தேனி, செப். 23 –
தேனி மாவட்டம் சின்னமனூரில் நில அளவை பணிக்கு சென்ற அரசு டவுன் சர்வேயர் மீது தமிழக வெற்றிக் கழக (த.வெ.க.) நிர்வாகி உட்பட 3 பேர் கொடூரமாக தாக்குதல் நடத்திய சம்பவம் பெரும் பரபரப்பை ஏற்படுத்தியுள்ளது. காவல்துறை வழக்குப் பதிவு செய்யாததை கண்டித்து தேனி மாவட்ட நில அளவையர்கள் மாவட்ட ஆட்சியர் அலுவலகம் அருகே கண்டன ஆர்ப்பாட்டம் நடத்தினர். தேனி மாவட்டம் உத்தமபாளையம் தாலுகா, சின்னமனூர் நகராட்சி டவுன் சர்வேயர் ஜெகன் குமார் மற்றும் அவரது உதவியாளர் இருவரும் நேற்று மதியம் சுமார் 3 மணி அளவில் சின்னமனூரில் ஆதிலால் லாட்ஜ் பின்புறம் உள்ள அண்ணாமலை நகர் பகுதியில் வழக்கமான நில அளவை பணிக்கு சென்றுள்ளனர்.
அப்போது அங்கு வந்த ஓய்வு பெற்ற சார்பு ஆய்வாளர் சந்திரன், செல்வராஜ் மற்றும் தமிழக வெற்றிக் கழகத்தின் இணை செயலாளர் ரஞ்சித் குமார் ஆகிய மூன்று பேரும் சேர்ந்து, நில அளவை பணியை தடுத்து நிறுத்தி, சர்வேயர் ஜெகன் குமாரை கஞ்சா மற்றும் மது போதையில் கடுமையாக தாக்கியுள்ளனர்.
இந்த தாக்குதலில் சர்வேயர் ஜெகன் குமார் காயமடைந்ததாக கூறப்படுகிறது.
காவல்துறை வழக்குப் பதிவு செய்யவில்லை என புகார்:
இந்த சம்பவம் குறித்து சின்னமனூர் காவல் நிலையத்தில் புகார் அளித்தும், இதுவரை காவல்துறையினர் வழக்குப் பதிவு செய்யவில்லை என குற்றச்சாட்டு எழுந்துள்ளது.
மைனாரிட்டி த.வெ.க. ஆட்சியில் ஆளும் கட்சி நிர்வாகி சம்பந்தப்பட்டிருப்பதால் காவல்துறை நடவடிக்கை எடுக்க தயங்குவதாகவும், அரசு அதிகாரிகளுக்கே பாதுகாப்பு இல்லாத சூழல் உருவாகியுள்ளதாகவும் அரசு ஊழியர்கள் வேதனை தெரிவிக்கின்றனர். காவல்துறையின் இந்த மெத்தன போக்கை கண்டித்து தேனி மாவட்டம் முழுவதும் உள்ள நில அளவையர்கள், ஊழியர்கள் ஒன்று சேர்ந்து இன்று தேனி மாவட்ட ஆட்சியர் அலுவலகம் அருகில் கண்டன ஆர்ப்பாட்டத்தில் ஈடுபட்டனர்.
அப்போது அவர்கள், சர்வேயர் ஜெகன் குமாரை தாக்கிய 3 பேர் மீதும் உடனடியாக கொலை முயற்சிவழக்குப் பதிவு செய்து கைதுசெய்ய வேண்டும்.
பணியில் இருந்த அரசு ஊழியரை தாக்கியவர்கள் மீது அரசு ஊழியரை பணி செய்ய விடாமல் தடுத்தல் பிரிவில் வழக்குப் பதிவு செய்ய வேண்டும்.
அரசு அதிகாரிகளுக்கு உரிய பாதுகாப்பு வழங்க வேண்டும் என கோஷங்களை எழுப்பினர்.
இந்த சம்பவம் குறித்து மாவட்ட ஆட்சியர் மற்றும் மாவட்ட காவல் கண்காணிப்பாளர் உரிய நடவடிக்கை எடுக்க வேண்டும் என்று ஆர்ப்பாட்டம் செய்தனர்.