டாக்டர் கனிமொழி என்.வி.என். சோமு திராவிட இயக்கத் தூண்களில் ஒருவரான என்.வி. நடராசன் அவர்களின் பெயர்த்தி, மேனாள் மக்களவை உறுப்பினர், ஒன்றிய அமைச்சர் என்.வி.என். சோமு – உமாதேவி சோமு இணையரின் மகள் டாக்டர் கனிமொழி சோமு அவர்கள் 18.10.1973 அன்று பிறந்தார்.

தன்னுடைய தாத்தா என்.வி.நடராசன் அவர்களிடமும், தந்தை என்.வி.என். சோமு அவர்களிடமும் தந்தை பெரியார், பேரறிஞர் அண்ணா, முத்தமிழறிஞர் கலைஞர் ஆகியோரின் பகுத்தறிவுச் சிந்தனைகள், அரசியல் சிந்தனைகளைக் கற்றுக் கொண்ட கனிமொழி அக்கருத்துக்களால் ஈர்க்கப்பட்டு தன்னைக் கழகப் பணிகளில் ஈடுபடுத்திக் கொண்டு செயல்பட்டு வருகிறார்.

சென்னை கீழ்ப்பாக்கம் மருத்துவக் கல்லூரியில் எம்.பி.பி.எஸ். கல்வியும், ராமச்சந்திரா மருத்துவக் கல்லூரியில் மகப்பேறு மற்றும் மகளிர் மருத்துவத்தில் எம்.எஸ். முதுநிலைப் பட்டம் பெற்றவர்.

திரு. என்.வி.என். சோமு அவர்கள் “இலட்சியத் தந்தை” என்ற நூலை எழுதத் தொடங்கினார். இடையில் அவர் ஒன்றிய பாதுகாப்புத்துறை இணையமைச்சராகப் பொறுப்பு வகித்த நேரத்தில் விமான விபத்தில் உயிர் நீத்தார்.

தன் தந்தை விட்டுச் சென்ற பணியான அந்த நூலை நிறைவு செய்ய தான் முயன்று அந்த நூலை முழுமைப்படுத்தி 2012ஆம் ஆண்டு என்.வி. நடராசன் நூற்றாண்டு விழாவில் கழகத் தலைவர் மு.க. ஸ்டாலின் முன்னிலையில் முத்தமிழறிஞர் கலைஞர் அவர்கள் வெளியிட்டார்.

2011ஆம் ஆண்டு மாதவரம் சட்டமன்றத் தொகுதியிலும், 2016ஆம் ஆண்டு தியாகராய நகர் சட்டமன்றத் தொகுதியிலும் கழக வேட்பாளராகப் போட்டியிட்டு வெற்றி வாய்ப்பை இழந்தார். 2021ஆம் ஆண்டில் கழகத் தலைவர் மு.க. ஸ்டாலின் அவர்களால் மாநிலங்களவை வேட்பாளராக அறிவிக்கப்பட்டு வெற்றி பெற்றார்.

மாநிலங்களவையில் உறுப்பினராகப் பொறுப்பேற்ற பிறகு 751 விவாதங்களில் பங்கேற்றதுடன், 477 கேள்விகள் எழுப்பியதுடன் 6 தனி நபர் மசோதாக்களையும் முன்மொழிந்துள்ளார்.

கழக மருத்துவ அணியின் முதல் செயலாளராகப் பொறுப்பேற்ற டாக்டர் கனிமொழி சோமு தற்போது மருத்துவ அணித் தலைவராகப் பொறுப்பு வகிக்கிறார்.

நாடாளுமன்ற மாநிலங்களவையில் தமிழ்நாட்டை பிரதிநிதித்துவப்படுத்திய கனிமொழி சோமு, சுகாதாரம், பெண்கள் நலம், கூட்டாட்சித் தத்துவம், கல்வி, சமூக நீதி மற்றும் தமிழ்நாட்டின் உரிமைகள் போன்ற பல்வேறு துறைகளில் தீவிரமாகக் குரல் கொடுத்துள்ளார்.

டாக்டர் கனிமொழி சோமு அவர்களுக்கு டாக்டர் சோமு சுப்பிரமணியன் என்ற மகனும், வழக்கறிஞர் வேதிகா என்ற மகளும் உள்ளனர்.

இவரது கழகப் பணியினை பாராட்டிடும் வகையில், தலைமைக் கழகத்தின் சார்பில் நேற்று (19.9.2026), சென்னை, அண்ணா அறிவாலயம் “கலைஞர் அரங்கில்” நடைபெற்ற முப்பெரும் விழாவில், கழகத் தலைவர் மு.க.ஸ்டாலின் அவர்கள் “பாவேந்தர் விருது” வழங்கிச்சிறப்பித்தார்.