இராமநாதபுரம் மாவட்டம் மண்டபம் பகுதியில் திரு. சேக் அப்துல் காதர் – திருமதி. முகமது கனிமா பீவி ஆகியோரின் மகனாகப் பிறந்தவர் திரு. எஸ். அகமது தம்பி. பள்ளி இறுதி வகுப்பு வரை படித்த இவர் பள்ளிக் காலத்திலேயே கழகக் கொள்கைகளில் ஈடுபாடு கொண்டவராக இருந்தவர்.

பள்ளியில் படிக்கும் காலத்தில் அண்ணா மன்றச் செயலாளராகவும், பின்னர் மண்டபம் மாணவர் தி.மு.கழகச் செயலாளராகவும் பணியாற்றி உள்ளார்.

தொடர்ந்து 1972ஆம் ஆண்டு மண்டபம் ஒன்றியச் செயலாளராகப் பொறுப்பேற்று பணியாற்றிய இவர் இராமநாதபுரம் மாவட்டக் கழக துணைச் செயலாளராக நான்கு முறை தேர்வு செய்யப்பட்டுப் பணியாற்றியுள்ளார்.

மூன்று முறை கழகப் பொதுக்குழு உறுப்பினராகப் பணியாற்றியுள்ள இவர் தற்போது வரை கழகச் செயற்குழு உறுப்பினராகப் பொறுப்பேற்றுப் பணியாற்றி வருகிறார்.

இராமநாதபுரம் மாவட்ட மாநாடு நடைபெற்ற நேரத்தில் கழகத் தலைவர் முத்தமிழறிஞர் கலைஞர் அவர்கள் இவரை தொண்டர் படைத் தலைவராக நியமித்தார். அந்தப் பணியையும் சிறப்பாகச் செய்தவர் அகமது தம்பி.

மண்டபம் நகர கூட்டுறவு வங்கித் தலைவராகவும், அக்ரோ கூட்டுறவுத் தலைவராகவும் பொறுப்பேற்று சிறப்பாகப் பணியாற்றி நற்பெயர் பெற்றார்.

கழகம் அறிவித்த அனைத்துப் போராட்டங்களிலும் கலந்து கொண்டு சிறைவாசம் ஏகிய அகமது தம்பி மிசாவில் கைதாகி மதுரை சிறையில் ஓராண்டு காலம் இருந்துள்ளார்.

இவருக்குத் திருமணம் முடிந்து ஒரு மாதத்தில் இலங்கைத் தமிழர்களுக்கு ஆதரவான போராட்டத்தில் கலந்து கொண்டு திருச்சி சிறையில் 25 நாட்கள் இருந்துள்ளார்.

முத்தமிழறிஞர் தலைவர் கலைஞர் தலைமையில் 1981ஆம் ஆண்டு இவருக்கும் திருமதி. ஜமுனா ராணி அவர்களுக்கும் திருமணம் நடைபெற்றது.

இவரது மாமனார் திரு. சேக் சுல்தான் அவர்கள் கழகத்தில் பல்வேறு பொறுப்புகள் வகித்ததோடு, மிசா உள்ளிட்ட பல்வேறு போராட்டங்களில் கலந்து கொண்டு சிறைச் சென்றவர்.

இவரது கழகப் பணியினை பாராட்டிடும் வகையில், தலைமைக் கழகத்தின் சார்பில் நேற்று (19.9.2026), சென்னை, அண்ணா அறிவாலயம் “கலைஞர் அரங்கில்” நடைபெற்ற முப்பெரும் விழாவில், கழகத் தலைவர் மு.க.ஸ்டாலின் அவர்கள் “பேராசிரியர் விருது” வழங்கிச் சிறப்பித்தார்.