சென்னை, செப். 23–
தமிழ்நாடு தொடக்கப்பள்ளி ஆசிரியர் மன்றத்தின் மாநில பொதுச் செயலாளர் முனைவர் மன்றம் நா. சண்முகநாதன் வெளியிட்டுள்ள அறிக்கையில் கூறியிருப்பதாவது:
பள்ளிக்கல்வித்துறையின் செயல்பாடுகள் வினோதமாகவும், கல்வி வளர்ச்சிப் பாதையில் இருந்து தடம் மாறியும் செல்கிறது.
முதல் வகுப்பு ஆங்கில வினாத்தாள் லீக் ஆன விவகாரத்தில்கல்வித்துறை காட்டும் அதிவேக நடவடிக்கை ஆச்சரியம் அளிக்கிறது. ஆனால் ஆசிரியர்களின் நீண்டகால கோரிக்கைகளில் எந்த வேகமும் இல்லை.
ஆசிரியர் தகுதித் தேர்வு (TET) பிரச்சினைக்கு தீர்வு இல்லை.
-பல்லாயிரக்கணக்கான ஆசிரியர் காலிப் பணியிடங்கள் நிரப்பப்படவில்லை.
-வகுப்பறைகளில் பாதுகாப்பற்ற சூழல் நிலவுகிறது.
-தகுதியுள்ள ஆசிரியர்களுக்கு பல ஆண்டுகளாகபதவி உயர்வு வழங்கப்படாமல் பணி நிறைவு பெறும் அவலம் தொடர்கிறது.
-இடைநிலை ஆசிரியர்களின் ஊதிய முரண்பாடு களையப்படவில்லை.
-அறிஞர் அண்ணா காலத்தில் இருந்து வழங்கப்பட்ட ஊக்க ஊதிய உயர்வு நிறுத்தி வைக்கப்பட்டுள்ளது.
-தேர்தல் வாக்குறுதியான பழைய ஓய்வூதியத் திட்டத்தை அமல்படுத்துவதில் எந்த முன்னேற்றமும் இல்லை.
-நிர்வாக சீர்கேடுகளும், நீதிமன்ற வழக்குகளும் நாளுக்கு நாள் அதிகரித்து வருகின்றன.
இவற்றில் எல்லாம் வேகம் காட்டாத கல்வித்துறை, முதல் வகுப்பு வினாத்தாள் விவகாரத்தில் மட்டும் ‘ஒரே நாடு, ஒரே வினாத்தாள், ஒரே தேர்வு’ என்ற ரீதியில் செயல்படுவது ஆசிரியர்கள், மாணவர்கள், பெற்றோர்கள் மத்தியில் பெரும் அச்சத்தை ஏற்படுத்தியுள்ளது.
மாநிலம் முழுவதும் பொதுத்தேர்வு வினாத்தாள் தயாரிப்புக் குழு யார்? அதை அச்சடித்தது யார்? வெளியிட்டது யார்? என்பது குறித்து வெளிப்படைத்தன்மை வேண்டும்.
முதல் வகுப்பு குழந்தைகளுக்கு பள்ளி அளவில் நடத்த வேண்டிய தேர்வை, மாநில அளவில் பொதுத்தேர்வாக நடத்துவதுஏற்புடையதல்ல. .
வினாத்தாள் லீக் ஆனதற்கு ஆசிரியர்களை பதற்றத்திற்கு உள்ளாக்கி, உடனடியாக அலுவலகம் வந்து வினாத்தாளை பெற்றுச்செல்ல வேண்டும் என உத்தரவிடுவது கண்டிக்கத்தக்கது.
மாணவர்கள் மகிழ்ச்சியாக கற்றதை வெளிப்படுத்தும் வகையில் தேர்வு முறை இருக்க வேண்டுமே தவிர, அச்சுறுத்தும் வகையில் இருக்கக்கூடாது. வருங்காலத்தில் இதுபோன்ற நிகழ்வுகள் தொடக்கக்கல்வித் துறையில் நடைபெறாமல் தடுக்க உரிய நடவடிக்கை எடுக்க வேண்டும் என தமிழ்நாடு தொடக்கப்பள்ளி ஆசிரியர் மன்றம் சார்பில் வலியுறுத்துகிறேன்.
இவ்வாறு அதில் கூறியுள்ளார்.