புதுச்சேரி, செப். 22 –
புதுச்சேரி தட்டாஞ்சாவடி தொகுதி இடைத்தேர்தலில் தி.மு.க. சார்பில் சேது செல்வம் போட்டியிடுகிறார். அவருக்கு தி.மு.க. நிர்வாகிகள் தீவிர பிரசாரம் மேற்கொண்டு வருகிறார்கள். அதன் ஒரு பகுதியாக தட்டாஞ்சாவடி மாரியம்மன் கோவில் வீதியில் கொள்கை பரப்பு செயலாளரும், புதுச்சேரி மாநில தேர்தல் பொறுப்பாளருமான எஸ். ஜெகத்ரட்சகன் எம்.பி., தமிழக முன்னாள் அமைச்சரும், மாநில துணை செயலாளருமான க. பொன்முடி, புதுச்சேரி மாநில அமைப்பாளர் இரா. சிவா, விழுப்புரம் மத்திய மாவட்டச் செயலாளர் டாக்டர் ஆ. லட்சுமணன் எம்.எல்.ஏ., விழுப்புரம் தெற்கு மாவட்டச் செயலாளர் டாக்டர் பொன். கெளதமசிகாமணி, தி.மு.க. சட்டமன்ற உறுப்பினர்கள் இரா. செந்தில்குமார், விக்னேஷ் கண்ணன், வானூர் சட்டமன்ற உறுப்பினர் கெளதம் திராவிடமணி, முன்னாள் சட்டமன்ற உறுப்பினர்கள்
பூ.மூர்த்தி, நந்தா டி. சரவணன் ஆகியோர் வீடு, வீடாக சென்று உதயசூரியன் சின்னத்திற்கு வாக்கு சேகரிப்பில் ஈடுபட்டனர். தொடர்ந்து மாலையில் அவ்வை நகர், புதுப்பேட், முத்துலிங்கம்பேட், குறிஞ்சி நகர் பகுதியிலும் வாக்கு சேகரிப்பில் ஈடுபட்டனர்.
அப்போது தி.மு.க. வேட்பாளர் சேது செல்வதற்கு பொதுமக்கள் மலர்கள் தூவியும், ஆரத்தி எடுத்தும் உற்சாக வரவேற்பு அளித்தனர். மேலும் தி.மு.க. வேட்பாளர் சேது செல்வத்தை வெற்றி பெற வைத்தால், தட்டாஞ்சாவடி தொகுதி மக்களின் அடிப்படை தேவைகளை உடனுக்குடன் நிறை வேற்றி தருவார் என்றும், கடந்த 10 ஆண்டுகளாக இந்தப் பகுதியில் ஆளும் பா.ஜ.க. - என்.ஆர். காங்கிரஸ் அரசு எந்த ஒரு அடிப்படை வசதிகளையும் செய்து தரவில்லை என்றும் தி.மு.க. நிர்வாகிகள் பொதுமக்கள் மத்தியில் எடுத்துக் கூறினர்.
குறிஞ்சி நகர் பகுதியில் தி.மு.க. மாநில அமைப்பாளர் இரா. சிவா பேசியதாவது:- புதுச்சேரியில் தி.மு.க. ஆட்சி வர வேண்டும் என மக்கள் விரும்பினார்கள். ஆனால் தி.மு.க.வுடன் இருந்த கூட்டணி கட்சிகள் நட்பு போட்டி என்ற சூழ்ச்சி செய்தனர்.
புதுவையில் என்.ஆர்.காங்கிரஸ் கட்சி ஆட்சி நடக்கிறது. இந்த ஆட்சி மக்களால் விரும்பி கொண்டு வரவில்லை. அதிர்ஷ்டத்தில் தான் ரங்கசாமி முதல்-அமைச்சர் ஆனார். தட்டாஞ்சாவடி தொகுதி தான் முதல மைச்சர் ரங்கசாமியை வளர்த்து ஆளாக்கியது. இந்த தொகுதி மக்களுக்கு ரங்கசாமி எதுவும் செய்யவில்லை. முதலமைச்சர் ரங்கசாமி தட்டாஞ்சாவடி தொகுதியை கைவிட்டுவிட்டார். மக்கள் மீது நம்பிக்கை இல்லாமல் கடந்த 2021-ம் ஆண்டு நடந்த சட்டசபை தேர்தலில் ஏனாமில் போட்டியிட்டார். ஆனால் ஏனாம் மக்கள் தோற்கடித்தனர். மீண்டும் கடந்த சட்டசபை தேர்தலில் தட்டாஞ்சாவடி, மங்கலம் ஆகிய 2 தொகுதிகளில் போட்டியிட்டார். தற்போது தட்டாஞ்சாவடி தொகுதி மக்களை மறந்துவிட்டு வேறுதொகுதிக்கு சென்றுவிட்டார்.
தட்டாஞ்சாவடி இடைத்தேர்தலில் தி.மு.க. சார்பில் மக்களுக்காக பல்வேறு போராட்டங்களை நடத்திய சேதுசெல்வத்தை வேட்பாள ராக நிறுத்தி உள்ளோம். முதல்வர் ரங்கசாமி மக்களை திரும்பி பார்ப்பது இல்லை.
அவருக்கு மக்கள் பாடம் புகட்டவேண்டும். புதுச்சேரியில் நல்லாட்சி நடக்க வேண்டும். புதுச்சேரியில் ஏராளமான பிரச்சினை கள் உள்ளது. புதுச்சேரி எந்தவொரு வளர்ச்சியும் இல்லாமல் மிகமிக பின்தங்கியுள்ளது.
இவ்வாறு அவர் பேசினார்.