நடமாடும் கல்லூரி! நல்லறிவுக் கல்லூரி! நாட்டிலே நல்லறிவை, நல்லறிவுணர்ச்சியைப் பரப்பிடும் பணிபுரிந்திடும் கல்லூரி – நடமாடும் கல்லூரி எங்கள் இயக்கம்!
நடமாடும் கல்லூரி! பட்டிதொட்டி, நாடுநகரம் குழந்தை முதல் கிழவர் வரை மனித மனம் படைத்த மனிதர்ின் எண்ணங்களிலெல்லாம் ஊறிப் பதிந்து விட்ட கல்லூரி – நடமாடும் கல்லூரி!
அறிவின் ஆரம்ப காலந்தொட்டு இன்றுவரை அழியாத அழிக்க முயன்றும் அழியாத, அழிக்கவே முடியாத அறிவுக் கல்லூரி – நல்லறிவுக் கல்லூரி – நடமாடும் கல்லூரி!
மனிதர் மனிதராக வாழ – மனிதர் மிருகங்களின் நாள் வேறுபட்டு, கொடுமைகளுக்கிடையே அன்பும் அருளும் அறிவும் ஆராய்ச்சியும் பெற்றுப் புது வாழ்வு – பொதுவாழ்வு வாழ வழிகாட்டுகிறது – எங்கள் நடமாடும் கல்லூரி!
சரித்திரகாலத்திற்கு முன்பிருந்துப் பலர், மனித இனம் மறந்துபோன பலர்,
இந்த நற்பணியை–நல்லறிவுப் போதனையை – நல்லறிவுக் கல்லூரியை நடத்தி வந்தனர்.
அன்றுதொட்டு இன்று வரை நல்லறிவுக் கல்லூரி நடமாடும் கல்லூரியாக
உலகெங்கும் நாடெங்கும் – அறிவின் தூதர்கள் மூலம் நிலவி வருகிறது – நடமாடி
வருகிறது.
இத்தகைய அறிவின் தூதர்களின் வழி வந்தவர்கள் உலகின் எப்பகுதியிலும்
எல்லாக் காலங்களிலும் தோன்றித் தொண்டு செய்து வந்துள்ளனர்!
சிந்தனைச் சிற்பி சாக்ரடீஸ், சிந்தித்த காரணத்திற்காக, பிறரையும் சிந்திக்கத்
தூண்டியதற்காக, நஞ்சு தரப்பட்டார் என்பதும், அப்போதும் அவர் மனமகிழ்ச்சி
யோடு மாண்டார் என்பதும் சரித்திரங்கண்ட உண்மையாகும்.
நஞ்சு குடித்து, குடிக்கும்படி செய்யப்பட்டு மடிந்த சிந்தனையாளன் சாக்ரடீஸ் வகுத்த வழியும், போதித்த நல்லறிவுக் கருத்துக்களும் அவருடன் சேர்ந்து தத்துவஞானி அரிஸ்டாட்டில், அரசியல் அறிஞன் பிளேட்டோ – ரூஸோ – வால்டேர் – கலிலியோ, இயேசு, புத்தர், முகம்மது நபி, உலகப் பெரியார் காந்தி முதலிய பலர் பல காலங்களிலும் நல்லறிவுக் கல்லூரியின் மாணவர்களாக–நாளடைவில் அதன் ஆசிரியர்களாகவும் பேராசிரியர்களாகவும் விளங்க – நாட்டிலே, உலகிலே மேலும் மேலும் நல்லறிவை – நல்லறிவுக் கருத்துக்களைப் பரப்பி–பலரைத் தமது வழி நடத்திப் பண்படுத்திச்
சென்றதைக் கண்டோம்.
எங்களுக்கு (திராவிட இயக்கத்திற்கு) எதிராக, பழமைப் பிரச்சாரம் பலமாக
இப்போது நடைபெற்று வருகிறது, நாடெங்கும்!
எதிர்ப்பு, ஏளனம், ஏசல், பூசல், தூற்றுதல், பாணங்கள், கேலிமொழிகள், கிண்டல் விளக்குகள், பழமை, மதம் பக்தியும், பற்றும் கொண்டு போதை ஏறிய மக்களின் கோபாவேசம் ஆகிய அத்தனையையும் அன்புமுறையில், அறிவையே ஆயுதமாகக் கொண்டு தாங்கி, எதிர் நீச்சலடித்து, எதிர்ப்பிலே வளரும் இயக்கம், எங்கள்
இயக்கம்!
சாதாரண மக்களிடையே நடமாடும் அறிவியக்கம்–எங்கள் இயக்கம்.
நல்லறிவு பரப்பிடும் இந்த இயக்கத்தை – நடமாடும் கல்லூரியை இடித்துவிட, முடித்துவிட, பழமை விரும்பிகள் – சுயநலமிகள் – ஆதிக்கக்காரர்கள் – சுரண்டி வாழ்வோர் பலப்பல விதங்களிலே முயன்று வருகின்றனர்.
எத்தகைய முயற்சிக்கும் முறிந்து போகக்கூடிய கல்லல்ல, இந்த நடமாடும்
கல்லூரி!
நல்லறிவும் – நல்லெண்ணமும் கொண்ட மனித மனம் படைத்த பொதுநலத் தொண்டர்கள் மட்டுமல்ல,
பொழுது போக்காக உழைப்பவர்கள்கூட எப்பொழுதும் பணிபுரியும் முறையிலே எங்கள் இயக்கம் அமைந்துள்ளது.
இதனைப் பழிக்க எவராலும், எத்தகைய சக்தியாலும், எப்போதும் முடியவே முடியாது, என்பது மிகமிக உறுதி!
தனிப்பட்ட சிலரது வாழ்விலே குறுக்கிட்டுக் கோலாகலம் விளைவித்து, தனிமனிதரை வேண்டுமென்றால் துன்புறுத்தலாம்.
ஒரு சில உடையார்பாளையம் வேலாயுதங்களைப் பிணமாக்கி, மரக்கிளையிலே தொங்கவிடலாம். மஜீத் – பாண்டியன் போன்று படுகொலை செய்யப்படலாம். வேறு என்ன முடியும்?
அன்றுதொட்டு, இன்று வரை, உலக வரலாற்றைப் புரட்டிப்பார்த்தால், அறிவின் தூதர்கள் ஒருவர் ஒருவராக அழிக்கப்பட்டாலும் கொடுமைக்கு – கோர காட்டுமிராண்டித்தனமான சித்திரவதைக்கு ஆளாக்கப்பட்டாலும், அவர்கள் – அந்த அறிவின் தூதர்கள்தான் மாண்டனரே தவிர, அவரது எண்ணங்கள், மக்களின் நல்வாழ்வுக்கான கருத்துக்கள் மறையவில்லை – மாறாக, மேலும் மேலும் பலவாக அறிவுரை –
அறிவின் தூதர்கள் நாட்டுக்கு உலகு தந்தன என்பதைக் காணலாம்.
கடவுள், மதம் – ஜாதி பேதம், பழக்கவழக்கம் ஆகிய துறைகளிலே மாற்றல் –
அடைந்து மறுமலர்ச்சி பெற்று, ‘வாழ்க்கை வாழ்வதற்கே’ என்று மனவளத்துடனும், மனவலிமையுடனும் தன்னம்பிக்கையைக் கொண்டவராகவும் – தன்மானமிக்கவராகவும் – திராவிடர் வாழ வேண்டும்.
இந்த நல்லெண்ணிலமைக்கு நாட்டு மக்கள் பண்பட்டு பக்குவப்படுத்தித் தருவாயா? நல்லதொன்று செய்து வருவது யார்? – எங்கள் நடமாடும் கல்லூரி!
தமிழன் எண்ணத்துறையிலே பண்பட்டவராகவும், அதே நேரத்தில், தன்னையும், தனது இனத்தையும், தன் நாட்டையும், தனது நாட்டின் இயற்கையையும் அடிமை நிலையையும் உணர்ந்து அதற்கான எல்லாவித தியாகத்தையும் செய்யத் தயாராக வேண்டும்.
நாம் யார்? நமது நாடு எது? என்பதை உணர வேண்டும். நடமாடும் கல்லூரியின் முக்கியப் பணிகளிலே நமது நாட்டை நாமே ஆளவேண்டும் – அதற்கான பணிபுரிந்தாக வேண்டும் என்பது மிகமிக முக்கியமாகும்.
அதற்கான பயிற்சி, போர்ப்பணி – புத்தறிவுப் பாதையை நடமாடும் கல்லூரியின் பேராசிரியர் அறிஞர் அண்ணா காட்டுகிறார் – அதன்வழி – அண்ணா
காட்டும் அறப்போர் வழி நடப்போம் – வாரீர்!