1998 ஆம் ஆண்டில் கல்கி நினைவுகள் என்ற நூலைக் கல்கியின் துணை ஆசிரியராகவும், பின்னாளில் “சத்ய கங்கை” ஆசிரியராகவும் பணியாற்றிய எழுத்தாளர் பகீரதன் எழுதி வெளியிட்டார்.

இந்நூலில் திருவாளர் கல்கியுடன் தொடர்பு கொண்ட ஆளுமைகள் அனைவர் பற்றிப் பல தகவல்கள் இடம் பெற்றுள்ளன.

21 ஆவது பகுதியில் பெரியாரும் கல்கியும் என்ற தலைப்பில் நூலாசிரியர் கல்கி இல்லத் திருமண நிகழ்ச்சியில் பெரியார் கலந்து கொண்டது பற்றி ஒரு பகுதியே இடம் பெற்றுள்ளது.

விடுதலை போராட்டக் காலத்தில் காங்கிரஸ் நிருவாகியாகப் பணியாற்றியதாகத் தன்னைப் பற்றிக் குறிப்பிடும் நூலாசிரியர், தலைவர் காமராசர் பற்றிய எவ்விதத் தகவல்களையும் இந்த நூலில் இடம் அளிக்கவில்லை.

நூலாசிரியர் இராஜாஜி சார்பு நிலையில் இருந்த காங்கிரசு விரும்பி ஆவார். நூலின் ஒரு பகுதியில் ( பக்கம் 214) “ராஜாஜிக்கு லஷ்மணனாக இருந்தார் கல்கி அவர்கள்.

கல்கி அவர்களுக்கு லஷ்மணனாக இருந்தேன் நான்.” நீதிக் கட்சித் தேர்தலில் தோல்வி அடைந்ததும், “கல்கி அவர்களின் இளரத்தப் பேனா குதித்து எழுந்தது.”

“பொப்பிலி கட்சி, என்று அதை வாரந்தோறும் ‘இறக்கி ‘ பரிகசித்து வந்த கல்கியின் பேனா, இப்போது ‘’ வீழ்ந்தான் அரக்கன்” என்று தலைப்பிட்டு, வீழ்ந்த (பொப்பிலி) அரக்கன் மீது (சிவ ) தாண்டவமே ஆடிவிட்டது.”( பக்கம் 241).

இந்த நூல் வெளியீட்டு விழாவில் பங்கேற்ற முன்னாள் அமைச்சர் கே.ஏ.கிருட்டிணசாமிதான், “இந்த நூலை நீங்கள் வாங்கிப் படிக்க வேண்டும்” என்று என்னிடம் கூறினார்.

அக்காலக்கட்டத்தில் நாள்தோறும் அறிவாலயத்தில் கலைஞரோடு நடைபயிற்சி முடித்துவிட்டு இராதா கிருஷ்ணன் சாலையில் உள்ள சரவணா உணவகத்திற்குத் தேநீர் குடிப்பதற்கு வருவேன். திரு.கே.ஏ.கேவும் வருவார்.

பகீரதன் பணிபுரிந்த இடம் அவாள் கருத்துகளைத் தூக்கிப் பிடிக்கும் இடம் என்பதால்தான் எச்சரிக்கையுடன் படிக்க வேண்டும் என்று கே.ஏ.கே கோடிட்டுக் காட்டினார்.

கணியூர் குடும்பம் அல்லவா?

நூலில் பல பகுதிகளில் பெரியார் பற்றிய கருத்துக்கள் இடம் பெற்றுள்ளன. “கல்கி அவர்கள் தம்முடைய வாழ்க்கையை ஒரு காங்கிரஸ் தொண்டனாகத் திருச்சியில் தொடங்கினார்.”

“தமிழ்நாடு காங்கிரஸ் கமிட்டியில் மாதச் சம்பளம் பிரச்சாரகராக அவர் இருந்தார்.” “அந்த நாளில் தமிழ் நாட்டில் காங்கிரஸை வளர்த்த பெரியோர்களில் முக்கியமானவராக திரு. திரு.ஈ.வெ.ரா விளங்கினார்.”

“கல்கி பணிக்கு வந்தபோது திரு.ஈ.வே.ரா தமிழ்நாடு காங்கிரஸ் தலைவராக இருந்தார்.” “அப்போதே பெரியாரின் அன்புக்கும் நம்பிக்கைக்கும் பாத்திரமாக கல்கி அவர்கள் பணியாற்றினார்.” “திரு.நாயக்கர் கல்கி அவர்களைத் தம்முடைய நண்பராகவே நடத்தி வந்தார்.”

“அந்த நட்பும் மரியாதையும் பெரியார் அவர்கள் காங்கிரஸிலிருந்து பிரிந்து சுயமரியாதை இயக்கம் கண்ட போதும் மாறாமலே இருந்தது.” “அப்புறமும் தொடர்ந்து இருந்து வந்தது. பெரியார் அவர்கள் ராஜாஜியின் நம்பிக்கைக்கும் அன்புக்கும் பாத்திரமாக இருந்தார்.”

“திருச்செங்கோட்டில் காந்தி ஆசிரமம் தொடங்கியதும், ஈ.வே.ரா அதைத் தொடங்கி வைத்ததுடன், ராஜாஜிக்குத் துணையாகயிருந்து பணியாற்றினார்.”

“கல்கி அவர்கள் தன்னுடைய அருமை மகள் ஆனந்திக்குத் திருமணம் நடத்த ஏற்பாடு செய்தார்.....

பெரியார் அவர்களையும் திருமணத்துக்கு அழைக்க விரும்பினார். பெரியாரை அவரது சிந்தாதிரிப்பேட்டை இல்லத்தில் கல்கி தங்கள் வீட்டிற்கு நேரில் வந்து திருமண அழைப்பிதழ் கொடுக்க விரும்புவதாகக் கூறினேன்.

“என்னை நன்கு அறிந்திருந்த பெரியார் நாளைக்கு இரவு எட்டு மணிக்கு வரச் சொன்னார்.”

“ பெரியாரிடம் விடை பெற்றுக் கொண்டேன். அவ்வளவு பெரிய தலைவர் ஊஞ்சலை விட்டு இறங்கி வாசல் வரை வந்து வழி அனுப்பினார்.”

“பெரியாரின் அந்தப் பண்பையும், நாகரிகத்தையும் பார்த்து வாழ்க்கையில் ஒருவர் எப்படி நடந்து கொள்ள வேண்டும் என்பதை அன்று தான் புரிந்து கொண்டேன்”

“ஒரு பல்கலைக்கழகம் சொல்லிக் கொடுக்க முடியாத பண்பையும் நாகரிகத்தையும் பெரியார் ஒரு சில விநாடிகளில் எனக்குப் போதித்துவிட்டார்.”

மறு நாள் கல்கி அவர்கள் நேரில் சென்று பெரியாருக்குத் திருமண அழைப்பிதழை வழங்கினார். நானும் உடன் சென்றேன்.

திருமணவிழா அழைப்பிதழைப் பெரியாரிடம் அளித்துவிட்டுப் பகல் 12 மணி அளவில் வரும்படி கல்கி வேண்டுகோள் வைத்தார்.

காலையில் ராஜாஜி உட்படப் பல தமிழ்நாட்டின் ஆளுமைகள் வைதீகமுறைப்படி நடைபெறும் திருமணத்தில் கலந்து கொள்கின்றனர்.

கல்கி விருப்பத்திற்கு ஏற்ப பெரியார் 12 மணிக்குமணவிழா இடத்திற்கு செல்கிறார். கலைவாணர் என்.எஸ்.கே.டி.ஏ.மதுரம் இணைந்து பெரியாரை வரவேற்கிறார்கள். “தன் மகள் ஆனந்தியையும்,திரு.சதாசிவம் அவர்களின் சுவீகாரப் புத்திரனாக இருந்த அவருடைய மருமான், மாப்பிள்ளை ராமசந்திரனையும் கல்கி அவர்கள் அழைத்து வந்தார் .”

“பெரியாருக்கு நமஸ்காரம் செய்யச் சொன்னார்.”

பெரியார் சட்டென்று” இருங்கள் , இருங்கள்”என்று சொல்லி கல்கி அவர்களைப் பார்த்தார்.” உள்ளே இருந்து வீபூதி குங்குமம் கொண்டு வரச்சொன்னார் கல்கி.

‘மணமகள் ஆனந்தியும், ராமசந்திரனும் பெரியார் திருவடியில் நமஸ்காரம் செய்தார்கள்.” “தம்மை வணங்கிய மணமக்களை இருவரையும் வாழ்த்தி அவர்கள் நெற்றியில் திருநீற்றை இட்டார்.” “அந்த கண்கொள்ளாக் காட்சியைப் படம் எடுத்தார்கள். “பளிச் பளிச் “என்று கேமராக்கள் மின்னின.”

“இந்தக் காட்சியை கல்கி ஏடு வெளியிட்டது.

அச்சிற்குப் போவதற்கு முன்பு ஆசிரியர் கல்கியின் பார்வைக்குச் சென்றது.”

“இதை யார் எழுதிச் சேர்த்தது? என்று கேட்டார். நான் பதில் சொல்லாமல் நின்று கொண்டிருந்தேன்.”

“பகீரதன்! பெரியார் என் மீது உள்ள அன்பின் காரணமாகத்தான் என் மகள் திருமணத்திற்கு வந்தார்.”

“அவர் நாகரிகமும், மனித நேயமும் உள்ளவர். அவர் நம் நாட்டு வைதீக முறையில் நடைபெறும் திருமணத்தை வன்மையாக கண்டித்துப் பேசி வருகிறார்.”

“அவருடைய லட்சியத்தையும், கொள்கையும் மீறித் தமிழ்நாட்டின் பராம்பரியமான சம்பிரதாயப்படி குழந்தைகளுக்குத் திருநீறு இட்டு வாழ்த்தினார்.”

“பெரியாருடைய அன்பு தான் அந்த காரியத்தைத் தூய்மையுள்ளத்துடன் செய்ய வைத்திருக்கிறது. நாம் கேட்காமலே அவர் நமது வைதீக முறைப்படி வாழ்த்தியது நட்பின் சிகரம்.”

“இந்த நிகழ்ச்சியைப் பத்திரிகையில் எழுதி பெரியார் அவர்களுடைய குறிக்கோள்களுக்கும் லட்சியத்துக்கும் மாசு ஏற்படுத்தலாமா?”

“அவருக்குத் தெரிந்த லெளகிமமும், இங்கிதமும் உங்களுக்குத் தெரியவில்லையே? என்று சொல்லி அந்த பாராவை அடித்து எடுத்து விட்டார்.”

“பெரியாருடைய கொள்கைக்கும் லட்சியத்துக்கும் மாசு ஏற்படாமல் கல்கி அவர்கள் நடந்து கொண்ட அந்த உன்னதப் பண்பாட்டை இப்போது நினைத்து பார்க்கிறேன்.”..

“பெரியாரைப் பண்பாடும், நாகரிகமும் நிறைந்த குருவாக ஏற்றுக் கொண்ட கல்கி அவர்கள் தம் வாழ்நாள் முழுவதும் அவரை அந்த குரு பீடத்திலேயே மனதுக்குள் வைத்து வழிபட்டு வந்தார்.”

“இது கல்கி அவர்களுக்கு மட்டுமே தெரிந்த ரகசியம்.”

“அதை அன்று என்னிடம் சொல்லி நான் எதிர்காலத்தில் எப்படி நடந்து கொள்ள வேண்டும் என்று என்னையும் நெறிப்படுத்தினார்.” (பக்க்ம் 274 - 283) புகழ் பெற்ற எழுத்தாளர் தீவிர வைதீகப் பாதுகாவலர் கல்கி பெரியாரரை எப்படிப் போற்றி மதித்துள்ளார் என்று இன்றைய கடப்பாறைகளுக்குத் தெரியாதல்லவா! புத்தர் தனது கொள்கை பயணத்தில் தன்னை எதிர்த்து வர்களைக்கூட அன்பினால் அணைத்தார்.

பெரியார் தனது நீண்டத் தொண்டறப் பயணத்தில் தனது கொள்கையை எதிர்த்த வர்களிடம் எப்படிச் சான்றாண்மையோடு நடந்து கொண்டார் என்ப தற்கு பகீரதன் குறிப்பிடும் கல்கிவீட்டுத் திருமண நிகழ்வுஒரு தக்கச் சான்றாகும்.

உலகச் சிந்தனையா ளர்களின் வரிசையில் சான்றாண்மையின் உச்சம் தான் நமது தந்தை பெரியார்.