சென்னை, செப். 22 –

பட்டினப்பாக்கத்தில் புதிய தலைமைச் செயலகம் மற்றும் சட்டமன்ற வளாகம் அமைக்கும் திட்டத்தை கைவிட வலியுறுத்தி மார்க்சிஸ்ட் கம்யூனிஸ்ட் கட்சி சார்பில் நேற்று முன்தினம் கண்டன ஆர்ப்பாட்டம் நடைபெற்றது.

தொடர்ந்து கட்சியின் மாநில செயலாளர் பெ.சண்முகம் நிருபர்களிடம் கூறியதாவது: –

புதிய தலைமைச் செயலகத்தை பட்டினப்பாக்கத்தில் அமைக்கும் முடிவை திரும்பப் பெற வேண்டும். சுனாமி பாதித்த பகுதியில், கடற்கரைக்கு அருகில் மீனவர்களின் வாழ் வாதாரத்தையும் குடியிருப்புகளையும் பாதிக்கக்கூடிய வகையில் இந்த திட்டத்தை அமைப்பது ஏற்கத்தக்கதல்ல.

சென்னைக்குள்ளேயே புதிய தலைமைச் செயலகம் மற்றும் சட்டப் பேரவையை அமைப்பதற்கு பல்வேறு இடங்கள் உள்ளன. கிண்டி ரேஸ் கோர்ஸ் மைதானம் சுமார் 160 ஏக்கர் பரப்பளவு கொண்டது. அங்கு எதிர்காலத்தில் சட்டமன்ற உறுப்பினர் களின் எண்ணிக்கை அதிகரித்தாலும் தேவையான கட்டமைப்புகளை ஏற்படுத்த முடியும். கோயம்பேடு பேருந்து நிலையம் கிளாம்பாக்கத்துக்கு மாற்றப்பட்டுள்ள நிலையில், கோயம்பேடு பேருந்து நிலையத்தையும் அதைச் சுற்றியுள்ள பகுதிகளையும் மாற்று இடமாக பரிசீலிக்கலாம்.

பட்டினப்பாக்கத்தில் திட்டப் பணிகளை தொடங்கினால், அதை மார்க்சிஸ்ட் கம்யூனிஸ்ட் கட்சி தடுக்கும். இந்த அரசின் அணுகுமுறை திருப்தி கரமாக இல்லை. எதிர்க்கட்சிகளின் கருத்துகளுக்கு செவி கொடுப்பதில்லை. இதே நிலை தொடர்ந்து நீடித்தால் எங்கள் முடிவை மாற்ற வேண்டி வரும். சென்னை விமான நிலையத்தை தனியாருக்கு ஒப்படைப்பது தொடர்பாக முதலமைச்சர் பிரதமருக்கு கடிதம் எழுதியிருப்பதாக செய்திகள் வெளியாகி யுள்ளன. இது உண்மையாக இருந்தால் கண்டனத்துக்குரியது. அந்த முடிவை உடனடியாக திரும்பப் பெற வேண்டும். இவ்வாறு அவர் கூறினார்.