments) பயணிகள் கூட்டம் அதிகமாவதால் பெண்கள், குழந்தைகள் மற்றும் முதியவர்கள் உட்பட பயணிகள் பல மணிநேரம் நின்று பயணிக்க வேண்டிய கட்டாயத்திற்கு ஆளாகின்றனர். சில சமயங்களில் கழிப்பறைகளை ஒட்டியுள்ள பகுதிகளில் கூட மிகவும் சிரமமான சூழலில் நிற்க நேரிடுகிறது.

தொலைதூரப் பயணங்கள்!

உள்ளூர் ரயில்களில் மட்டுமல்லாமல், தொலை தூரப் பயணங்களிலும் படிக்கட்டுகளில் தொங்கிக்கொண்டு பயணிக்கும் (Footboard Travel) நிகழ்வுகளை நாம் அதிகமாகக் காண்கிறோம். இந்த நெரிசல் காரணமாக, முன்பதிவு செய்யாத பயணிகள் முன்பதிவு செய்யப்பட்ட ரயில் பெட்டிகளுக்குள் (Reservation Coach) நுழைகின்றனர். இதனால் முறையான முன்பதிவு செய்திருக்கும் பயணிகளுடன் தேவையற்ற வாக்குவாதங்கள் ஏற்படுகின்றன. இத்தகைய நிகழ்வுகளை தனிப்பட்ட பயணிகளுக்கு இடையிலான மோதல்களாக மட்டும் பார்க்கக்கூடாது.

இதன் அடிப்படைப் பிரச்சனை, பயணிகள் எண்ணிக்கைக்கு ஏற்ப போதுமான வசதிகள் அல்லது அதிக எண்ணிக்கையிலான ரயில் பெட்டிகள் இல்லாததே ஆகும். சாதாரண நாட்களில் பயண நெரிசல் மிகுந்த நேரங்களிலும், நகரங்களில் வசிப்பவர்கள் பண்டிகைக் காலங்களில் தங்கள் சொந்த ஊர்களுக்குத் திரும்பும் பயணக் காலங்களிலும் பிரச்சனை களை தொடர்ந்து சந்திக்க நேரிடுகிறது.

உங்களுக்கு நினைவிருக்கலாம், நெரிசலைக் குறைக்க நெரிசல் மிகுந்த நேரங்களில் (Peak Hours) கூடுதல் ரயில்களை இயக்குவது மற்றும் அனைத்து ரயில்களிலும் ‘மூடிய கதவு அமைப்பை’ (Closed Door System) செயல்படுத்துவதுபோன்ற விஷயங்களை, 11.06.2025, 31.05.2022 மற்றும் 17.08.2019 தேதியிட்ட கடிதங்கள் மூலம் அமைச்சகத்தின் கவனத்திற்குக் கொண்டு வந்துள்ளேன்.

மேலும் நாடாளுமன்றத்திலும் பலமுறை இது குறித்துப் எடுத்துரைத்துள்ளேன். பட்ஜெட் முன்மொழிவு களில் சேர்ப்பதற்கான ஆலோசனைகள் கோரப்பட்டபோது, மாண்புமிகு நிதியமைச்சரிடமும் இதே கோரிக்கையை முன்வைத்திருந்தேன். சென்னை கோட்டத்தின் கீழ் வரும் நாடாளுமன்ற உறுப்பினர்களுடனான பல கூட்டங்களில், தெற்கு ரயில்வேயின் பொது மேலாளரின் கவனத்திற்கும் இக்கோரிக்கை கொண்டு செல்லப்பட்டுள்ளது.

கூடுதல் ரயில்களை

இயக்க வேண்டும்!

எனவே தொடர் விடுமுறைகள், பண்டிகை காலங்கள் மற்றும் பயணிகள் வருகை வழக்கத்தை விட அதிகமாக இருக்கும் என்று கணிக்கக்கூடிய மற்ற நாட்களிலும் தமிழ்நாட்டில் சென்னை – திருச்சி, சென்னை – கோவை, சென்னை – மதுரை, சென்னை – நெல்லை ஆகிய முக்கிய வழித்தடங்கள் மற்றும் அதிக தேவை உள்ள வழித்தடங்களில் கூடுதல் ரயில்களை இயக்க வேண்டும்.

பயணிகளின் எண்ணிக்கை மற்றும் கடந்தகாலத் தேவையின் அடிப்படையில், அதிக தேவை உள்ள வழித்தடங்களில் இயங்கும் ரயில்களில் முன்பதிவில்லாத பொதுப் பெட்டிகளின் (General Coaches) எண்ணிக்கையை அதிகரிக்க வேண்டும்.

செயல்பாட்டு ரீதியாகச் சாத்தியமான இடங்களில், அதிக பயன்பாட்டில் உள்ள வழித்தடங்களில் இயங்கும் பொருத்தமான ரயில்களில் குறைந்தது 10 முன்பதிவு செய்யப்படாத பெட்டிகளை இணைக்க வேண்டும்.

முன்பதிவு மற்றும் பயணிகள் குறித்த கடந்தகாலத் தரவுகளைப் பயன்படுத்தி, மிக அதிக தேவை இருக்கும் காலங்களைக் கண்டறிந்து, முன்கூட்டியே கூடுதல் சேவைகள் மற்றும் பெட்டிகளை வழங்கும் வகையிலான ‘தேவை-சார்ந்த முன்கணிப்பு அமைப்பை’ (Predictive Demand-Based System) உருவாக்க வேண்டும்.

கூடுதல் வசதிகள் தேவை என்பது தெளிவாகத் தெரியும் வகையில் அதிக பயன்பாட்டில் உள்ள ரயில் வழித்தடங்களுக்குக் கூடுதல் கவனம் செலுத்த வேண்டும்.

நீடித்த விடுமுறை நாட்களில் போதுமான இடவசதி இருப்பதைஉறுதி செய்ய வேண்டும். இதன் மூலம் பயணிகள் பாதுகாப்பற்ற மற்றும் கடும் நெரிசல் மிகுந்த சூழலுக்குத்தள்ளப்படுவது தவிர்க்கப்படும். பயணிகளின் பாதுகாப்பைக் கருத்தில் கொண்டு, அனைத்து ரயில் பெட்டிகளிலும் ‘மூடிய கதவு அமைப்பை செயல்படுத்த வேண்டும்.

இவ்வாறு தயாநிதி மாறன் எம்.பி. கடிதத்தில் கேட்டுக் கொண்டுள்ளார்.

- தாராபுரம் சட்டமன்ற தொகுதி இடைத் தேர்தல் சம்பந்தமாக திருப்பூர் கிழக்கு மாவட்டத்திற்குக்குட்பட்ட ஒன்றிய, நகர, பேரூர் கழக இளைஞர் அணி அமைப்பாளர்கள், துணை அமைப்பாளர்கள் ஆலோசனைக் கூட்டம் கழக இளைஞர் அணி துணை செயலாளர், ஈரோடு நாடாளுமன்ற உறுப்பினர் கே.இ.பிரகாஷ் தலைமையில் நடைபெற்றது. இக்கூட்டத்தில் மாவட்ட கழக செயலாளர் இல.பத்மநாபன் கலந்து கொண்டு தேர்தல் பணிகள் குறித்த ஆலோசனைகளை வழங்கினார். இதில் மாவட்ட கழக துணை செயலாளர் ராசி கே.ஆர்.முத்துக்குமார், மாவட்ட இளைஞர் அணி அமைப்பாளர் சா.யுவராஜ், துணை அமைப்பாளர்கள் த.ஆரோன் செல்வராஜ், ந.வீரகாளி வெங்கடேஷ், து.சக்திவடிவேல், சு.பத்மநாபன், மணிவாசகம், சு.பாலகிருஷ்ணன், கே.எஸ்.அர்ஷத் உசேன், ரா.ராஜராஜன் உள்பட பலர் கலந்து கொண்டனர்.