திருச்சியில் திரு. ஆர். நடேசன், திருமதி. தனபாக்கியம் இணையருக்கு 6.6.1955ஆம் ஆண்டு பிறந்தவர் திருச்சி சிவா. குழந்தைப் பருவத்திலேயே தந்தையை இழந்த இவரை வளர்த்து, ஆளாக்கி படிக்க வைத்தவர் இவருடைய தாயார்.

சுயமரியாதை உணர்வையும், திராவிட இயக்கப் பற்றையும் ஊட்டி வளர்த்த இவரது தாயார், சர். ஏ.டி. பன்னீர்செல்வம் தொடங்கி, தந்தை பெரியார், அறிஞர் அண்ணா, முத்தமிழறிஞர் கலைஞர் ஆகியோர் குறித்தும் அவர்களது சிந்தனைகள் குறித்தும் சிறுவயது முதலே திருச்சி சிவாவுக்குச் சொல்லிக் கொடுத்து வளர்த்தார்.

தன்னுடைய 15ஆவது வயதில் திருச்சி டவுன் ஹாலில் தந்தை பெரியாரின் உரையைக் கேட்டு திராவிட இயக்கத்தின்பால் தனக்கு பெரும் ஈர்ப்பு ஏற்பட்டதாக திருச்சி சிவா கூறுகிறார்.

திருச்சியில் அவர் படித்த காலத்தில் பள்ளியிலும், கல்லூரியிலும் உடன் படித்த திராவிட இயக்க உணர்வுள்ள மாணவர்கள் அவரோடு நெருக்கமானார்கள். விடுதியில் மாணவர்கள் கூடி நடத்தும் கூட்டங்களில் பங்கேற்று உரை நிகழ்த்தியதோடு, மாணவர் தி.மு.க. நடத்திய கூட்டங்களிலும் உரை நிகழ்த்தத் தொடங்கினார்.

எம்.ஏ. ஆங்கில இலக்கியம் இரண்டாம் ஆண்டு படித்துக் கொண்டிருந்தபோது அவசர நிலை காலத்தில் மிசா சட்டத்தில் கைது செய்யப்பட்டு திருச்சி மத்திய சிறையில் ஓராண்டு காலம் அடைபட்டிருந்தார். இறுதித் தேர்வு எழுத வந்தபோது துப்பாக்கி ஏந்திய ஆறு போலீசார் பாதுகாப்போடு பரோலில் தேர்வு எழுத வந்ததை மறக்க முடியாத நினைவாகக் கருதுகிறார்.

ஐ.ஏ.எஸ். கனவோடு இருந்த திருச்சி சிவா, முத்தமிழறிஞர் கலைஞர் அவர்களைச் சந்தித்த பின் அவரால் ஈர்க்கப்பட்டு முழு நேரக் கழகப் பணியில் ஈடுபடத் தொடங்கினார்.

1978 திருச்சி மாவட்ட மாணவர் அணி அமைப்பாளராகத் தொடங்கி இளைஞர் அணி அமைப்புக்குழு உறுப்பினராக, இன்றைய கழகத் தலைவர் தளபதி மு.க.ஸ்டாலினோடு இளைஞர் அணி துணைச் செயலாளராக, மாணவர் அணிச் செயலாளராக , கொள்கை பரப்பு செயலாளராக , இப்போது கழக துணைப் பொதுச் செயலாளர் என பல்வேறு பொறுப்புகளில் இருந்து முழு நேர இயக்கப் பணியாற்றி வருகிறார்.

திருச்சியில் 1982 இளைஞர் அணி இரண்டாம் ஆண்டு நிறைவு மாநாட்டின் செயலாளராக மறைந்த அன்பில் பொய்யாமொழியோடு இணைந்து நடத்துகின்ற வாய்ப்பு முக்கியமான ஒரு நிகழ்வு என குறிப்பிடும் இவர் 1996ல் புதுக்கோட்டை தொகுதி நாடாளுமன்ற மக்களவை உறுப்பினராக ஒரு முறையும், இப்போது மாநிலங்களவையில் கழகக் குழுத் தலைவராவும் பணியாற்றி வருகிறார். மனைவி தேவிகாராணி மறைந்து 12 ஆண்டுகள் ஆகின்றன. இரண்டு மகள்களும் ஒரு மகனும் உள்ளார்கள்.

மிசா சிவா என்ற தன் பெயரை கலைஞர் தன் கையால் திருச்சி சிவா என்று எழுதி இளைஞர் அணி அமைப்புக் குழு உறுப்பினராக அறிவித்த நாள் தொட்டு அரசிதழில் அச்சேறி ஐ.நா. மன்றம் வரை அந்த பெயரே நிலைத்து விட்டதாக கூறும் இவர் தன்னை அரவணைத்து, உச்சி முகர்ந்து பாராட்டி, ஊக்கமும் உரமும், உயர்வும் தந்து தனக்கு “எல்லாம் ஆன” தலைவர் கலைஞர் பெயரால் விருது வழங்கப்படுவதை வாழ்வின் பெரும்பேறாக கருதுவதாக குறிப்பிடுகிறார்.

இவரது கழகப் பணியினை பாராட்டிடும் வகையில், தலைமைக் கழகத்தின் சார்பில் நேற்று (19.9.2026), சென்னை, அண்ணா அறிவாலயம் “கலைஞர் அரங்கில்” நடைபெற்ற முப்பெரும் விழாவில், கழகத் தலைவர் மு.க.ஸ்டாலின் அவர்கள் “கலைஞர் விருது” வழங்கிச் சிறப்பித்தார்.