சென்னை, செப். 21 –
“நடைபெற உள்ள இடைத்தேர்தல், ஜனநாயகம் மரணமடைந்ததால் வரும் தேர்தல்!” “இயக்கமும் கொள்கையும்தான் பெரிது என்று நினைப்பவர்கள் உடன்பிறப்புகள்; அவதூறு பரப்பு வோருக்கு நாங்கள் வட்டியும் முதலுமாகத் திருப்பித் தரும் நேரம் விரைவில் வரும்!” என்றும் கழக முப்பெரும் விழாவில் விருதுகள் வழங்கி உரையாற்றுகை யில் கழகத் தலைவர் மு.க.ஸ்டாலின் அவர்கள் குறிப்பிட்டார்.
சென்னை – அண்ணா அறிவாலயத்தில் உள்ள கலைஞர் அரங்கில் நேற்று முன்தினம் (19–9–2026), நடைபெற்ற கழக முப்பெரும் விழாவில் கழகத் தலைவர் மு.க.ஸ்டாலின் அவர்கள் ஆற்றிய உரை வருமாறு: –
பகுத்தறிவுப் பகலவன் தந்தை பெரியாரின் பிறந்த நாள், பேரறிஞர் அண்ணாவின் பிறந்த நாள், அறிவியக்கமாம் திராவிட முன்னேற்றக் கழகம் உதயமான நாள் – இந்த மூன்றையும் இணைத்து, முப்பெரும் விழாவாகக்கொண்டாடி, ஒவ்வொரு ஆண்டும் செப்டம்பர் மாதத்தையே நாம் ‘திராவிட மாதமாக’க் கொண்டாடிக் கொண்டிருக்கிறோம்!
ஓய்வெடுக்க மனம் கேட்கவில்லை
முப்பெரும் விழாவில் பங்கேற்கிறேன்!
கடந்த 15–ஆம் தேதி நடைபெற விருந்த இந்த விழா, திடீரென்று எனக்கு ஏற்பட்ட காய்ச்சல் காரணமாக ஒத்திவைக்கப்பட்டு இன்றைக்கு நடந்து கொண்டிருக்கிறது. மருத்துவர்கள் என்னை இன்னும்சில நாட்கள் ஓய்வில் இருக்க வேண்டும் என்று சொன்னார்கள். ஆனால், எனக்கு மனசு கேட்கவில்லை. அதனால் தான், தந்தை பெரியார் பிறந்தநாளன்றே அய்யாவின் சிலைக்கு மாலை அணிவித்துவிட்டு, சமூகநீதி நாள் உறுதிமொழி
எடுத்தேன். இன்று இந்த முப்பெரும்விழாவுக்கும் வந்திருக்கிறேன்.
தலைவர் கலைஞர் தொடங்கி வைத்த இந்த முப்பெரும் விழாக் கொண்டாட்டத்தில், கழகத்திற்காக உழைத்த தீரர்களுக்கு தொடர்ந்து விருதுகளை வழங்கி வருகிறோம். அந்த வகையில், இந்த ஆண்டுக்கான விருதுகளைப் பெற்றுள்ளவர்களின் சிறப்புகளை, அவர்கள் ஆற்றியிருக்கும் அரும்பணிகளை, தியாகப் பணிகளை இங்கு ஒளிபரப்பப்பட்ட வீடியோவில்
நீங்கள் பார்த்தீர்கள்.
விருது பெற்றவர்களை
வாழ்த்துகிறேன்! பாராட்டுகிறேன்!
•
தந்தை பெரியார் விருதைப் பெற்றுள்ள அண்ணன் கு. செல்லப்பா அவர்கள் – இந்தித் திணிப்பு எதிர்ப்புப் போராட்டத்தின் போது கைதாகி, 81 நாட்கள் சிறையில் இருந்த பெருமைக்குரியவர்.
•
பேரறிஞர் அண்ணா விருதைப்பெற்றுள்ள சேலம் ஜி.கே.சுபாஷ் அவர்கள்– தலைவர் கலைஞர் அவர்களே, “அவரை சுபாஷ் என்று சொல்வதைவிட “சபாஷ்” என்றுதான் பாராட்டுவேன்” என்று சொல்லியிருக்கிறார்!